84
[Psalm Lun Tulik Natul Korah]
Kena Muta In Lohm Sin God
1 Yoklana lungse luk nu ke Tempul lom, O LEUM GOD Kulana!
2 Nga kena ma lulap in muta we.
Ngunik asroela ac mulalla ke nunkeyen inkul sin LEUM GOD.
Ke insiuk ac kuiyuk nufon nga on ke engan
Nu sin God moul.
3 Finne won sparrow elos orala ahng lalos we,
Ac won swallow elos konauk sie acn selos.
Elos karingin won fusr natulos apkuran nu ke loang lom,
O LEUM GOD Kulana, Tokosra luk ac God luk.
4 Fuka lupan engan lalos su muta in Tempul lom.
Elos on ac kaksakin kom pacl e nukewa.
5 Fuka lupan insewowo lun mwet su ku lalos tuku sum me,
Su kena oru fufahsryesr lalos nu Fineol Zion.
6 Ke elos fahsr sasla infahlfal pao in Baca,
Acn we ekla nu ke sie acn oasr unon we,
Ac ke pacl in af uh, sessesla acn uh ke lulu in kof.
7 Ke elos fahsr, ku lalos yokyokelik,
Ac elos ac fah liye God lun god uh in Zion.
8 Lohng pre luk, O LEUM GOD Kulana.
Porongeyu, O God lal Jacob.
9 Akinsewowoye tokosra lasr, O God —
Tokosra se su kom sulela.
10 In muta len sefanna in lohm sum
Wo liki na in muta ke tausin len in kutena acn saya.
Nga lungse in tu na ke mutunpot in lohm sin God luk
Liki na nga in muta in lohm sin mwet koluk.
11 LEUM GOD El mwe loeyuk lasr ac Tokosra wolana lasr,
Su akinsewowoye kut ke lungkulang ac sunak.
El tiana sruokya kutena ma wo
Lukelos su oru ma suwohs.
12 LEUM GOD Kulana, fuka lupan insewowo lalos su lulalfongi kom!