25
Soko On In Kaksak
1 LEUM GOD, kom God luk;
Nga fah akfulatye kom ac kaksakin Inem.
Kom orala ma usrnguk;
Ac kom oaru na in akfahsrye
Ma kom lumahla in pacl oemeet ah.
2 Kom ekulla siti uh in oanna sruala,
Ac kom kunausla pot ku we.
Inkul fulat sin tokosra ma mwet lokoalok lasr musaela
Wanginla. Ac fah tia sifil musaiyuk.
3 Mwet in mutunfacl kulana fah kaksakin kom;
Mutunfacl sulallal nukewa ac fah sangeng sum.
4 Mwet sukasrup ac mwet mukaimtal elos kaing nu yurum
Ac elos moulla in pacl in ongoiya.
Kom sang nu selos acn in wikla ke pacl in paka,
Ac acn lul ke pacl fol.
Mwet sulallal elos anwuk oana ke eng upa uh fungulya pesinka,
5 Oana fol upa lun faht yen mwesis.
A Kom, LEUM GOD, kom akmisyela wohwon lun mwet lokoalok lasr;
Kom sikulya sasa lun mwet sulallal,
Oana ke sie pukunyeng akoyohuye sie len fol.
God El Akoo Sie Kufwa
6 In acn se inge, fin Eol Zion, LEUM GOD Kulana El fah akola sie kufwa nu sin mutanfahl nukewa faclu — sie kufwa ke mwe mongo na yuyu ac wain na wowo. 7 El fah sa na moklela pukunyeng in asor su sunya mutunfacl nukewa. 8 LEUM GOD Fulatlana El fah kunausla misa nwe tok! El ac fah eela sroninmuta liki mutun mwet nukewa, ac usla mwe mwekin ma mwet lal keok kac yen nukewa faclu. LEUM GOD sifacna pa fahk ma inge.1 Cor 15:54; Fwack 7:17; 21:4
9 Pacl se ma inge ac sikyak uh, mwet nukewa fah fahk, “El inge God lasr! Kut filiya lulalfongi lasr in El, ac El molikutla. El pa LEUM GOD! Kut filiya lulalfongi lasr in El, ac inge kut engan ac insewowo mweyen El molikutla.”
God El Ac Kalyei Acn Moab
10 LEUM GOD El fah loangela Eol Zion, tusruktu mwet Moab ac fah futungyuki oana ke mah pao uh lolongyuki ke fohkon cow uh.25:10–12; Isa 15:1—16:14; Jer 48:1–47; Ezk 25:8–11; Amo 2:1–3; Zep 2:8–11 11 Elos ac fah asroela paolos oana elos in srike in kofkof, tusruktu God El ac akmwekinyalos, na paolos ac totola ac tili, tia ku in oru kutena ma. 12 El ac fah kunausla pot ku ac fulat lun Moab ac rakinya nu infohk uh.
25:8 1 Cor 15:54; Fwack 7:17; 21:4
25:10 25:10–12; Isa 15:1—16:14; Jer 48:1–47; Ezk 25:8–11; Amo 2:1–3; Zep 2:8–11