41
Kas In Akku Lun God Nu Sin Israel
1 God El fahk,
“Misla ac porongeyu, kowos acn loessula!
Akola in fahkak mwe lohngyuk lowos ke pacl in nununku;
Ac fah oasr pacl lowos in kaskas.
Lela kut in tukeni ac konauk lah su kac pwaye se.
2 “Su tuh use mwet leum se inge liki acn kutulap,*mwet leum ... liki acn kutulap: Cyrus, Tokosra Fulat lun Persia — liye Isa 45:1.
Ac oru elan kutangla yen nukewa el fahsr we?
Su sang nu sel kutangla fin tokosra uh ac mutunfacl uh?
Cutlass natul pakelosi oana in kutkut pa elos.
Mwe pisr natul ukwaloselik oana sruen mah in pacl eng uh tuhme.
3 El ukwalos ac fahsrna nu meet tia sensen —
Arulana mui, oru oana elan tiana pusral infohk uh!
4 Su oru ma inge in sikyak uh?
Su wotela ma in sikyak ke fwil nu ke fwil?
Nga, LEUM GOD, nuna oasr oe ke mutawauk me,
Ac nga, LEUM GOD, fah oasr pac ke saflaiya.
5 “Mwet yen loessula elos liye tari ma nga orala;
Elos tuninfongla ac rarrar ke sangeng.
Ouinge elos nukewa tukeni tuku.
6 Mwet pisrla in orekma elos akasrui ac akkeye sie sin sie.
7 Mwet kamtu el fahk nu sin mwet orekma ke gold, ‘Wona orekma lom an!’
Mwet se su akfwelye ma sruloala se
El akkeye el su folsani nu sie.
Elos fahk, ‘Wona fulusyen osra ingan!’ —
Na elos patkeni ma sruloala sac nu yen se.
8 “Tusruktu kowos, mwet Israel, su mwet kulansap luk,
Fwilin tulik natul Abraham, mwet kawuk luk,
Kowos pa nga sulela uh.2 Chr 20:7; Jas 2:23
9 Nga uskowosme liki acn loeslana faclu;
Nga pangonkowosme liki eng akosr lun faclu,
Ac fahk nu suwos, ‘Kowos mwet kulansap luk.’
Nga tiana siskowosla, a nga sulekowosla.
10 Nimet sangeng — nga wi kowos!
Nga God lowos — nimet lela kutena ma in aksangengye kowos.
Nga fah kasrekowos ac oru kowos in ku;
Nga fah loangekowos ac moli kowos.
11 “Elos su kasrkusrak suwos ac fah
Kutangyukla ac mwekinla.
Elos su mweun lain kowos fah misa,
12 Ac elos fah wanginla liki faclu.
13 Nga LEUM GOD lowos;
Nga akkeye kowos ac fahk nu suwos,
‘Nik kowos sangeng; nga fah kasrekowos.’ ”
14 LEUM GOD El fahk,
“Israel, kom finne srik ac munas,
Nik kom sangeng; nga fah kasrekom.
Nga, God mutal lun Israel, nga pa ac molikomla.
15 Nga fah oru kom in oana sie ipinsak in kulkul wheat
Ma oasr wihs sasu ac kosroh kac.
Kom fah koe eol uh ac kunausla;
Inging uh ac fah mokutkuti.
16 Kom fah sisak kutkut uh nu yen engyeng uh
Ac eng uh ac okla,
Na paka ac fah sisalik.
Na kom fah engan mweyen nga God lom;
Kom fah kaksakinyu, God mutal lun Israel.
17 “Ke pacl mwet luk oasr enenu lalos ke kof
Ac kapinsrulyalos paola ke malu,
Na nga, LEUM GOD, fah topuk pre lalos.
Nga, God lun Israel, fah tiana som lukelos.
18 Nga fah oru infacl uh in soror inmasrlon inging turangang,
Ac unon in kof in kahkkak infahlfal uh.
Nga fah ekulla yen mwesis nu ke lulu in kof
Ac acn pulamlam nu ke unon in kof.
19 Nga fah oru sak cedar in kapak yen mwesis
Wi pac sak acacia, myrtle, ac olive.
Insak lulap ac fah kapak in acn turangang,
Ac sak pine, juniper, ac cypress puspis ac fah kap we.
20 Mwet uh ac fah liye ma inge ac etu lah
Nga, LEUM GOD, pa oru.
Elos ac kalem kac lah
God mutal lun Israel pa oru ma inge nukewa.”
LEUM GOD El Lain God Sutuu
21 Pa inge ma LEUM GOD, tokosra lun Israel, El fahk:
“Kowos god lun mutunfacl uh, fahsru fahkak mwe tukak lowos,
Ac use mwe akpwaye nukewa ma oasr yuruwos!
22 Fahsru ac palye lah mea ac sikyak
Kut in mau etu ke ac sikyak uh.
Fahkak ye mutun mwet nununku ma sikyak in pacl somla
Na fahk nu sesr lah mea kalmac.
23 Fahk nu sesr ma ac sikyak in pacl fahsru,
Na kut fah etu lah pwaye kowos god!
Oru kutu ma wo an, ku use kutu mwe lokoalok an
Ma kut ac lut ku sangengla kac!
24 Kowos arulana wangin sripa, ac wangin ma kowos ku in oru!
Mwet nukewa su alu nu suwos elos mwe srungayuk!
25 “Nga sulela mukul se su muta in acn kutulap!†mukul se ... in acn kutulap: liye Isa 41:2.
Nga fah usalu elan mweun epang me.
El ac futungya mwet leum uh oana fohk furarrar uh,
In oana ke sie mwet orek ahlu fohk el futung fohk kle.
26 Su suwos palyeak lah ma inge ac sikyak,
Tuh kut fah ku in fahk lah pwaye sum?
Tiana sie suwos fahkla sie kas kac —
Wangin mwet lohng kowos fahkla kutena ma!
27 Nga, LEUM GOD, pa fahk emeet pweng se inge nu sin Zion.
Nga supwala sie mwet utuk kas nu Jerusalem in fahk,
‘Mwet lom elos tuku! Elos foloko nu yen selos!’
28 Ke nga suk inmasrlon god uh,
Tia sie selos oasr ma se in fahk;
Wangin sie selos ku in topuk ma nga siyuk.
29 Wangin sripen god inge nukewa;
Wangin na pwaye ma elos ku in orala.
Ma sruloala inge munas ac wangin ku lalos.”