1 Sino-sino yang yagapangintoo na si Isa yang Almasi, yang pyasad na manlolowas, yabaoy yan ng anak ng Tohan. Aw sino-sino yang aon looy sang taganak, aon oman looy sang mga anak nan. 2 Agaw, makasigoro kita na aon looy natun sang mga anak ng Tohan na silan yang mga kalomonan natun kong dakowa yang Tohan sang kanatun pangatayan aw pyagatoman natun yang mga sogowan nan. 3 Aw yani yang tanda na dakowa yang Tohan sang kanatun pangatayan kong tomanun natun yang mga sogowan nan. Aw yang mga sogowan nan dili ng mairap tomanun. 4 Kay yang kariko ng mga otaw na yabaoy ng mga anak ng Tohan, amakatalo silan ng kaatan adi sang donya. Idto sagaw, sabap sang kanatun pagsarig kang Isa Almasi yatalo da natun yang kaatan adi sang donya. 5 Na, sino kadi yang amakatalo ng kaatan adi sang donya? Yang otaw gaid na yagapangintoo na si Isa yang Anak ng Tohan.

6 Na, yani si Isa yakani sang donya. Yagapasogbo yan aw yaboos yang kanan dogo nang yamatay yan adto sang kaoy. Aw pyangimunnaan kanatun dili gaid sabap sang kanan pagpasogbo awgaid sabap oman sang pagboos ng kanan dogo na yan agaw yang Anak ng Tohan. Yang yagasaksi nini na kabunnaan yang Nyawa ng Tohan, aw aag bunna yang pyaglaongan nan. 7 Adon, aon toongka saksi na yagapangimunna makapantag kang Isa Almasi, 8 yang Nyawa ng Tohan, yang tobig aw yang dogo. Aw yagaka-oyon yaning too. 9 Yagapangintoo kita sang pagpangimunna ng otaw, awgaid labi pa na kasarigan yang pagpangimunna ng Tohan. Aw yani yang pyangimunnaan ng Tohan na si Isa yang kanan Anak. 10 Agaw, sino-sino yang yagapangintoo sang Anak ng Tohan, kyatigaman nan sa suud ng kanan pangatayan na bunna yang pyagalaong ng Tohan. Sino-sino yang di mangintoo sang pyagalaong ng Tohan, maynang ininang nan yang Tohan na bakakun kay wa yan apangintoo sang pyangimunnaan ng Tohan makapantag sang kanan Anak. 11 Aw yani yang pagpangimunna ng Tohan na yatagan nan kita ng kinabowi na way kataposan aw yani na kinabowi iyan sang kanan Anak. 12 Agaw, sino-sino yang yatarima ng Anak ng Tohan, kya-aonan ng kinabowi na way kataposan. Awgaid sino-sino yang wa pagatarima ng Anak ng Tohan, waa adto kanan yang kinabowi na way kataposan.

13 Na, syorat ko yani kamayo na yagapangintoo sang Anak ng Tohan untak mayo katigaman na aon kinabowi mayo na way kataposan. 14 Na, di da kita amalluk domood sang Tohan kay yakasigoro kita na dungugun nan yang maskin ono na apangayoon natun na sobay sang karim nan. 15 Aw sabap ng kyatigaman natun na dungugun nan yang kanatun pagpangayo, yakasigoro oman kita na atagan nan kita ng pyagapangayo natun.

16 Adon, kong aon kitaun mayo na lomon na yaga-inang ng dosa, awgaid idtong dosa di makadaa kanan sang kamatayun na mag-onawa ng pagbuag sang Tohan, dait na pagdowaan mayo yan untak amponon yan ng Tohan aw atagan oman yan ng kinabowi. Na, yani yang dait mayo inangun para sang lomon na yang dosa nan dili akasabapan ng kamatayun. Kay aon oman dosa na makadaa sang kamatayun.*5:16 Yang karim ipasabot sang dosa na makadaa sang kamatayun na kong magpadayon yang otaw sang pagpakadosa, ma-inang ng matigas yang kanan pangatayan. Kong maynan, di da yan makapagtawbat aw di oman makatarikod sang pagpakadosa nan. Awgaid wa ako pagalaong na dait pagdowaan yang lomon na maynan yang dosa. 17 Yang kariko ng ininang na maat dosa yan. Awgaid aon mga dosa na di makadaa sang pyagalaong ko na kamatayun.

18 Na, kyatigaman natun na yang kariko ng mga otaw na yabaoy ng anak ng Tohan, di da magpadayon ng pagpakadosa. Pyagabantayan silan ni Isa Almasi na Anak ng Tohan, agaw di da silan amadaa ng Saytan na pyagasikunan ng kariko ng maat. 19 Yamatigam kita na sakop da kita ng Tohan. Awgaid yang kadaigan na mga otaw na kadodonya gaid, yasakop ng Saytan. 20 Na, yamatigam oman kita na yakani sang donya yang Anak ng Tohan aw yatagan nan kita ng katigam untak kita matigam daw sino yang bunna na Tohan. Aw adon yagakasambok da kita sang bunna na Tohan kay yagakasambok kita sang kanan Anak na si Isa Almasi. Yan agaw yang bunna na Tohan aw maka-atag ng kinabowi na way kataposan.

21 Mga anak ko, dait na way lain na pyalabi mayo yatabiya yang Tohan.

Wassalam