2
Mga Pagtowada makapantag sang Pagsambayang sang Tohan
Na adon, yani kay yang dait mayo inangun. Labaw sang kariko karim ko na pagdowaan mayo yang kariko ng mga otaw na aon pagpanginsokor, aw pangayowi mayo silan adto sang Tohan sang kariko ng pyagakinaanglan nilan. Pagdowaai mayo yang mga soltan aw sino-sino pa na aon kapatot untak ka-aonan kita ng kinabowi na madyaw aw way kasamok aw untak makapangagad kita sang Tohan na aag madyaw yang inang. Yang pagpangayo-ngayo para sang kadaigan na mga otaw madyaw aw makapasowat sang Tohan na kanatun Manlolowas. Kay karim ng Tohan na yang kariko ng manosiya amatigam sang kabunnaan aw amalowas. Kay sambok da gaid yang Tohan aw sambok da oman yang tigpatunga na yagapa-ori ng manosiya adto sang Tohan aw sambok da yang otaw na si Isa Almasi. Yatag nan yang kanan kinabowi sang paglowas ng kariko ng manosiya. Yang pagpakamatay ni Isa Almasi yang pagpangimunna kanatun na karim ng Tohan na amalowas yang kariko ng manosiya. Aw pyatigam nan idto kanatun sang wakto na pyagakahanda nan. Aw idto oman yang sabap nanga ininang nan ako ng sahabat aw magpapayapatay aw syogo nan ako untak mag-indo sang mga dili ng Yahodi ng makapantag sang bunna na pagpangintoo. Bunna yani na pyaglaongan ko aw dili ng bakak.
Na, yang karim ko na inangun ng kausugan sang kariko ng mga jamaa na magadowaa silan na sotti yang pangatayan nilan, aw amangamin silan na way kadaman atawa panaglalis. Karim ko oman na yang kaobayan mag-imaya aw magdadayaw sang kanilan pyandagoman, na di abay magpangarti sang kanilan logay atawa sang pagsoog ng mga bowawan, mga perlas atawa mangkamahal na mga dagom. 10 Awgaid kinaanglan na mag-inang silan ng madyaw na yan yang dait inangun ng kaobayan na yagapangagad sang Tohan. 11 Sarta aon yaga-osiyat, kinaanglan na yang kaobayan magpakatingun aw maningug ng madyaw na aon pagpasakop sidtong yaga-osiyat. 12 Di ako masogot na yang kaobayan maga-indo atawa magpalabaw sang kausugan. Dait na magpakatingun silan sang jamaa. 13 Kay si Nabi Adam yang ona na byaoy ng Tohan, sonod da si Sitti Awa. 14 Aw dili ni Nabi Adam yang kyalimbongan ni Iblis kondi si Sitti Awa yang kyalimbongan aw yasopak sang sogowan ng Tohan. 15 Agaw, sabap sidtong dosa ni Sitti Awa amagi ng kasikotan yang kariko ng kaobayan sang pagpanganak nilan. Awgaid alowasun silan ng Tohan kong magpadayon silan sang pagpangintoo aw aon looy nilan sang kapag-onawa nilan. Aw dait oman na sotti yang pangatayan nilan aw madyaw yang addat nilan.