83
[Psalm lal Asaph]
Pre In Siyuk In Kutangyukla Mwet Lokoalok Lun Israel
1 O God, nik kom misla,
Nik kom sukas ac tia sramsram.
2 Liye! Mwet lokoalok lom elos alein,
Ac elos su srungakom elos orek fohs.
3 Elos orek pwapa lukma in lain mwet lom;
Elos pwapa in lainulos su kom karingin.
4 Elos fahk, “Fahsru, lela kut in kunausla mutunfacl selos,
Tuh inen Israel in mulkinyukla nwe tok.”
5 Elos insese ke pwapa lalos
Ac tukeni orala oakwuk se in lain kom.
6 Elos mwet Edom ac mwet Ishmael,
Mwet Moab ac mwet Hagar,
7 Mwet Gebal, Ammon ac Amalek,
Ac mwet Philistia ac Tyre.
8 Mwet Assyria oayapa welulosyang,
Elos arulana asruoki ku nu sin mwet Ammon ac mwet Moab, su ma in fwil natul Lot.
9 Oru nu selos oana kom tuh oru nu sin mwet Midian,
Ac nu sel Sisera ac Jabin sisken Infacl Kishon.Mwet Nun 7:1–23; Mwet Nun 4:6–22
10 Kom kutangulosla in acn Endor,
Ac manolos kulawi fin fohk uh.
11 Oru nu sin mwet kol lalos oana kom tuh oru nu sel Oreb ac Zeeb.
Kutangla mwet kol lalos nukewa, oana ma sikyak nu sel Zebah ac Zalmunna,Mwet Nun 7:25; Mwet Nun 8:12
12 Su tuh fahk, “Acn inge, su ma lun God,
Kut ac eisla lasr.”
13 O God, siseloselik oana kutkut —
Oana kulun wheat su ukukla ke eng uh.
14 In oana ke e uh esukak insak uh,
Ac furreak eol uh,
15 Ukwalosyak ke paka lom,
Ac aksangengyalos ke eng upa lom.
16 O LEUM GOD, afinya mutalos ke mwekin,
Ac oru tuh elos in akfulatye ku lom.
17 Lela elos in kutangyukla ac sangengla nwe tok.
Lela misa lalos in sie mwe mwekin lulap.
18 Lela elos in etu lah kom mukena pa LEUM GOD—
Kom pa Leum fulatlana fin faclu nufon.