A Manru na Pas
anun o Pol torom a taro
Tesalonaika
A wasiso talapor mugu
Ra o Pol i kis tong o Korin i tumus a pas ri, a manru na pas torom a taro Tesalonaika.
I longoro i lena, ara taro det wur nuknuk una inawan pat melet anun o Iesu. Ara taro det watungi lena, o Iesu i sa wanpat. Una pas ri, o Pol i ususer det una inawan pat anun o Iesu. I inanos det lena, a tene lakai warkurai in nanpat mugu, ma in toro a susut na taro. Numur o Iesu in nanpat melet, ra in warkurai a kum tene sakino. O Pol i inanos det kai lena, gong det tubunu wok, det in dekdek sur det in pam a wakak na petutna.
A inawan ina Manru na Pas Tesalonaika:
A turturkibin ina buk ri (1:1-2)
O God in warkurai a taro (1:3-12)
A tene lakai warkurai in nanpat mugu ma numur o Iesu in nanpat (2:1-17)
Det in pam a wakak na pinapam ma gong det tubunu wok (3:1-15)
A ururop na wasiso anun o Pol torom det (3:16-18)
1
Iau o Pol, o Sailas ma o Timoti, metul tumtumus torom mot a taro na lotu tong o Tesalonaika, mot ra mot laun un o God a Tamandat ma a Labino o Iesu Karisito.
Rom 1:7A marmaris ma a malmal torom mot tan o God a Tamandat ma a Labino o Iesu Karisito.
O God in pitar a warkurai na minabalu torom a taro
A kum tistisi metul, i wakak sur metul in ser watung wakak torom o God un mot. I tokodos lenra, uni anumot a nurnur i lubung dekdek, ma a marmaris torom mot etetalai kai i lubung nanan. 2 Kor 7:4; 1 Tes 2:19I mo ra, metul ut metul ser warango pas mot torom a taro na lotu anun o God una kum tamon. Metul ser warango pas mot una numot a tuntunur dekdek ma anumot a nurnur, ubalan a kum mamaut ra mot taramo i ma a kum ngunungut ra a taro det ban laulau mot nami.
A kum utna rop ri, i upuaso i lena, a warkurai anun o God i tokodos. Mot taramo a ngunungut, uni mot ulabo anun a matanitu. I mo ra, o God in watung mot lena, mot tokodos sur anun a matanitu. Rom 12:19O God i tokodos, ma in ukadik det ra det ukadik mot, 1 Tes 3:13ma in pitar a mana torom mot ra mot taramo a ngunungut, ma lenkutkai ra torom metul. O God in pami lenra, una bung ra a Labino o Iesu in nanpat tagisapat una langit nama kunabor na sungun ma anun a kum dekdek na ensel. Ais 66:15In ukadik det ra ka det tasman o God, ma ka det longoro a Wakak na Wasiso anun anundat a Labino o Iesu. Ais 2:10Det in taramo a warkurai na minabalu ra ken rop, i a iniru tukum, ma det in kis gisen gusun a Labino ma a minamarin a dekdekino. 10  Kol 3:4A warkurai ri in nanpat una bung ra a Labino in nanpat sur din ulabo pasi kibino una nun a tokodos na taro, ma det rop ra det nurnur uni det in ru i. Mot kai tomo nam det, uni mot nurnur una numetul a wasiso talapor torom mot.
11  Kol 1:9; 1 Tes 1:2-3I mo ra metul ser wararing sur mot torom anundat a God, sur in watung mot lena mot tokodos sur a ngas na nilaun ra i kabo pas mot suri. Ma una dekdekino in warut mot, sur mot in pam sot pas a kum wakak na pinapam ra mot nem na pami, ma a kum petutna rop ra anumot a nurnur i pam pati. 12 Metul wararing lenra, sur din ulabo pas a risan anundat a Labino o Iesu kibino un mot, ma o God kai in pitar a minamar torom mot. A kum utna rop ri, in nanpat kibino una marmaris anun anundat a God, ma a Labino o Iesu Karisito.

1:2: Rom 1:7

1:4: 2 Kor 7:4; 1 Tes 2:19

1:6: Rom 12:19

1:7: 1 Tes 3:13

1:8: Ais 66:15

1:9: Ais 2:10

1:10: Kol 3:4

1:11: Kol 1:9; 1 Tes 1:2-3