9
Nununkeyuk Mutunfacl Atulani
1 Pa inge kas in sulkakinyuk sin LEUM GOD:
El orala tari sie sap fulat lal in kalyei acn Hadrach ac siti Damascus. Tia sruf lun Israel mukena pa ma lun LEUM GOD, a siti fulat se lun acn Syria ma pac lal.Isa 17:1–3; Jer 49:23–27; Amo 1:3–5 9:1–4; Isa 23:1–18; Jol 3:4–8; Amo 1:9–10; Mt 11:21–22; Lk 10:13–14 2 Acn Hamath, su masrol nu Hadrach, oayapa siti lun Tyre ac Sidon wi kain in usrnguk nukewa yorolos, ma pac lal. 3 Acn Tyre musaela mwe akkeye pot ku lal, ac yohk pac silver ac gold lal, oru pilasr oana puk weacn uh. 4 Tusruktu LEUM GOD El ac fah eisla ma inge nukewa. El ac fah sisla mwe kasrup lun acn we nu in meoa uh, ac siti sac ac fah firirla nu infohk uh.
5 Siti Ashkelon ac fah liye ma inge ac sangeng. Ac siti Gaza ac fah liye ac keok ke waiok lulap. Acn Ekron ac fah liye pac, ac ma nukewa el finsrak nu kac ac wanginla nufon. Tokosra lun Gaza ac fah anwuki, ac Ashkelon ac fah wanginla mwet we.9:5–7; Isa 14:29–31; Jer 47:1–7; Ezk 25:15–17; Jol 3:4–8; Amo 1:6–8; Zep 2:4–7 6 Kain in tafun mwet puspis fah muta in Ashdod. LEUM GOD El fahk, “Nga fah akpusiselyela mwet inse fulat lun acn Philistia inge. 7 Elos ac tia sifil kang ikwa ma srakna srahsra, ku kutena kain mwe mongo saya ma tia lela in mongo. Mwet nukewa ma painmoulla uh ac fah wela mwet luk, ac elos fah oana sie sou in sruf lun Judah. Ekron ac fah wela pac mwet luk, oana ke mwet Jebus*mwet Jebus: mwet inge pa muta Jerusalem meet liki David el kutangla acn we. Tok elos muta ye ku lal David. elos tuh oru meet ah. 8 Nga fah liyaung acn sik, ac karingin tuh mwet mweun in tia fahsr sasla fin acn uh. Nga ac fah tia lela mwet kol sulallal in sifilpa akkeokye mwet luk. Nga liye tari lupan keok lun mwet luk.
Tokosra Lun Pacl Fahsru
9 Enganak! Kowos mwet Zion, enganak!
Sasa ke engan, kowos mwet Jerusalem!
Liye, tokosra lowos el tuku nu yuruwos!
El tuku ke ku lulap ac kutangla,
Tusruktu el pusisel ac el muta fin soko donkey —
Aok, fin soko donkey fusr.Mt 21:5; Jn 12:15
10 LEUM GOD El fahk,
“Nga fah sisla chariot in mweun liki Israel,
Ac eisla horse uh liki Jerusalem;
Mwe pisr su orekmakinyuk ke mweun ac fah kunausyukla.
Tokosra lowos el ac fah orek misla inmasrlon mutunfacl;
El fah leumi liki sie meoa nu ke sie pac meoa,
Mutawauk Infacl Euphrates lac nwe ke saflaiyen faclu.”Psa 72:8
Sifilpa Folokyak Lun Mwet Lun God
11 LEUM GOD El fahk,
“Ke sripen wuleang luk yuruwos,
Su tuh akkeyeyukla ke srah lun mwe kisa uh,
Nga fah aksukosokye mwet lowos —
Liki luf lun sruoh, su oana sie lufin kof ma wangin kof loac.Exo 24:8
12 Foloko, kowos mwet sruoh su oasr finsrak yoro in pacl inge uh;
Foloko nu yen suwos, yen kowos ac moul in misla we.
Inge nga fahk nu suwos tuh nga fah sifil folokin nu suwos mwe insewowo pacl luo yohk liki,
Ke sripen ma nukewa kowos tuh keok kac.
13 Nga fah orekmakin Judah oana sie mwe pisr nutin sie mwet mweun,
Ac Israel oana soko sukan pisr.
Nga fah orekmakin mwet mukul in Zion oana sie cutlass,
In mweuni mwet Greece.”
14 LEUM GOD El ac fah sikyak lucng liki mwet lal,
Ac pisrik sukan pisr natul oana sarom uh.
LEUM GOD Fulatlana El fah ukya mwe ukuk;
El ac fah tuku in ku lal in sie paka liki acn eir.
15 LEUM GOD Kulana El ac fah loangela mwet lal,
Ac elos ac fah kunausla mwet lokoalok lalos.
Elos ac fah sasa in mweun oana mwet sruhi uh,
Ac elos fah aksororyela srahn mwet lokoalok lalos.
Ac srah uh ac fah soror oana srah in sie mwe kisa,
Su okwoki nu fin loang uh in sie pol!
16 Ke len sac ac tuku uh, LEUM GOD El ac fah molela mwet lal,
Oana ke sie mwet shepherd el molela un kosro natul liki mwe sensen uh.
Elos ac fah saromrom in acn sel
Oana wek saok ke sie tefuro.
17 Ac fuka lupan wo ac oasku lun acn sac!
Mwet fusr ac fah kapak ac fokokoi ke wheat ac wain lun acn we.
9:1 Isa 17:1–3; Jer 49:23–27; Amo 1:3–5
9:1 9:1–4; Isa 23:1–18; Jol 3:4–8; Amo 1:9–10; Mt 11:21–22; Lk 10:13–14
9:5 9:5–7; Isa 14:29–31; Jer 47:1–7; Ezk 25:15–17; Jol 3:4–8; Amo 1:6–8; Zep 2:4–7
*9:7 mwet Jebus: mwet inge pa muta Jerusalem meet liki David el kutangla acn we. Tok elos muta ye ku lal David.