Salmo 104
104
Din Kinangaton Diyos Ay Namarsua
Yahweh ay Diyos ko, dayawek sik-a,
tan tet-ewa ay manakabalin ka.
Dayaw ya kinangato, naipabadon sik-a,
manliniked en sik-a di pat-a.
Ed daya yan inoklag mo ay kaman tolda.
Insaad mo din beey mo sin danom ay wada ed daya.* Ilaen din footnote sin Genesis 1:7-8.
Manlogan ka sin liboo ya mapges ay dagem ay kaman mon kalisa.
Din dagem ya kimat yan ibaam daida.
Inset mo ay insaad din daga
et maga polos di kaikiwegana.
Kaman mon binadoan si baybay ay malosong
et din dontog yan nilim-otan di danom.
Asi kan bilinen din danom et dinmenden da.
Sin dontog ya tanap yan inmayos da
enggana sin insaganam ay pantean da.
Inkeddeng moy gedeng da
ta say adi da mantaoli ay manlim-ot sin daga.
10 Inpawadam sin tanap di obbog,
et man-ayos da sin nan-gawaan di dontog.
11 Man-inom amin din atap ay animal isdi,
siya abe di pan-inoman din atap ay dangki.
12 Sin kakaiw sin benget da,
man-obong di titit ya mankanta da.
13 Manipod ed daya ay kad-am,
sibsibogam din dontog si odan,
et mapnek si bindisyon mo nan daga ay pinarsuam.
14 Inpagabay mo din logam para sin baka
ya molmola ay pangaan di ipogaw si kasapolan da,
15 ta mawada di arak ay panragsakan da,
lana ay mangipapteng sin ropa da,
ya makan ay mangipabikas en daida.
16 Din kakaiw Diyos et masibogan da,
din makwani en sidro ed Lebanon ay inpagabay na.
17 Din kinittoy ay titit yan isdi ay man-obong da,
siya abe din dadakke sin kakayangan ay panga da.
18 Din atap ay kalding et sin nakayang ay dontog di pantean da,
sin deppas yan panbeeyan di bewet ay kanan da.
19 Pinarsuam din bowan ay waday pan-inatana ya bemeskaana
ta say din timpo et waday kailasinana.
Din agew yan ammo na din oras ay kadiposana.
20 Inpawadam di bolinget et siya din labi ay kanan da,
say bomalaan di atap ay animal sin kada.
21 Manngaed din bomaro ay layon ay manganap si anopen da,
an-anapen da din indawat Diyos ay kanen da.
22 Mo bomala din agew yan mantaoli da
sin liyang ay pantean da.
23 Din ipogaw abe yan bomala da
ay maninsin-agew da ay man-obla.
24 Apo Diyos, napno nan daga sin adi kabilang ay inamag mo.
Inamag mo amin babaen sin laing mo.
25 Wada abe din baybay ay adi kalokod din kaannawa na.
Adi kabilang di manbibiyag isdi ay parsua,
kinittoy ya dadakke da.
26 Din bapor yan isdi di en da panbiyahian.
Isdi abe di pan-ay-ayaman
din dakdake ay dragon ono bowaya ay pinarsuam
ay makwani en Leviatan.
27 Amin ay parsua et sik-a din pannamnamaan da
ay mangidawat si kanen da sin kosto ay timpo na.
28 Idawdawat mo din kanen di esa ya esa,
et mangan da enggana ay mabsog da.
29 Emegyat da mo taynam daida.
Matey da mo pasaldengem din leng-ag da
et mantaoli da sin tapok ay napoan da.
30 Ngem babaen sin Ispiritom, Di esa abe ay kaiologan nina sin Hebreo et: Ngem babaen sin leng-ag mo, … manparsua kas maiskat en daida,
et wada kasin di matago isnan labaw di daga.
31 Apo Diyos, maipaila koma di panakabalin mo si eng-enggana
ya malaydan ka koma sin pinarsuam isnan daga.
32 Manyegyeg din daga mo ilaem,
omasok din dontog mo giwitem.
33 Mankantaak ta idaydayaw kos sik-a ay Diyos
enggana ay nan leng-ag ko, malongbos.
34 Mapnek ka koma isnan kansiyon ko,
tan sik-a di poon di ragsak ko.
35 Ikararag ko ay kaanem koma
din managbasol isnan daga.
Apo Diyos, idaydayaw kos sik-a!
Tet-ewa ay madaydayaw ka!

*104:3 Ilaen din footnote sin Genesis 1:7-8.

104:30 Di esa abe ay kaiologan nina sin Hebreo et: Ngem babaen sin leng-ag mo,