2
Si Isa Almasi yang Pondasyon ng mga Sakop ng Tohan
1 Adon, sabap ng yamabago da kamo dait na biyaan da mayo yang kariko ng maat na ininang mayo. Ayaw da kamo mamakak atawa maglimbong. Ayaw kamo magniyat ng maat sang kapagonawa mayo. Ayaw oman kamo magkasina atawa maglaong ng maat makapantag sang kadaigan. 2 Awgaid dakowa gao yang karim mayo sang pyaglaongan ng Tohan magonawa ng kamokan na yabay marim somoso, antak magkatigsun yang pagpangintoo mayo sampay na amangkun mayo yang komplito na kalowasan. 3 Kay kyakatigaman da mayo na labi na madyaw yang Tagallang.
4 Na, pagdood kamo kang Tagallang Isa na pyagasikunan ng kinabowi. Magonawa yan ng bato na titimbag ng mga panday kay way kono kapantagan. Awgaid pipili yan ng Tohan aw labi na barapantag yan adto kanan. 5 Kamo oman na yatagan ng bago na kinabowi, magonawa kamo ng mga bato na agamitun ng Tohan sang pagpaindug ng baay na pyagauyaan ng Nyawa ng Tohan. Aw magonawa ng mga imam na pipili ng Tohan makapasampay da kamo adto sang Tohan ng akasowatan*2:5 Yang apasampay ng mga yamangintoo sang Almasi adto sang Tohan yang kanilan kinabowi, yang kanilan pagpanginsokor aw pagpoji kanan aw yang pagtabang sang kadaigan. Tanawa sang Kitab Injil, Roma 12:1 aw Hibrani 13:15-16. nan na atarimaun nan sabap kang Isa Almasi. 6 Kay aon pyaglaongan ng Tohan na yamakasorat sang Kitab, laong nan,
“Aon pipili ko na bato na labi na barapantag
na ininang ko na pyagaindugan ng kanak baay adto sang syodad ng Siyon.
Sino-sino yang yamangintoo kanan,
di na di akasipugan.Ӡ2:6 Yani na ayatan yamakasorat sang Kitab Tawrat, Nabi Isayas 28:16. Yang Siyon sambok na ngaan sang syodad ng Awrosalam.
7 Adon, para kamayo na yamangintoo labi na barapantag yan na bato. Awgaid sang mga otaw na wa apangintoo amatoman yang pyaglaongan ng Tohan na yamakasorat sang Kitab, laong nan,
“Yang bato na titimbag ng mga panday kay way kono kapantagan,
yamainang ng bato na labi na barapantag kay makapaligun sang tibok baay.”‡2:7 Yani na ayatan yamakasorat sang Kitab Jabor 118:22.
8 Aw aon oman yamakasorat na yagalaong,
“Yani na bato yang pyagasabapan ng pagkalogso ng mga otaw,
aw sabap kanan amangkatomba silan.Ӥ2:8 Yani na ayatan yamakasorat sang Kitab Tawrat, Nabi Isayas 8:14.
Na, yamalogso silan kay wa silan apangintoo sang pyaglaongan ng Tohan. Aw idto yang pyagakahanda kanilan.
9 Awgaid kamo, dili kamo ng main nilan. Kay pipili kamo ng Tohan antak mangagad kanan. Magonawa kamo ng mga imam na yagagawbuk para sang Tohan na kanatun soltan. Ininang nan kamo na sambok na bangsa na sotti, mga otaw na sakop nan antak apayapat mayo yang madyaw na mga inang nan. Kyakamang nan kamo sikun sang kaduguuman aw pyapaballin nan kamo adto sang kaamdagan na bali na kadyaw. 10 Sangaong ona dili kamo ng mga sakop ng Tohan, awgaid adon mga sakop da nan kamo. Sangaon wa kamo akaloyi ng Tohan, awgaid adon kyakaloyan da nan kamo.
11 Mga kalomonan, bunna na mga dayo gaid kita ansining donya kay manlabay gaid kita. Agaw, aon pangayoon ko kamayo. Ayaw kamo magpadaa sang maat na napso mayo na yabay gaid magsatsat sang pagpangintoo mayo. 12 Pakitaan mayo yang madyaw na addat mayo sang mga otaw na wa apangintoo. Kay maskin yagalaong silan na maat yang ininang mayo, sang orian akatigaman da nilan na madyaw kadi. Aw ansinyan pojiun nilan yang Tohan sang allaw na magapakita da yan kanatun.
