Salmo 83
83
Kararag Ta Abaken Diyos Din Kalaban Di Ipogaw Na
1 Apo, adi ka kod gomiginek issa,
2 tan doy labanen daka sin mangililiget en sik-a.
3 Nasikap da yan way lawa ay plano da
sin ipogaw ay napateg en sik-a.
4 Kanan da, “Omali kayo ta peslen tako amin daida
ta malinglingan ed Israel si eng-enggana.”
5 Nantotolag da ay manbabadang da
ay manlaban en sik-a.
6 Nantotolag din Edomita ya Ismaelita,
Hagareno ya Moabita,
7 din taga-Gebal, Ammonita ya Amalekita,
din taga-Tiro ya Filistia.
8 Naitapi aben daida din taga-Assyria
ay napigsa ay kabadang din polin Lot ay Ammonita ya Moabita.
9 Amagem koman daida din inyat mos taga-Midian
ya da Sisera en Jabin sin ginawang ay Kison.
10 Inabak mo ed Endor si daida
et naboyok awak da sin lota.
11 Kaman din inyat mon da Oreb en Zeeb koma
di amagem sin papangolo da.
Abakem din tuturay da
ay kaman din panangabak mon da Zeba en Zalmunna.
12 Daida din nangwani en okaen da
din okan Diyos ay daga.
13 Iwalang mos daida ay kaman tapok,
kaman teg-ap ay itayaw di dagem.
14 Kaman koman din iyat di apoy sin kadondontogan ay mamoo sin kada,
15 apayawem ya kibtotem daida
babaen si dagem mo ay napigsa.
16 Ibabain mos daida ta bigbigen da ay manakabalin ka.
17 Maabak ya emegyat da komas eng-enggana
ya palalo koma ay maibabain da sin kateyan da.
18 Siya na di ammoen da koma:
sik-a anggoy ay Yahweh di ngadana
din kangatoan ay mangituray sin daga.