1 JOHN
Tahi Lede a John
Di haga modongoohia:
I lodo Tahi lede a John nia mee llauehe e lua no lodo: (1) E hagamahi ang gi digau ala e dau di beebaa deenei gi mouli hagadaubuni ang gi God mo dana Dama go Jesus Christ. (2) E bule digaula gi de daudali nia agoago tilikai ala ga hagahuaidu di hagadaubuni deenei. Nia agoago tilikai aanei ne daamada mai di agoago dela e hai boloo: Di huaidu gaa hana gi lodo tangada dela e buni anga gi henuailala, dela ne hidi ai bolo Jesus go Tama a God digi hai tangada henuailala. Digau ala e agoago nia agoago aanei e helekai boloo: Tangada ma ga haga mouli la hagalee haga dahidaamee dono mouli i henuailala nei, gei digaula e agoago labelaa boloo: Di haga mouli o tangada la hagalee go nia mee aanei: Nia hangaahai donu be hai gee, be go di aloho ang gi tangada dela i dono baahi.
Idimaa John e hai baahi gi nia agoago aanei, geia e helekai aga e haga modongoohia bolo Jesus guu hai tangada, gei e hagamaaloo aga labelaa bolo digau huogodoo ala e hagadonu a Jesus mo di aloho i God, la koia e hai loo gi hagadau aaloho i nadau mehanga.
Di hagahonu di beebaa deenei:
Di haga modongoohia (1.1-4)
Di maalama mo di bouli (1.5—2.29)
Nia dama a God mo nia dama a Setan (3.1-24)
Di tonu mo tilikai (4.1-6)
Nia hegau o di aloho (4.7-21)
Di hagadonu dela e aali (5.1-21)
1
Nnelekai o di mouli
1 Gimaadou e hihi adu gi goodou i di hai o Nnelekai di mouli dela nogo noho mai taamada loo. Gimaadou gu longono di maa, gu gidee. Uaa, gimaadou guu mmada, guu bili gi Mee.*John 1.1 2 Di mouli deenei gu gila aga, ge gu mmada ginai gimaadou, gei gimaadou e helekai i di maa, ge e agoago adu gi goodou di mouli dee odi, dela gu i baahi o Tamana, dela gu haga modongoohia mai gi gidaadou.*John 1.14 3 Madau mee ne mmada ge ne hagalongo gi Mee, aanei madau mee e hagi adu gi goodou, bolo goodou gi madalia gimaadou e buni anga gi God mo dana Dama go Jesus Christ. 4 Gimaadou e hihi nia mee aanei, bolo gii dohu dogomaalia ai tadau tene.
God go di maalama
5 Gimaadou e agoago adu gi goodou di agoago deenei, dela gu longono ai gimaadou mai baahi Tama a God, boloo: God la go di maalama, di bouli i dono baahi ai. 6 Maa gidaadou ga helekai boloo, “Gidaadou e buni anga gi Mee”, gei gidaadou e heehee hua i lodo di bouli, gei tadau helekai mo tadau hangaahai le e tilikai. 7 Maa gidaadou ga heehee i lodo di maalama, gadoo be Mee dela e noho i lodo di maalama, malaa, gidaadou gu hagadaubuni, gei nia dodo o dana Dama go Jesus ga haga madammaa tadau huaidu huogodoo.
8 Maa gidaadou ga helekai boloo, “Gidaadou tadau huaidu ai”, gidaadou le e bida halahalau hua gidaadou, gei di tonu hogi la hagalee i tadau baahi. 9 Maa gidaadou ga hagi anga gi God tadau huaidu, gei Mee ga haga gila aga dana hagababa, gaa hai di mee dela e donu, ga haga madammaa tadau huaidu. 10 Maa gidaadou ga helekai boloo, “Gidaadou tadau huaidu ai,” malaa, gidaadou e haga tilikai a God, ge ana helekai hogi la hagalee i tadau baahi.