Dait Magpasakop sang mga aon Kapatot
13 Sabap sang pagpangagad mayo sang Tagallang, pangagadi oman mayo yang kariko na aon kapatot adi sang donya. Pangagadi mayo yang soltan na yan yang labaw adi sang kanatun banwa 14 sampay sang mga gobirnador na yatagan nan ng kapatot antak kastigoon yang yagainang ng maat aw bantogon yang yagainang ng madyaw. 15 Kay yani yang karim ng Tohan na sabap sang madyaw na mga inang mayo way akapaglaong na maat makapantag kamayo nidtong mga otaw na magonawa ng sangu kay wa silan akatigam sang kabunnaan. 16 Na, bain kamayo, di da kamo ng allang ng mga otaw kay yatagan da kamo ng Tohan ng kagawasan. Awgaid ayaw mayo paggamita yani na kagawasan mayo sang paginang ng maat. Kondi apakita gao mayo sabap sang madyaw na mga inang mayo na mga allang kamo ng Tohan. 17 Addati mayo yang kariko ng mga otaw aw kaloyi mayo yang mga kalomonan mayo. Kalluki mayo yang Tohan aw addati mayo yang soltan.
Yang Almasi yang kanatun Opamaan
18 Kamo na mga allang, pagpasakop kamo sang mga amo mayo na aon addat kanilan, aw dili gaid sang madyaw na amo kondi maskin oman yang maisug. 19 Kay sawpama apakasikotan kamo abir way dosa na ininang mayo aw pagasabaran mayo inyan sabap ng karim mayo pangagadan yang Tohan, na, atagan kamo ng Tohan ng kadyawan. 20 Awgaid kong kastigoon kamo sabap sang ininang mayo na maat aw pagasabaran mayo inyan, na, way kadyawan mayo san. Awgaid kong magasabar kamo ng kasikot maskin madyaw yang ininang mayo, akasowatan kamo ng Tohan aw aon kadyawan nan kamayo.
21 Na, idto sagaw, kabain sang pagpili kamayo ng Tohan na amagi kamo ng kasikotan. Kay yang Almasi yamagi ng kasikotan sabap kamayo, aw yatagan nan kamo ng opamaan antak mayo sonodon. 22 Yamakasorat sang Kitab yang makapantag kanan,
“Way dosa na ininang nan
aw way maskin ono na pyaglaongan nan na dili ng bunna.”*2:22 Yani na ayatan yamakasorat sang Kitab Tawrat, Nabi Isayas 53:9.
23 Maskin ininsolto yan ng mga otaw, wa yan magabaus ng insolto. Maskin pyapakasikotan yan, wa yan maganiyat ng maat kanilan. Awgaid syasarig nan yang ginawa nan adto sang Tohan na yan yang matorid na maghohokom. 24 Yang Almasi mismo yang yamangkun ng siksa sang kanatun mga dosa nang yamatay yan adto sang kaoy. Ininang nan yani antak di da kita magpadayon sang pagpakadosa awgaid magainang da kita ng matorid. Sabap sang kanan mga pari yamadyaw kita.†2:24 Yang mana ng yamadyaw kita sabap sang kanan mga pari na yampon kita ng Tohan sang mga dosa ta sabap sang pagkamatay ni Isa Almasi. Tanawa sang Kitab Tawrat, Nabi Isayas 53:5-6. 25 Sangaon magonawa kamo ng mga karniro na yamangkatanak kay mawat kamo sang Tohan. Awgaid adon pyapaori da kamo adto sang yagabantay aw yagaatiman kamayo na yan yang Almasi.
*2:5 2:5 Yang apasampay ng mga yamangintoo sang Almasi adto sang Tohan yang kanilan kinabowi, yang kanilan pagpanginsokor aw pagpoji kanan aw yang pagtabang sang kadaigan. Tanawa sang Kitab Injil, Roma 12:1 aw Hibrani 13:15-16.
†2:6 2:6 Yani na ayatan yamakasorat sang Kitab Tawrat, Nabi Isayas 28:16. Yang Siyon sambok na ngaan sang syodad ng Awrosalam.
‡2:7 2:7 Yani na ayatan yamakasorat sang Kitab Jabor 118:22.
§2:8 2:8 Yani na ayatan yamakasorat sang Kitab Tawrat, Nabi Isayas 8:14.
*2:22 2:22 Yani na ayatan yamakasorat sang Kitab Tawrat, Nabi Isayas 53:9.
†2:24 2:24 Yang mana ng yamadyaw kita sabap sang kanan mga pari na yampon kita ng Tohan sang mga dosa ta sabap sang pagkamatay ni Isa Almasi. Tanawa sang Kitab Tawrat, Nabi Isayas 53:5-6.