43
God El Wulela In Molela Mwet Lal
1 Israel, LEUM GOD su orekomla El fahk,
“Nimet sangeng — nga molikomla tari.
Nga pangon kom ke inem — ac kom ma luk.
2 Ke kom fahsr sasla in kof loal uh, nga fah wi kom,
Ac ke kom fahsr sasla infacl uh, kof uh fah tia afinkomla.
Pacl kom fahsr sasla in e uh, kom fah tia folla.
Ac kosran e uh fah tia isikkomyak.
3 Tuh nga LEUM GOD lom,
God mutal lun Israel, su molikomla.
Nga aksukosokyekomla, ac nga sang acn Egypt,
Ethiopia ac Seba in molikomla.
4 Nga fuhleak mutunfacl puspis in molela moul lom,
Mweyen kom saok sik
Ac mweyen nga lungse kom ac akfulatye kom.
5 Nimet sangeng — nga wi kom!
“Liki acn loesla nu kutulap ac roto,
Nga ac folokonma mwet lom nu yen selos.
6 Nga ac fahk nu sin acn epang in fuhlelosla,
Ac nu sin acn eir in tia sruokolos.
Lela mwet luk in foloko liki fahl loessula,
Liki acn nukewa fin faclu.
7 Elos mwet luk,
Ac nga oralosla in akyokye wolana luk.”
Israel Pa Mwet Loh Lun LEUM GOD
8 God El fahk,
“Pangoneni mwet luk nu in nien nununku.
Oasr mutalos, tusruktu elos tia liye;
Oasr sraclos, a elos tia lohng!
9 Pangon mutunfacl uh in tuku nu ke nununku.
Ya ma sruloala lalos ku in palye ma ac sikyak ke pacl fahsru?
Su selos fahkak meet ma sikyak in pacl inge?
Elos in sifacna use mwet loh lalos
In tuh akpwayei kas lalos,
Ac in akkeye ma elos fahk an.
10 “Mwet Israel, kowos mwet loh luk;
Nga sulekowosla tuh kowos in mwet kulansap luk,
Ac tuh kowos in eteyu ac lulalfongiyu,
Ac kowos in kalem kac lah nga God sefanna.
Wangin pac sie god sayuk;
Nuna wangin oemeet me — ac fah wangin pac nwe tok.
11 “Nga mukena pa LEUM GOD,
Nga mukena pa ku in molikowosla.
12 Nga tuh fahkak meet ma ac fah sikyak,
Na nga tuku in kasrekowos.
Wangin god lun mutunfacl saya nu oru ouiya inge;
Kowos mwet loh luk.
13 Nga pa God, inge ac nwe tok.
Wangin mwet ku in kaingla liki ku luk;
Ac wangin mwet ku in ekulla ma nga oru.”
Kaingla Liki Babylon
14 God mutal lun Israel, LEUM GOD su molikowosla, El fahk,
“Ke sripowos, nga fah supwala sie un mwet mweun in lain acn Babylon.
Nga fah kunausla mutunpot lun siti we.
Pusren sasa in engan lun mwet we fah ekla nu ke pusren tung.
15 Nga LEUM GOD, God mutal lowos.
Nga orekowosla, mwet Israel, ac nga tokosra lowos.”
16 LEUM GOD El tuh orala innek soko sasla in meoa uh,
Soko inkanek ma sasla in kof lulap.
17 El kolla sie un mwet mweun kulana nu ke ongoiya,
Un chariot ac horse puspis
Elos putatla, ac tiana ku in sifil tuyak.
Moul lalos wanginla, oana firir lun sie lam ma kuniyukla!
18 Tusruktu LEUM GOD El fahk,
“Nimet sripsripla nu ke ma sikyak in pacl somla,
Ku sruokyana ma sikyak meet ah.
19 Tupanang ma na sasu se nga ac oru.
Mutawauk tari — kowos ku in liye inge.
Nga ac oru soko inkanek sasla yen mwesis,
Ac orala in oasr infacl in acn musrasra.
20 Kosro lemnak uh ac fah akfulatyeyu;
Jackal ac ostrich fah kaksakinyu
Ke nga fah oru infacl uh in soror yen mwesis
In sang kof nu sin mwet solla luk.
21 Elos inge nga orala in ma na luk,
Ac elos fah yuk on in kaksak nu sik!”
Ma Koluk Lun Israel
22 LEUM GOD El fahk,
“Tusruktu, Israel, kom totola sik
Ac tiana alu nu sik.
23 Kom tia use sheep nutum in mwe kisa firir lom nu sik.
Kom tia akfulatyeyu ke mwe kisa lom.
Nga tiana akkohsye kom in sapkin ke mwe sang,
Ku aktotoye kom ke nga siyuk mwe keng sum.
24 Kom tia moli mwe keng nu sik
Ac tia pac akenganyeyu ke kiris ke kosro nutum.
A kom aktoasryeyu ke orekma koluk lom;
Kom aktotoyeyu ke ma sutuu ma kom orala.
25 Ne ouinge, nga pa God se su eela ma koluk lom,
Ac nga oru ouinge mweyen nga pa God.
Nga fah tia esam ma koluk lom.
26 “Fahsru kut som nu ke acn in nununku. Srukak mwe tukak lom!
Fahkak sripa nukewa lom in akpwayei lah kom pa suwohs uh!
27 Papa matu tomom oemeet ah*Papa matu tomom oemeet ah: pa sie sin Jacob, Abraham, ku Adam. el orekma koluk,
Mwet kol lom elos orekma koluk lainyu,
28 Ac mwet leum lom aktaekyala acn mutal sik.
Ouinge nga kunausla acn Israel;
Ac nga lela tuh in aklusrongtenyeyuk mwet luk.”