42
Mwet Kulansap Lun LEUM GOD
1 LEUM GOD El fahk,
“Pa inge mwet kulansap luk su nga akkeye —
Sie su nga sulela, ac nga insewowo sel.
Nga nwakulla ke ngunik,
Ac el fah use nununku suwohs nu fin mutunfacl nukewa.Mt 3:17; 17:5; Mk 1:11; Lk 3:22; 9:35 42:1–4; Mt 12:18–21
2 El ac tia wowo ku srukak pusracl,
Ku liksreni sramsram inkanek uh.
3 El fah tia koteya soko loa ma kurula,
Ku konela sie lam ma srik fulac.
El fah use nununku suwohs ac kawil nu sin mwet nukewa.
4 El fah tia fuhleak finsrak lal, ac pulaik lal ac tia munasla;
El fah oakiya nununku suwohs fin faclu.
Facl loessula elos rarala in lohng luti lal.”
5 God El orala kusrao ac asroelik.
El lumahla faclu ac ma nukewa fac.
El sang moul ac momong nu sin mwet nukewa.
Ac inge LEUM GOD El fahk nu sin mwet kulansap lal,Orek 17:24–25
6 “Nga, LEUM GOD, pangon kom ac asot ku nu sum
In liyaung tuh nununku suwohs in orek fin faclu.
Keim nga fah oru sie wuleang yurin mwet nukewa;
Keim nga fah use kalem nu sin mutunfaclu.Isa 49:6; Lk 2:32; Orek 13:47; 26:23
7 Kom ac fah sang liyaten nu sin mwet kun,
Ac aksukosokyalosla su kapir in acn lohsr.
8 “Nga mukena pa LEUM GOD.
Wangin god saya fah ipeis ke wolana luk.
Nga fah tia lela ma sruloala in ipeis ke kaksak ma orek nu sik.
9 Ma nga palye meeta, inge akpwayeiyuk.
Ac inge nga ac fahkak nu suwos ke kutu ma sasu
Meet liki na ma inge ac sikyak.”
Soko On In Kaksak
10 Yuk soko on sasu nu sin LEUM GOD;
On kaksakunul, faclu nufon!
Kaksakunul, kowos su kalkal meoa;
Kaksakunul, ma moul nukewa in kof uh!
Kowos nukewa su muta yen loessula, kowos in wi pac on.
11 Lela yen mwesis ac siti we in kaksakin God;
Lela mwet Kedar in kaksakunul!
Lela mwet su muta in siti Sela
In sasa ke engan liki mangon eol uh!
12 Lela elos su muta in acn loessula
In sang kaksak ac wolana nu sin LEUM GOD!
13 LEUM GOD El illa oana sie mwet mweun watwen;
El akola ac kena tari mweun.
El foloyak ac sala ke sa in katkat;
El fahkak kuiyal in lain mwet lokoalok lal.
God El Wulela In Kasru Mwet Lal
14 God El fahk,
“In pacl na loeloes nga misla ac tiana kas;
Nga tiana topuk mwet luk.
Tusruktu inge pacl luk in mukuila.
Nga wowoyak oana sie mutan su akola in isus.
15 Nga fah kunausla eol ac inging uh,
Ac oru tuh mah ac sak uh in masla.
Nga fah ekulla infacl ke infahlfal uh nu ke acn mwesis,
Ac oru lulu in kof uh in paola.
16 “Nga fah pwen mwet kun luk
ke inkanek ma elos soenna fahsr kac meet.
Nga fah ekulla lohsr lalos nu ke kalem,
Ac oru acn siruprup in fwella ye mutalos.
Nga wulela ouinge,
Ac nga fah taranna in tia sutuela.
17 Elos nukewa su lulalfongi ke ma sruloala,
Su pangon ma orekla ke poun mwet pa god lalos,
Ac fah akmwekinyeyuk ac elos fah tonongla.”
Seakosten Lun Israel
18 LEUM GOD El fahk,
“Porongo, kowos mwet sulohngkas!
Liye akwoya, kowos mwet kun!
19 Ya oasr mwet sulongin yohk liki mwet kulansap luk,
Ku sulohngkas liki mwet utuk kas su nga supu uh?
20 Israel, arulana yohk ma kom liye tari,
A mea kalmac nu sum?
Oasr srem in lohng,
Tuh mea na pwaye kom lohng uh?”
21 LEUM GOD El sie God su kena molela mwet uh.
Ouinge El akfulatye ma sap lal ac luti lal,
Ac El kena mwet lal in wi pac akfulatye ma inge.
22 Tusruktu oasr mwet utyak ac kunausla ma nukewa lun mwet lal.
Kauli elos in acn lohsr ye fohk uh,
Ac wikinyukla elos ke acn in kapir.
Ma lalos uh pisrapasrla ac wapiyukla,
A wangin mwet in molelosla.
23 Su inmasrlowos ac porongo ma inge?
Ya kowos ac ku in mutawauk ingela in lohng akwoya?
24 Su fuhleang Israel nu inpoun mwet pisrapasr uh?
LEUM GOD sifacna, su kut orekma koluk lainul!
Kut tia moul fal nu ke lungse lal
Ku akos mwe luti lal nu sesr.
25 Ke ma inge El lela kut in pulakin ku lun kasrkusrak lal,
Ac sun mwe keok lun mweun uh.
Kasrkusrak lal uh firir oana sie e fin acn Israel nufon,
A kut tiana kalem ke ma sikyak inge.
Wanginna ma kut etala kac.