1  Mt 24:11; Jud 1:4Numugu a kum torotoro na poropet det kis epotor tan a taro Israel. Lenkutkai ra a kum torotoro na tene ususer det in nanpat epotor ut tagun mot. Det in uruk eno anundet a kum torotoro na etowo ra in ban laulau a nurnur, ra det in ipul ru a Labino ra i sa kul pas det. I mo ra aiapiap kut, det in los a iniru. 2 A susut na taro det in mur a kum petutna na pamuk anun a kum torotoro na tene ususer, ra a taro gisen det in watung laulau a lingmulus na nurnur, i kibino una kum ngasino anun a kum torotoro na tene ususer. 3 Una nundet a labino nemnem sur a mani, det in usobor pas mot nama kum torotoro na wasiso, sur det in los anumot a mani. Ikut tagitiro numugu utmakai, o God i sa waninar tar anundet a warkurai na minabalu, ra milau mukut in nanpat un det.

4  Jud 1:6O God ke maris bat a kum ensel ra det pam a sakino petutna. I woro pirso ru det unin labino tung ra i dumirum doko, ma di ker ukai tar det, ma det kis langlang pas a bung na warkurai. 5  Stat 6:1–8:22; 2 Pit 3:6Ma o God ke maris bati kai a rakrakon bual numugu, ra i tulu in nolomom, ra a taro ra det rosumur gusun o God det iru uni. Ikut i ulaun pasi kut o Noa, a tene warawai una tokodos na petutna. Ma i ulaun pasi kai a wonom mawit det. 6  Stat 19:24; Jud 1:7Ma i pitar a warkurai na minabalu una aru tamon, o Sodom ma o Gomora ra i tun ru der, ra der a kabo kubus mukut. I pami lenra sur a malalar ina sau ra kura numur in nanpat torom a taro ra det rosumur gusun o God. 7  Stat 19:1-16Ikut, i ulaun pas o Lot. I a tene tokodos, ra i los a labino maut una kum petutna na pamuk anun a taro na lakai warkurai. 8 A tene tokodos ri, i kis epotor tan a laulau na taro ra. Ma una kum bung rop, i taramo a labino maut una nundet a kum petutna na lakai warkurai, ra i tama i ma i longoro i. 9 Ra a Labino i tasman a kisapi ra in ulaun pas a taro ra det ru i, gusun a kum larlar ra in barato det. Ma i tasmani kai a kisapi ra in ukadik a taro ra det rosumur gusuni, ma det kis langlang sur anundet a warkurai na minabalu, una bung na warkurai. 10  Jud 1:7-8, 16Ma a Labino in warkurai dekdek det ra det mur a kum dur na nemnem ina pinindet, ma ka det nem na kis utuntudu in anun a warkurai.

A kum torotoro na tene ususer ra, ka det ngara, ma det ulabo pas det ut. Ka det ngara ra det watung laulau a kum ukukis ra kusapat una langit. 11  Jud 1:9A kum ensel det dekdek doko taun a kum torotoro na tene ususer ri, ikut ra det tur umatan a Labino ka det watung laulau a kum ukukis ra kusapat una langit. 12  Jud 1:10Ikut a kum torotoro na tene ususer ri, det elar nama kum kuabor na wewegua, ra ka det mananos, ma det muri kut a nemnem ina pinindet, ma di usus det kut sur din pam ukai det ma din um doko det. Det watung laulau i kut a kum utna ra ka det tasmani. Det in iru elar nama kum kuabor na wewegua.

13 O God in balu anundet a kum sakino petutna nama laulau ino. Det gas kut ra det inum ma det sipak tuptupukus una waspi. Ra det kis tomo nam mot una kum inangon, ma det gas una nundet a kum torotoro na petutna, anundet a dur na petutna i ban umaimai mot. 14 A kum bung rop, a matandet i tamtama kut sur tu ino anun taio o tu musano kai anun tu ino, sur det in pam a sakino tomo nami. Ka det mana gusun anundet a kum sakino petutna. Det ulam raro a taro ra ka det tur dekdek. Det lason doko una nemnem sur a susut na ululeng. Ikut, anundet a iniru i sa waninar. 15  Nam 22:7; Jud 1:11; Tam 2:14Det sa wan gusun a tokodos na kisapi, ra det sa raro. Det sa mur a kisapi anun o Balam a nutun o Beor, ra i pam a sakino, uni i nem doko a mani. 16  Nam 22:28-35A kum dongki ka det ser wasiso. Ikut a dongki anun o Balam a poropet, i wasiso toromi una nun a niraro namin nalngan a musano, ma i turbat anun a longlong na pinapam.

17  Jud 1:12-13A kum musano ri, det elar nama kum matmatano danim ra det sa mamaso, ma det elar kai nama gawul ra a labino wuwu i wup ru i. O God i sa waninar tar a nubual sur det una labino dumirum. 18 Det ulabo pas det nama kum wasiso oros kut, ma det ulam a taro sur det in pam a pamuk na petutna ma det in mur a kum laulau na nemnem ina pinindet. Una ngasino ri, det ulam det ra ke suano det utmakai a inawan gisen gusun a kum tene sakino. 19 Det liliman torom det lena, det in langolango, ikut det ut, ka det langolango, det tene ititula torom a kum dur na magirandet. Uni taio in tene ititula torom asau ra i labo doko una nun a nilaun. 20  Mt 12:45A taro ra det sa wan gisen gusun a kum dur na petutna tagun a rakrakon bual, uni det sa tasman o Iesu Karisito, anundat a Labino ma Tene Ulaun, ikut numur det puku unin nukun ina sakino petutna, ma a kum laulau na utna ra, i ker ukai melet det, anundet a kinkinis numur in laulau doko taun anundet a kinkinis numugu, ra ka det tasmani utmakai o Iesu Karisito. 21  Lk 12:47-48Gunuk ra ka det in tasman a kisapi ina tokodos na petutna, in wakak torom det. Ikut uniri, in laulau doko torom det, uni det sa tasmani, ikut det rosumur melet gusun a warkurai anun o God, ra di sa pitar tari tandet. 22  Snd 26:11A ru wasiso elelar ri i sot nam det: “A pap i milet melet sur a utna ra i muru tari.” Ma “A nano boro ra di sa rus tari, in milet melet ra in polpolos melet.”