46
Kutangyukla Egypt In Acn Carchemish
1 LEUM GOD El kaskas nu sik ke mutunfacl pus, 2 mutawauk ke facl Egypt. Pa inge ma El fahk ke un mwet mweun lal Tokosra Neco lun Egypt, su Tokosra Nebuchadnezzar lun Babylonia el kutangla in acn Carchemish, apkuran nu Infacl Euphrates in yac se akakosr ma Jehoiakim el tokosra lun Judah:46:2–26; Isa 19:1–25; Ezk 29:1—32:32
3 “Mwet fulat lun Egypt elos wowoyak ac fahk,
‘Akola mwe loeyuk nutuwos,
Ac fahsryang nu ke mweun!
4 Tamla osra nutuwos!
Nokomang nuknuk ac susu in mweun lowos!
Akoela horse nutuwos, sroang nu faclos,
Ac takla ke lain lowos an!’
5 LEUM GOD El siyuk, “Ku mea nga liye uh?
Elos tuninfongla ac forla folok.
Mwet mweun lalos kutangyukla;
Elos sangengla ac kaing ke kuiyalos,
Ac elos tia tapulla.
6 Finne mwet ma mui ke kasrusr, elos tia ku in kaingla;
Mwet watwen in mweun tia pac ku in kaingla.
In acn epang, sisken Infacl Euphrates,
Elos tukulkul ac ikori.
7 Su sronoti oana Infacl Nile inge,
Oana soko infacl sronoti ac nwakla pefacl uh?
8 Egypt pa sronoti oana Infacl Nile,
Oana soko infacl sronoti ac nwakla pefahl uh.
Egypt el fahk, ‘Nga fah sronoti ac afunla faclu;
Nga fah kunausla siti puspis, wi mwet muta we.
9 Sap horse uh in som,
Ac chariot uh in kasrusr!
Supwalik mwet mweun uh:
Mukul ma tuku Ethiopia ac Libya me, su utuk mwe loeyuk,
Ac mwet sasla ke pisr ma tuku Lydia me.” ’
10 Pa inge len lun LEUM GOD Fulat ac Kulana:
Sie len in foloksak;
Misenge El fah kalyei mwet lokoalok lal.
Cutlass natul ac fah kangulosla nwe ke na kihpi,
Ac nim srah kaclos nwe ke sun lungse lal.
Misenge El su Kulana El oru sie kisa ke mwet ma El uniya
In acn epang, sisken Infacl Euphrates.
11 Mwet Egypt, kowos fahla nu Gilead
Ac sukok ono!
Kalem tari lah wangin sripen ono lowos;
Wangin ma ku in unwekowosla.
12 Mutunfacl pus lohng ke mwekinla lowos;
Mwet nukewa elos lohng ke kom tung.
Sie mwet mweun el tukulkul ac ikori fin sie pac,
Na eltal kewa putatla infohk uh.
Tuku Lal Nebuchadnezzar
13 Ke Tokosra Nebuchadnezzar lun Babylonia el tuku in mweuni facl Egypt, LEUM GOD El kaskas nu sik, ac fahk,Jer 43:10–13
14 “Sulkakin in siti Egypt inge,
In Migdol, Memphis ac Tahpanhes:
‘Akola in sifacna loangekowos;
Ma lowos nukewa ac fah musalla ke mweun!
15 Efu ku Apis, god ku lowos, el ikori?
Mweyen LEUM GOD El sringlilya!
16 Mwet mweun lowos elos tukulkul ac ikori;
Kais sie fahk nu sin mwet wial,
‘Sulaklak! Kut som nu yurin mwet lasr in acn sesr
Ac kaingkunla cutlass nutin mwet lokoalok lasr inge!’
17 “Sang ine sasu se inge lun tokosra lun Egypt,
‘Wowon Wel Ac Wangin Ma Oru.’
18 Nga, LEUM GOD Kulana, nga tokosra.
Nga pa God moul.
Oana ke Eol Tabor pa fulat inmasrlon eol uh,
Ac Eol Carmel tuyak fulat sisken meoa uh,
Ac fah ouinge ku lun el su ac fah mweuni kowos.
19 Kowos mwet Egypt,
Apweni! Ac utukla kowos nu in sruoh!
Siti Memphis ac fah ekla sie acn mwesis,
Sie acn sikiyukla ma wangin mwet muta we.
20 Egypt el oana soko cow mutan kato finsroa,
Ma ngalisyuk sin sie loang ngalngul kutulap me.
21 Finne mwet ma el moli nu se in kasrel ke mweun
Wanginna sripalos, oana cow fusr uh.
Elos tia tuyak mweun,
A elos nukewa forla kaing.
Len in ongoiya nu selos summa;
Pacl in kunausyukla elos.
22 Egypt el kaing, musiksikla oana wet soko
Ke un mwet lokoalok uh sikme.
Elos mweunel ke tuhla,
Oana mwet pakpuk sak
23 Su kunausla insak matol.
Mwet lalos arulana pusla, tia ku in oekyukla;
Mwet mweun lalos pus liki u lulap ke locust.
24 Akmwekinyeyukla mwet Egypt;
Kutangyukla elos sin mwet epang.
Nga, LEUM GOD, pa fahk ma inge.”
25 LEUM GOD Kulana, God lun Israel, El fahk, “Nga ac kai Amon, god lun acn Thebes, wi Egypt ac god nukewa ac tokosra nukewa we. Nga ac eisal tokosra lun Egypt ac elos nukewa su filiya lulalfongi lalos in el, 26 ac eisalosyang nu selos su kena onelosi — nu sel Tokosra Nebuchadnezzar lun Babylonia ac un mwet mweun lal. Tusruktu tok, mwet uh ac fah sifilpa muta Egypt, oana ke elos tuh oru in pacl somla. Nga, LEUM GOD, pa fahk ma inge.
LEUM GOD El Fah Molela Mwet Lal
27 “Mwet luk, nik kowos sangeng;
Mwet Israel, nik kowos tuninfongla.
Nga fah molikowos liki facl loessula ingan,
Liki acn ma kowos mwet sruoh we.
Kowos fah foloko nu yen suwos ac muta in misla;
Kowos ac fah oakwuki in misla, ac wangin mwet fah oru kowos in sangen.46:27–28; Jer 30:10–11
28 Nga fah tuku nu yuruwos ac molikowosla.
Nga fah kunausla mutunfacl nukewa
Ma nga akfahsryekowoselik nu we,
A nga fah tia kunauskowosla.
Tusruktu nga fah tia lela kowos in som ke wangin kaiyuk nu suwos;
Ke pacl se nga ac kai kowos, nga fah oru in fal.
Nga, LEUM GOD, pa fahk ma inge.”