Magtubu to Pol li biɲ Pilémô
Kwôlo kôl kwôli magtubu to Pol li hen
Pilémô na, na kwôni wo dami wo ay bôri men, na kwôni wo églis to Kwolôs a a men. Ôbi na melaɲ *ôbi jé Pol a men (bêrsé 1). Ôbi na ôriɲ naɲ lema iyére tori wo hini na Onésim wo na si ge aɲ iyé Pilémô a aɲ ô uɲé Pol bô daŋgay a Rôm a. Aɲ Pol ayri bôri. Menba, Pol genge wô jéɲ naɲ ɗi hôriɲ biɲ ôbi iyéyriri Pilémô. Na ôbi á, ôbi ré li magtubu hende to hen biri wô uwôlêri bi ôbi ré ɓiri yiri mega lema iyôŋ ré, niɲ niɲba, mega yêni tô kwôlo Emen a. Ɓiɲé ka pôni kôl ré na Onésim a na ré eraɲ naɲ magtubu to Pol li biɲ kamaŋ ka Kwolôs men to ôbi li biɲ Pilémô men hen. Magtubu hende to hen kini soderére a na:
Bêrsé 1-3 na, dosé to Pol liɲ Pilémô naɲ ɓiɲé ka bô iyére tori a.
Bêrsé 4-7 na, Pol liɲ Emen dosé wôsa ayê bôô wori men, wô yi gwa wo Pilémô a men.
Bêrsé 8-22 na, Pol kôliɲ Pilémô gengiɲ sa Onésim wo ɗiré ɗa jéɲ naɲ ɗi hôriɲ biri hen.
Bêrsé 23-25 na, ôbi liji dosé deriɲ kibi magtubu tori.
Pol li magtubu hende hen naɲ tôô to jali biɲ melaɲni Pilémô. Ôbi ay tôô tôni biri ré men, ɗiri ani kani ereŋ sari a ré men, ôbi hôn wo Pilémô a ré na ôbi sa Onésim a men. Ôbi kôliɲ Pilémô men, ɓiɲé kêm ka dêŋse magtubu hende to hen na, mega wo bê bôô sa Krist a ré bul erê yi a ré wo perê gawrê hen liɲ kwo dôri.
1
Dosé to Pol liɲ Pilémô
1 Nôbi Pol wo en yi daŋgay a wô kibi jé wo *Krist Jésu wo en li hen. Nibay naɲ yênena Timoté a lê magtubu hende to hen bem jôbi yênini Pilémô melaɲnini men, megarni ôbi jé men hen. 2 Liɲ yêreni Apiya men, liɲ Arsip wo na megarni ôbi kumbul hen men, liɲ églis to bô iyére tom a hen dosé béni men. 3 Bi bô derê naɲ bô jalê wo Ibarna Emen naɲ kwo Kelma Jésu Krist baa naɲ ken.
Kwôli ayê bôô wo Pilémô naɲ geyé wo ôbi gey ɓiɲé ka Emen hen
4 Pilémô, kiriɲa en uwôl Emen na, en erem sam a menba, en liri dosé kwôy kwôy. 5 Wôsa en toy kôli geyé wo ju gey ɓiɲé ka Emen kêm hen men, kwôli bôm wo ju bi sa Kelma Jésu a men hen. 6 En uwôl Emen bi ayê bôô wo dayem naɲ nini hen ré ô tumô tumô men, bi ré bem ju hôniɲ aŋga dôri kêm ka nana uwôɲ tô Krist a hen men. 7 Yênen, geyé wo ju gey ɓiɲé ka Emen hen na, ben yi derê damaŋ men, dôben ibiyare bôn a men, wô jalê wo ju jal bô ɓiɲé ka Emen hen.
Pol sôm sa Pilémô a wô sa Onésim
8 Na ôbi á, bi wo ani kaɲ bay jôrenare tô Krist bi ené ay tôô bem jeré liɲ aŋga yi lê hen naɲ hen haji, 9 kôba, wô geyé wo nana geyiɲ yerna hen na, ené ena uwôlem hen, nôbi Pol wo ena kwo iyêri aɲ haw hen en yi daŋgay a wô jé wo Jésu Krist wo en li hen. 10 En uwôlem wô sa Onésim wo na keman wo en yêri tô Jésu Krist a kiriɲa en yiɲ daŋgay a hen. 11 Na ca ba, ôbi na yi ani tum a ré, niɲba, haw hen ôbi yi are tun a men, tum a a men niɲ.
12 En hô jéɲ naɲ ɗi hôriɲ bem ôbi wo en geyri damaŋ hen. 13 Ré ené geméri legen a nà, bi ôbi ré li naɲ en hôlmêm a kiriɲa en yiɲ daŋgay a wô kibi Kwôlo Dôri hen, 14 niɲba, en gey lê iyôŋ mera baa eŋgeremare ré ré. Wôsa en gey ɓerem ereŋ bi jiré li derê naɲ en né, niɲba, bi jiré li naɲ bô geyé wom ɗi.
15 Dô réba ôbi na ɗém aɲ sem aɲ bi jiré hô uwoɲni naɲ kunem yôd niɲ. 16 Niɲba, na mega lema iyôŋ ré niɲ, niɲba, ôbi dô ɗê lema dê niɲ men, ôbi na yênem wom niɲ men. En geyri gaɲ, niɲba, kwom jôbi ba já geyéri gôlen aɲ sôŋ, wôsa ôbi na lema wom men, na yênem tô Kelma a men.
17 Hena ju ré bôren môɲ megam ôbi jé iyôŋ na, ju ɓiri yem a mega wo ré jeré ɓeren na nôbi yem a hen iyôŋ men. 18 Hena ôbi na ré lêm aŋga habiɲ kani ley, hena ôbi na ré naɲ telare tom sari a ley na, ju ɗén san a. 19 Nôbi Pol a lê kwôlê bi wo hen naɲ kôben wuɲê hen na, na hô têbem are bay ka hen hôriɲ. Jôbi kôba, ju hôn wo wô kibi ayê bôô wom na, telare tiɲê baa sam a ya men. 20 Yênen, li are bay ka en eŋgerem hen ben wô kibi peré wo nana pur Kelma hen men, ju jal bôn a men, wôsa nana yênê tô Krist, kwo Emen dôri hen.
21 Kiriɲa en liɲ magtubu hende to hen na, en hôn wo jeré lê ɗê ka en eŋgerem hen aɲ sôŋ. 22 Ɲan iyére pôn ɗén, wôsa en bi bôn wo Emen ré toyé uwôlê woŋge aɲ ré belê geré ben bi ené biɲ uɲéŋge.
Gerɲé dosé to Pol liɲ Pilémô
23 Epapras wo yi daŋgay a naɲ en wô jé wo Jésu Krist wo nini li hen lêm dosé. 24 Men, Mark men, Aristark men, Démas naɲ Luk milɲén bay jé kôba, lêm dosé a men.
25 Bi bô derê wo Kelma Jésu Krist baa naɲ ken.