Salmo 105
105
Matalek Si Diyos
1 Man-iyaman kayo en Diyos ay wadad daya.
Idaddad-at yo din nakaskasdaaw ay kinadiyos na,
dad-aten yo sin kaipoipogaw din inam-amag na.
2 Idayaw yo si Diyos sin kankanta,
dad-aten yo din nakaskasdaaw ay inam-amag na.
3 It-ek yo din nasantoan ay ngadana,
manragsak kayo ay mandaydayaw en sisya.
4 Si Diyos di pankamangan yo
ya kanayon ay daydayawen yo.
5 Nemnemen yo din nakaskasdaaw ay inam-amag na
ya din dosa ay inkeddeng na,
6 dakayo ay polin Abraham ay baa na
ya siya abe en Jacob ay pinili na.
7 Si Yahweh et Diyos takos sisya.
Din ikeddeng na et maipaammo sin intiro ay daga.
8 Adi na polos liw-an din intolag na si eng-enggana,
siya abe sin inkari na, tan sigurado ay tongpalena.
9-10 Et siya na din adi manbalbaliw ay inkari na
en da Abraham, Isaac ya si Jacob ay aap-o tako ay Israelita.
11 Kanana, “Din daga ed Canaan et idawat ko en dakayo,
et say ipatawid yo sin ipoli yon to.”
12 At-atik da din ipogaw Diyos ed idi,
din kaibilangan da ed Canaan yan mangili,
13 tan nan-etaetan da sin inil-ili.
14 Ngem adi inpalobos Diyos ay waday mamaligat en daida.
Binagbagaana di aari ta masalakniban din ipogaw na.
15 Kanana, “Adi yon palpaligaten din pinilik ay baa,
din pankalkaliak yan bay-an yos daida.”
16 Inpawadan Diyos di betil sin daga da,
et maga polos di kanen da.
17 Ngem wada di inbaa na
ed Egipto ay namangpango mo daida,
si Jose ay nanbalin si bag-en tan inlakon din aag-i na.
18 Inbalod din taga-Egipto et kinadinaan dan siki na,
wada abey landok ay inpaikeke da,
19 enggana ay tinmet-ewa din inpadto na
ya nakdeng ay pinadpadas Diyos sisya.*Di esa abe ay kaiologan nina sin Hebreo et: pinaneknekan Diyos ay nalinteg sisya.
20 Pag wayawayaan din ari ay mangituray ed Egiptos sisya.
21 Dinotokanas Jose ay panakaawak na
ta say mangituray sin ili da
22 ya makaammo ay mangitdo ya mamagbaga
sin oopisyal na.
23 Pag omonod si Jacob ed Egipto et isdi di nanbeeyana.
24 Indawtan Diyos si ad-ado ay anak din poli na
et pinapigsa nas daida mo din kalaban da.
25 Inturong na din nemnem di taga-Egipto ay kalaban da
ta iliget ya sikapan da din ipogaw na,
26 ngem inbaa nas da Moses en Aaron ay pinili na
ta ed Egipto di emeyan da.
27 Idi dinmateng das di, ad-ado di inpaila da
ay sinyal ya milagro ay inpaamag Diyos en daida.
28 Inpabolinget Diyos din ili da,
ngem adi pinatin din taga-Egipto din bilina.
29 Nanbalinena si dada din danom sin ginawang da,
et natey amin din nigay ay wada.
30 Napno si tokak din ili da,
pati sin palasyo yan napno da.
31 Inbilin Diyos ay lallaeg ya tilang di mawada,
et napno din intiro ay daga da.
32 Baken odan mo adi et dalalo ya kimat di inbaa na sin ili da,
33 et nadadael din obas ya igos ay prutas da
dowan aben naspak am-in di kaiw da.
34 Inbilina et adi kabilang ay dodon di nawada,
35 et kinan da amin ay mola
ay ginmabgabay sin dagan di taga-Egipto ay kad-an da.
36 Pinse na din besag ay lalaki sin amin ay pamilya da.
37 Idi makdeng di, inpango na din Israelita ay ipogaw na,
ay pag da amin nasalon-at ya napigsa,
et kinmaan da ay nangitakin si balitok ya palata.
38 Peteg di layad din taga-Egipto sin kinmaanan da
tan egyatan das daida.
39 Inpawadan Diyos di liboo ay manlidom sin ipogaw na
ya apoy sin labi ay mangsilaw en daida.
40 Nankedaw da et indawtan Diyos si daida
si titit†Exodo 16:13 ya Bilbilang 11:31-34. ya makan ay napod daya ta mapnek da.
41 Idi magay danom si pan-inoman da,
waday bato ay nan-ekangena,
et nan-ayos di danom ay kaman ginawang
sin lugar ay kad-an da ay kadardaratan.‡Din istorya ay nay et madtengan sin Exodo 17:1-6.
42 Adi niliw-an Diyos din napateg ay inkari na
en Abraham ay baa na.
43 Isonga inpango na din pinili na ay ipogaw na,
et nankankanta das palalo ay ragsak da
sin kinmaanan da sin ili ay naibag-enan da.
44 Din dagan di odom ay ipogaw di indawat na en daida,
din inling-etan di odom, inpalobos na ay okaen da.
45 Inamag Diyos di ta say tongpalen din ipogaw na
din amin ay linteg ya bilbilina.
Si Diyos et madaydayaw koma!
*105:19 Di esa abe ay kaiologan nina sin Hebreo et: pinaneknekan Diyos ay nalinteg sisya.
†105:40 Exodo 16:13 ya Bilbilang 11:31-34.
‡105:41 Din istorya ay nay et madtengan sin Exodo 17:1-6.