5
Sie Pre In Siyuk Ke Pakomuta
O LEUM GOD, esam ma sikyak nu sesr.
Liye kut, ac liye lupan mwekinla lasr.
 
Acn sesr uh oan inpoun mwet saya;
Ac mwetsac elos muta in lohm sesr.
 
Papa tumasr elos anwuki sin mwet lokoalok,
Ac inge nina kiasr elos katinmas.
 
Kut enenu in moli kof nimasr;
Ac kut moli pac etong nu ke enenu lasr.
 
Kumakinyuk kut upa, oana donkey ku camel;
Kut totola, a tia lela nu sesr in mongla.
 
Kut ngusr mongo sin Egypt ac Assyria,
In suk moul lasr.
 
Mwet matu lasr elos tuh orekma koluk, tusruktu inge elos wanginla,
Ac akkeokyeyuk kut ke ma koluk lalos.
 
Mwet ma oana mwet foko uh elos leumi kut,
Ac wangin mwet ku in molikutla liki ku lalos.
 
Mwet akmas oalik yen nukewa;
Kut pilesrala sensen lasr ke kut ac suk mongo nasr.
 
10 Masrinsral lasr oru manosr folla ke fever,
Nwe ke na kulun manosr fol oana funyu se.
 
11 Sruinkuiyuk mutan kiasr Fineol Zion sifacna,
Oayapa mutan fusr natusr in siti srisrik nukewa in acn Judah.
 
12 Mwet kol lasr utukla ac loksakeyuki;
Ac mwet matu lasr tiana akfulatyeyuk.
 
13 Mukul fusr lasr akkohsyeyuk in ilil wheat,
Ac tulik srisrik natusr sringelik ye kahp in etong uh.
 
14 Mwet matu elos tila muta ke mutunpot in siti uh,
Ac mwet fusr elos tila orek on.
 
15 Wanginla engan ke moul lasr;
Pacl in tacn lasr uh ekla pacl in asor.
 
16 Wangin ma lula ke ma nukewa kut yukin meet ah.
Kut orekma koluk, ac inge kut muta in ongoiya lulap.
 
17 Kut maskunak nunak lun insiasr
Ac tia ku in liye wo ke sroninmutasr,
 
18 Mweyen Eol Zion el mukelana oan ac wanginla mwet we,
Ac kosro jackal lemnak uh tiltil fin mahnum in acn we.
 
19 Tusruktu kom, O LEUM GOD, kom tokosra ma pahtpat,
Ac kom fah leumi nwe ke saflaiyen pacl uh.
 
20 Efu ku kom siskutla arulana pahtlac?
Ya kom ac tiana sifilpa esam kut?
 
21 Folokinkutwot nu yurum, LEUM GOD! Folokinkutwot!
Folokonak wolana lasr meet ah.
 
22 Ku fuka, kom siskutla na nwe tok?
Ya wanginna saflaiyen kasrkusrak lom uh?