Salmo 85
85
Kararag Ay Mankedaw Si Panmayatan Di Ili
1 Binindisyonam din ilim, Apo,
et din biyag di polin Jacob yan inpasiged mo.
2 Pinakawan mo amin ay nanbasolan di ipogaw mo,
3 din palalo ay bonget mon daida yan kinaan mo.
4 Diyos ay omisalakan, pasigedem koma kasin din kasasaad mi,
isaldeng mo koma din panigsigaam en dakami.
5 Adi ka koman mabonget en dakamis eng-enggana.
6 Papigsaem kasin dakami ta manragsak din ipogaw mo gapon sik-a.
7 Ipailam koman dakami din adi manbalbaliw ay layad mo
ya isalakan mos dakami, Apo.
8 Dedengngek di ibagbagan Diyos ay kari na
en idawat na di talna en datako ay ipogaw na
mo adi tako taolien din inam-amag tako ay lawa.
9 Nakasagana ay mangisalakan sin mangipatpateg en sisya,
ta say mantoltoloy ay maipaila
sin ili tako din somili ay kinadiyos na.
10 Din layad ya kinamatalek yan awni et mantapi da,
yan mankoyog di kinalinteg ya talna.
11 Mawada di kinamatalek isnan daga,
si Diyos ed langit yan ipaila na abe di kinalinteg na.
12 Idawat Diyos di bindisyon et omad-adoy apit sin daga.
13 Mangon-ona di kinalinteg sin sangoanana
ay mangisagana sin pandanana.