5
Mga Towada sang mga Pangoo sang Jamaa
1 Adon, kamo na mga pangoo sang jamaa, aon pagalaong ko kamayo. Ako sambok oman na pangoo na yakasaksi sang mga kasikotan na kyakaagian ng Almasi aw makasawit oman ako sang kabantogan nan na apakita sang allaw ng pagbarik nan. 2 Na, pangayoon ko kamayo na atimanun mayo yang mga otaw na syasarig kamayo ng Tohan magonawa ng magbabantayay na yagaatiman sang mga karniro nan.* 5:2 Maynini yang pyaglaongan ni Pitros kay yan mismo syasarigan ni Isa Almasi ng pagatiman sang mga otaw na sakop nan. Tanawa sang Kitab Injil, Yahiya 21:15-17. Aw yani yang karim ng Tohan na atimanun mayo silan sikun sang kaiklas ng pangatayan mayo, aw dili sabap ng pyupugus kamo. Inanga mayo yang gawbuk mayo dili sabap ng karim mayo makasapi kondi sabap ng karim mayo makatabang kanilan. 3 Ayaw kamo magmando sang mga otaw na syasarig kamayo kondi pakitaan mayo kanilan yang madyaw na opamaan antak sonodon nilan. 4 Kay sang allaw ng pagbarik ni Isa Almasi na yan yang Labaw na Magbabantayay, amadawat da mayo yang baras na labi na madyaw aw di amawaa taman sa taman.
Mga Towada sang Kadaigan
5 Kamo oman na mga bata pa, pagpasakop kamo sang mga mangkatikadung. Aw yang kariko mayo dait magpababa ng ginawa mayo aw dait na magtinabangay kamo. Kay aon yamakasorat sang Kitab na yagalaong,
“Kontra ng Tohan yang otaw na magpataas ng ginawa nan,
awgaid akaloyan nan yang sino-sino na magpababa ng ginawa.Ӡ 5:5 Yani na ayatan yamakasorat sang Kitab Tawrat, Pagtowada 3:34.
6 Agaw, pagpasakop kamo sang Tohan na labi na mabarakat antak bantogon nan kamo pagdatung ng wakto na pyagakahanda nan. 7 Sarigan mayo kanan yang kariko ng karidowan mayo kay yan yang yagaatiman kamayo.
8 Dadayawa mayo yang dumduman mayo aw pagbantay kamo. Kay yang Saytan na kanatun kalaban yagalibot-libot na maynang liyon na yamagutumay aw yamanganap ng akanun nan. 9 Na, labani mayo yang Saytan aw pakatigsuna yang pagpangintoo mayo kay kyakatigaman mayo na yang kadaigan na mga kalomonan mayo adi sang donya yamagi oman ng kasikotan na magonawa kamayo.
10 Na, tyotogotan ng Tohan na amagi kamo ng kasikotan abir ng makagpa gaid na panahon. Awgaid pagkatapos san inangun nan kamo na mga otaw na waa day kolang kamayo. Yan da yang magapakatigsun sang pangatayan kipat sang pagpangintoo mayo antak di kamo amagayung. Kay yang Tohan na pyagasikunan ng kariko ng kadyawan, labi na maloyanun. Pipili nan kamo antak makasawit kamo sang bali na kabantogan nan taman sa taman sabap sang pagkasambok mayo sang Almasi. 11 Kanan da yang kariko ng kabarakat taman sa taman! Amin.
Yang Kataposan na Pagsalam
12 Adon, yang yatabang kanak sang pagsorat sining makagpa na sorat si Silas na sambok na lomon natun na kyakatigaman ko na kasarigan. Yagasorat ako kamayo antak mapakatigsun ko yang kamayo pangatayan aw antak pangimunnaan ko kamayo na yamakaagi kamo sini na mga kasikotan sabap sang looy ng Tohan. Na, pagpakaligun kamo aw ayaw kamo magpakawat sang looy ng Tohan kamayo.
13 Yang mga kalomonan mayo adi sang jamaa sang Babilon,‡ 5:13 Sidto na wakto, toombok yang banwa na tyatawag ng Babilon. Mapakay oman na gyagamit ni Pitros yani na ngaan magonawa ng pasombingay para sang syodad ng Roma. yagasalam kamayo. Pipili silan ng Tohan na sakop nan magonawa kamayo. Si Markos isab na magonawa da ng anak ko yagasalam oman kamayo. 14 Pagsinalamay kamo silbi tanda ng paglinoyay mayo.
Na, yang kariko mayo na yagakasambok sang Almasi, amadawat gao mayo yang kalinaw na yagasikun sang Tohan.
Wassalam
*5:2 5:2 Maynini yang pyaglaongan ni Pitros kay yan mismo syasarigan ni Isa Almasi ng pagatiman sang mga otaw na sakop nan. Tanawa sang Kitab Injil, Yahiya 21:15-17.
†5:5 5:5 Yani na ayatan yamakasorat sang Kitab Tawrat, Pagtowada 3:34.
‡5:13 5:13 Sidto na wakto, toombok yang banwa na tyatawag ng Babilon. Mapakay oman na gyagamit ni Pitros yani na ngaan magonawa ng pasombingay para sang syodad ng Roma.