Salmo 84
84
Layad Di Emey Sin Beey Diyos
1 Sik-a ay Diyos, Kangatoan ay Apo,
peteg di layad ko sin beey mo.
2 Mailiwak ay senggep sin Timplo
ta idayaw kos sik-a, Diyos ay matmatago.
3 Olay din titit et nan-amag da isdis obong da,
din pipingew et waday dinteng das panbeeyan da,
et man-itlog da pay sin sag-en di altar mo,
sik-a ay arik ya Diyos ko.
4 Nagasat iman di ipogaw ay manbebeey sin Timplom
tan mankankanta da ay manaydayaw en sik-as kankanayon.
5 Nagasat di ipogaw ay mantalek en sik-a
ay sik-ay kapoan di am-in ay bikas da
ya din emeyan da ed Zion et say laylayden da.
6 Mo manmandan da sin nanamgaan ay tanap ed Baca,
dagos ay mawaday obbog et masibogan san lota.
Mapno abey posong sin odan ay masapa.
7 Pomigsa da ay pomigsa sin pandad-anan da.
Mo domateng da ed Zion, awni et manpaila da
sin sangoanan Diyos*Siya sa din kanana sin Masoretic Text sin Hebreo. Din kanana abe sin odom ay manuskrito et: Awni et manpaila en daida si Diyos … Din kanana abe sin LXX et: Awni et maila da si Diyos … ay kangatoan ed daya ya isnan daga.
8 Dengngem koma san adawag ko,
Yahweh, Kangatoan ay Apo,
sik-a ay dinaydayaw Jacob, itnengam nan karkararag ko.
9 Ay Diyos, bindisyonam koma san ari mi
tan pinilim sisya ay mangituray en dakami.
10 Di esa ay agew ay kawadak isnan Timplo
et sigsiged mo sinlibo ay agew sin odom ay disso.
Olay mo owatak pomipika sin pantew di beey di Apo,
maymayat na mo din makibeey sin ipogaw ay nakillo.
11 Si Diyos et maiarig sin agew ay maneysey-ang en datako.
Maiarig abes kasay ay salaknib tako.
Sisya din madaydayaw ya nangato ay ari tako.
Segseg-angana ya ipangpangato nas datako.
Adi nan kayyawan din siged ay wadan sisya
sin ipogaw ay nalinteg di kabibiyag da.
12 Sik-a ay Diyos ay Kangatoan,
nagasat di ipogaw ay sik-a di ena pantalkan.
*84:7 Siya sa din kanana sin Masoretic Text sin Hebreo. Din kanana abe sin odom ay manuskrito et: Awni et manpaila en daida si Diyos … Din kanana abe sin LXX et: Awni et maila da si Diyos …