A Mugano Pas
anun o Pol torom
o Timoti
A wasiso talapor mugu
A buk ri, a mugano pas anun o Pol torom o Timoti. O Timoti tagitong una papor Asia. O nano a ino Juda ma o tamano a te Grik. Una manru na inawan anun o Pol, i pilok pas o Timoti sur der in nan tomo, ma der in papam tomo (tama Ap 16:1-3). Numur o Pol i ubek tar o Timoti sur in tene tamtamabat anun a taro na lotu tong o Epeses.
Una buk ri, o Pol i inanos o Timoti lena in tamtamabat a taro na lotu gusun a kum torotoro na tene ususer, sako det in ban laulau a nurnur anun a taro. I inanosi kai una wakak na etowo, ma un osi na ngas na taro ra det in pilok pas det, sur det a kum tene pinapam na lotu, ma una wakak na petutna ra in muri.
A inawan ina Mugano Pas Timoti:
A turturkibin ina buk ri (1:1-2)
O Timoti in turbat a kum torotoro na etowo (1:3-20)
A kisapi na lotu (2:1-15)
A kum mugumugu na lotu (3:1-16)
O Timoti in tamtamabati ut, sur in nanpat a wakak na tene pinapam (4:1-16)
A etowo torom o Timoti una nun a pinapam (5:1-6:21)
1
Iau o Pol, a aposel anun o Karisito Iesu, una itula anun o God, anundat a Tene Ulaun, ma o Karisito Iesu, o naro ra dat kis langlang suri nama nurnur. Ap 16:1-3; Tai 1:4A tumus a pas ri torom ui Timoti, a nutunglik mulus una nurnur. A marmaris ma a wakak na petutna ma a balano molmol, tan o God a Tamandat ma o Karisito Iesu anundat a Labino in kis torom ui.
O Pol i inanos o Timoti sur in turbat a kum torotoro na etowo
Uniri a udekdek melet ui sur un kis ut tiro o Epeses, elar nami ra a sa watung tari tam, ra a wan utong o Masedonia. Un kis sur un turbat det ra det ususer a taro nam lako kum torotoro na etowo. 1 Tim 4:7; Tai 1:14Ma gong det balon una kum etowo ororos kut, ma a kum utatos, ra katu ururopino. I ulabo i kut a wasiso na engaras, ma ke warut a pinapam anun o God. A pinapam anun o God i lubung kut una nurnur. A watungi lenra, sur a marmaris in lubung epotor tandat etetalai. A marmaris ra, i wan tagun a tokodos na balandat, ma a wakak na nuknukin dat, ma a lingmulus na nurnur. A ramano taro det sa wan gisen gusun a kum wakak na petutna ri, ma det mur a kum wasiso ororos mukut. Det nemi sur det in ususer a taro una kum Warkurai anun o God, ra det nuki lena det tasman wakaki, ikut ka det tasman mulus asau ra det wasiso uni.
Rom 7:12, 16Dat tasmani lena, a Warkurai anun o Moses i wakak, ra din papam wakak nami. Dat tasmani lena, a Warkurai awu sur di pitari sur a kum tene tokodos, awu. Di pitari kut sur a ngas na taro lenri: det ra det lakai a kum warkurai, a kum tene rosumur, det ra ka det mur a petutna ra i wakak umatan o God, a kum tene sakino, det ra det dur umatan o God, det ra ka det ser ru o God, det ra det um doko a taro, det ra det um doko a kum tamtaman det o a kum nanan det, 10 det ra det pam a sakino nam tu ino anun taio o nam tu musano anun taio, a kum musano ra det nolin melet kut nama kum musano, det ra det pam sikot pas a taro sur det in siuru det, a kum tene torotoro, det ra det liliman torotoro, ma det rop ra det pam a kum utna ra ke elar nama tokodos na etowo anun o God. 11 A tokodos na etowo i kis una Wakak na Wasiso, ra o God i pitar tari tang sur an wasiso talapor nami. A Wakak na Wasiso ri, i wan tagisapat tan o God, a God na minamar ra i dan tukum.
O Pol i watung ulabo a marmaris anun o God
12  Ap 9:15; Gal 1:15-16; 1 Kor 15:9-10A watung wakak torom o Karisito Iesu anundat a Labino, ra i pitar tar a dekdek tang. A watung wakak toromi uni i nurnur un iau, ma i ubek tar iau sur an papam toromi. 13  Ap 8:3; 9:1-5Numugu a ser watung laulau o Iesu, a ban laulau a taro na nurnur ma a ukadik det. Ikut o God i maris iau, uni ka tasman asau ra a pami, ma ka nurnur utmakai. 14 Anundat a Labino i ese anun a labino marmaris torom iau, ra i pitar tar a nurnur ma a wakak na petutna torom iau. A etabor ri, i kibino un o Karisito Iesu.
15  Lk 19:10I wan pirso urin una rakrakon bual sur in ulaun a kum tene sakino. A wasiso ri i lingmulus sakit, ma dat in nurnur uni. Ma iau, a laulau sakit tan a kum tene sakino rop. 16 Ikut o God i maris iau, sur o Karisito Iesu in ese anun a wowowon na petutna torom iau, ra a laulau sakit tan a kum tene sakino rop. I ulaun iau ma i unus ru anung a kum sakino petutna. Lenra, a wanpat a wakak na malalar, sur a taro det in tama asau ra o Iesu i pami un iau, ma det in nurnur un o Iesu, ma det in rakon a nilaun tukum. 17 Dat in pitar a urur ma a wasiso na ululabo torom a King ra i laun tukum, ma ken mat, i ra ka dat tama i, ra i sot kut a God. A wasiso na ululabo toromi ken rop ma ken rop. Amen.
18 Timoti a nutunglik, a kum etowo ri ra a pitari tam, i elar nama wasiso na poropet ra di sa watung tari un ui ra det wararing un ui. Ra un mur a kum etowo ri, ui ara wakak na tene inaim nama Wakak na Wasiso. 19 Un tur dekdek una num a nurnur, ma un mur a wakak na nuknuk. A ramano taro ka det pami lenri, ra anundet a nurnur i puku elar nama sip ra a top i rapus regerege ru i. 20  2 Tim 4:14-15; 1 Kor 5:5O Emeneus ma o Aleksanda aru tagun det, ma a sa pitar tar der ulaman o Satan, sur der in tasmani lena, gong melet mo der watung laulau o God.

1:2: Ap 16:1-3; Tai 1:4

1:4: 1 Tim 4:7; Tai 1:14

1:8: Rom 7:12, 16

1:12: Ap 9:15; Gal 1:15-16; 1 Kor 15:9-10

1:13: Ap 8:3; 9:1-5

1:15: Lk 19:10

1:20: 2 Tim 4:14-15; 1 Kor 5:5