1 Sie kas in fahkak ke acn Moab pa inge.15:1—16:14; Isa 25:10–12; Jer 48:1–47; Ezk 25:8–11; Amo 2:1–3; Zep 2:8–11

Siti lun Ar ac Kir ac kunanula ke fong sefanna, na ac fah arulana misla acn Moab. 2 Mwet Dibon elos fanyak nu fineol uh in tung in acn in alyalu lalos. Mwet Moab elos wowoyak ac tung tutaf ke sripen asor lalos ke siti Nebo ac Medeba. Elos mangsrasrala ac kalla alut lalos. 3 Mwet inkanek uh elos asor ac nokomang nuknuk yohk eoa. Mwet uh tung ke nien tukeni in siti uh, ac fin lohm uh. 4 Mwet Heshbon a Elealeh elos wowoyak, ac pusren tung lalos ku in lohngyuk yen loessula nwe Jahaz. Finne mwet mweun uh, elos rarrar pac ke elos lohng, ac wanginla pulaik lalos. 5 Insiuk tungi acn Moab! Mwet we elos kaingla nu in siti Zoar ac nu Eglath Shelishiyah. Kutu mwet uh fanyak ke inkanek nu Luhith, fahsr na tung; ac kutu kaingla nu Horonaim, arulana wowoyak ke asor. 6 Infacl srisrik Nimrim paola, ac mah siska uh uli. Wanginla mah folfol lula we. 7 Mwet uh fahsr sasla Infahlfal Willow, ac srike in kaing wi ma lalos nukewa. 8 Ke masrol nukewa lun acn Moab, tung uh lohngyuk we. Lohngyuk pac in siti Eglaim ac Beerelim. 9 Kof ke infacl soko in acn Dibon, srusrala ke srah, na srakna oasr ma upa liki inge ma God El akoo nu sin mwet in acn we. Aok, mwet nukewa su lula in acn Moab ac fah anwuki.