1 Na, kamo na mag-onawa ng mga anak ko, syorat ko kamayo yani na mga butang untak di kamo magpakadosa. Awgaid kong aon makadosa, aon matabang kanatun na magpangayo ng ampon adto sang Tohan na Ama, aw yani na tigpatunga si Isa Almasi na yan way dosa. 2 Yani si Isa yagpakamatay na mag-onawa ng korban untak ma-ampon yang kanatun mga dosa. Aw yagapakamatay yan dili gaid para sang kanatun mga dosa awgaid sampay oman sang mga dosa ng kariko ng manosiya.

3 Na, kong tomanun natun yang mga sogowan ng Tohan, makasigoro kita na kinilaa natun yang Tohan. 4 Kong aon otaw na yagalaong na kinilaa nan yang Tohan awgaid wa nan inanga yang mga sogowan nan, bakakun yan aw waa sang pangatayan nan yang kabunnaan. 5 Awgaid sino-sino yang yagapangagad sang pyaglaongan ng Tohan, bunna na pyakadakowa nan yang Tohan sang kanan pangatayan. Yani agaw yang tanda na yagakasambok kita sang Tohan kong magpangagad kita kanan. 6 Agaw, sino-sino yang yagalaong na yagakasambok yan sang Tohan, dait na yang batasan nan mag-onawa ng batasan ni Isa Almasi.

7 Mga kalomonan ko, yang sogowan na syorat ko kamayo adon dili ng bago awgaid dadaan da. Dadaan da yani kay sokad sidtong wakto na yagapangintoo kamo sang Almasi, yani yang sogowan ng Tohan kanatun aw yang indowan na dyungug mayo na dait kamo magsikaoyay. 8 Awgaid yani na sogowan mapakay oman tawagun ng bago kay sabap sang ininang ng Almasi yakita natun yang bunna na looy, aw makita da oman yani sang kinabowi mayo. Kay yaga-ipan mawaa yang kadugguman aw somilat da yang bunna na kapawa.

9 Sino-sino yang yagalaong na iyan yan paga-uya sang kapawa awgaid yagadumut sang lomon nan sang pagpangintoo, na, idto pa yan paga-uya sang kadugguman. 10 Awgaid yang otaw na yamaooy sang lomon nan, iyan yan sang kapawa aw way maskin ono na iyan kanan na pagasabapan ng pagpakadosa. 11 Awgaid yang otaw na yagadumut sang lomon nan, iyan yan sang kadugguman. Maynang yagapanaw-panaw yan sang kadugguman aw wa yan akatigam daw wain yan makadto kay sabap sang kaduggum mag-onawa yan ng bota na di makakita.

12 Na, yagasorat ako kamayo, mga anak ko, kay yampon da ng Tohan yang mga dosa mayo sabap sang ininang ni Isa Almasi. 13 Yagasorat ako kamayo, mga mangkatikadung, kay yakilaa kamo kang Isa Almasi na iyan da yan sikun pa sang pukas nang wa pa akabaoy yang donya. Yagasorat ako kamayo, mga olitawo, kay yatalo mayo si Iblis na pyagasikunan ng kaatan.

14 Na, barikun ko yang pyaglaongan ko. Yagasorat ako kamayo, mga anak ko, kay yakilaa kamo sang Tohan na Ama. Yagasorat ako kamayo, mga mangkatikadung, kay yakilaa kamo kang Isa Almasi na iyan da yan sikun pa sang pukas nang wa pa akabaoy yang donya. Yagasorat ako kamayo, mga olitawo, kay mabagsug yang pagpangintoo mayo aw iyan sa pangatayan mayo yang pyaglaongan ng Tohan. Agaw, yatalo da mayo si Iblis na pyagasikunan ng kariko ng maat.

15 Na, ayaw mayo pagpalabia yang ininang aw batasan ng mga otaw na wa apangagad sang Tohan aw ayaw oman mayo pagpalabia yang maskin ono na adi sang donya. Kay kong palabiun mayo yang kadodonya, wa mayo apakadakowaa yang Tohan sang kamayo pangatayan. 16 Kay yang kariko na adi sang donya mag-onawa ng kyanapsowan ng mga otaw aw yang napso sang maskin ono na kinita nilan, aw yang pagpasigarbo sang ya-inang nilan, yan kariko wa pagasikun sang Tohan na Ama, awgaid kadodonya gaid yan. 17 Yang donya aw yang kariko ng kyanapsowan ng manosiya amawaa. Awgaid yang otaw na yagapangagad sang karim ng Tohan amabowi taman sa taman.

18 Mga anak ko, masaid da domatung yang arikiyamat. Yadungug da kowaw mayo na madatung ona yang kalaban ng Almasi. Aw adon madaig da yang mga kalaban nan. Agaw, kyatigaman da natun na masaid da yang kataposan ng donya. 19 Yani na mga otaw na yasopak sang Almasi mga inagad natun silan singaon. Awgaid biniya silan kanatun kay dili silan ng bunna na inagad natun. Kay kong bunna silan na inagad natun, wa gao silan abiya kanatun. Awgaid biniya silan, agaw yamaklaro na dili silan ng bunna na mga inagad natun.

20 Awgaid kamo, yatagan da kamo ng Almasi ng Nyawa ng Tohan, aw sabap sinyan yamatigam da kamo sang kabunnaan. 21 Yagasorat ako kamayo dili sabap ng wa kamo akatigam sang kabunnaan awgaid sabap ng kyatigaman da mayo, aw kyatigaman oman mayo na way bakak na yagasikun sang kabunnaan. 22 Na adon, sino kadi yang bakakun? Yani yang otaw na yagalaong na si Isa dili ng Almasi, yang pyasad na manlolowas. Yani na otaw yang kalaban ng Almasi. Tyarikodan nan yang Tohan na Ama aw tyarikodan oman nan yang kanan Anak. 23 Sino-sino yang di amangintoo sang Anak, waa adto kanan yang Tohan na Ama. Sino-sino yang yagapangintoo sang Anak, iyan kanan yang Ama.

24 Agaw, sigorowa mayo na abay magpabilin sang kamayo pangatayan yang indowan na pyagadungug mayo sokad sang pagsogod ng pagpangintoo mayo. Kay kong idtong pyagadungug mayo abay magpabilin sang kamayo pangatayan, abay kamo magkasambok sang Anak ng Tohan kipat yang Tohan na Ama. 25 Aw yan agaw yang pyasad ng Almasi kanatun na atagan kita ng kinabowi na way kataposan.

26 Na, yani yang syorat ko kamayo untak kamo magbantay sang mga otaw na marim magpasoway kamayo sang bunna na indowan. 27 Awgaid kamo, yatagan da kamo ng Almasi ng Nyawa ng Tohan. Aw sabap ng iyan da yan sang kamayo pangatayan, di da kinaanglan na aon pay maga-indo kamayo. Kay yang Nyawa ng Tohan yang yaga-indo kamayo ng kariko ng mga butang. Aw yang kariko ng pyaga-indo nan bunna, aw dili ng bakak. Agaw, inanga mayo yang pyaga-indo kamayo ng Nyawa ng Tohan aw abaya mayo yang pagkasambok mayo sang Almasi.

28 Mga anak ko, abaya mayo yang pagkasambok mayo sang Almasi. Kay kong maynan, di kita amalluk sang allaw ng pagbarik nan adi sang donya aw di oman kita mamomowa mangadap kanan. 29 Yamatigam kamo na yang Almasi matorid. Agaw, dait na katigaman oman mayo na sino-sino yang yaga-inang ng matorid, anak yan ng Tohan.