4
Tukun Kunausyukla Acn Jerusalem
1 Gold saromrom lasr arulana ohkla;
Eot ke Tempul oalik na inkanek uh.
2 Mukul fusr lun Zion elos tuh saok sesr oana gold,
A inge pilesreyuk elos oana tup ma orek ke fohk kle.
3 Finne kientop in wolf soko el ac katitii ma fusr natul,
Tusruktu mwet luk elos sulallal nu sin ma fusr natulos, oana won ostrich uh.Job 39:13–17
4 Elos fuhlela tulik fusr natulos in misa ke masrinsral ac malu;
Tulik uh ngusr mwe mongo, a wangin mwet ac sang nu selos.Eok 2:11–12
5 Mwet ma kang mwe mongo na yuyu meet elos misa fin inkanek uh ke masrinsral;
Elos su tohfla in kasrup la elos iluhsya pus uh in sukok mwe mongo.
6 Mwet luk elos kalyeiyuk upa liki na mwet ma tuh muta Sodom,
Su sun ongoiya ke God El tuh kunausla acn we ke kitin pacl na srisrik.Gen 19:24
7 Fisrak natusr elos tuh tiana akfohkfokyeyukla, ac elos nasnas oana snow;
Wasri ac ku, saromrom finsroalos ke kuiyen manolos.
8 Inge elos misa oan ke inkanek uh, tia akilenyuk elos ke sripen sroalsroalla mutalos.
Kolo kaclos pulamlamla oana sak, ac arosrosak oan fin sri kaclos.
9 Wo nu selos su anwuki ke mweun liki elos su misa tok,
Su wangin mwe mongo in sruokya moul lalos, pwanang elso misa ke masrinsral.
10 Ongoiya se ma sun mwet luk inge oru sie mwe aksangeng na lulap;
Nina ma saokkin tulik natulos, elos poeleak tulik natulos sifacna mwe mongo.Dut 28:57; Ezk 5:10
11 LEUM GOD El okoama nufon fulen kasrkusrak lal;
El akosak sie e in Zion su esukak acn we nwe ke mwesri oan infohk uh.
12 Wangin sie mwet in kutena acn, finne mwet leum lun mutunfacl saya,
Tuh lulalfongi mu oasr mwet mweun ku in utyak ke mutunpot lun Jerusalem.
13 Tusruktu ma inge sikyak, mweyen mwet palu we elos orekma koluk, ac mwet tol uh oasr mwatalos
Ke elos pwanang misa lun mwet wangin mwata.
14 Mwet kol lun acn we elos foroht forma inkanek uh oana mwet kun.
Elos arulana srahfon, oru wangin mwet lungse pusralulos.
15 Mwet ah wowoyak ac fahk, “Tiok! Komtal fohkfok! Nimet pusralyu!”
Ouinge elos takusrkusr som liki mutunfacl nu ke mutunfacl, a wangin mwet lohang nu selos.
16 Wanginla nunak lun LEUM GOD kaclos; El sifacna luseloselik.
Wangin nunak lal ke mwet tol ac mwet kol lasr.
17 Kut sukok kasru nwe wanginla ku lasr in sifilpa suk, a wanginna kasru tuku nu sesr.
Kut tupanna mu mutunfacl se ac tuku kasrekut, a tiana tuku.
18 Mwet lokoalok lasr elos tawi kut; kut tiana ku in forfor innek uh.
Len lasr uh safla; pacl safla lasr uh tuku tari.
19 Elos ukwekuti, mui liki ke eagle uh ac pwesrouli nu facsr lucng me uh.
Elos lol acn kut fahsr we fin inging uh, ac kasriki kut ac sruokkuti in acn mwesis.
20 Elos sruokya kuiyen moul lasr, aok tokosra su LEUM GOD El sulela;
El su kut tuh lulalfongi mu ac langoekut liki kutena mwet ma ac utyak in mweuni kut uh.
21 Mwet Edom ac mwet Uz, kowos in israsr na; engan ke srak oasr pacl in engan lowos uh.
Pacl in ongoiya lowos ac fah tuku pac; kowos ac fah koflufolla ac tukulkulwot tukulkulme ke mwekin.
22 Zion el eis tari molin ma koluk lal; LEUM GOD El ac tia filikuti in sruoh nwe tok.
Tusruktu mwet Edom, LEUM GOD El ac fah kai kowos; El ac fah akkalemyela orekma koluk lowos.