A Manru na Pas
anun o Pol torom
o Timoti
A wasiso talapor mugu
A buk ri a manru na pas anun o Pol torom o Timoti. O Pol i tumusi ra i kis una karabus tong o Rom. O Timoti i a tene pinapam tomo nam o Pol ma numur i wanpat ara mugumugu na lotu tong o Epeses.
O Pol i tasmani lena milau mo in mat, ra i tumus a pas ri. I nemi sur in udekdek a nurnur anun o Timoti. I inanosi kai lena, gong i mana gusun a warawai nama Wakak na Wasiso.
A inawan ina Manru na Pas Timoti:
A turturkibin ina pas ri (1:1-2)
O Pol i gas un o Timoti ma i nemi sur in dekdek una pinapam (1:3-2:13)
A magiran a lingmulus na tene pinapam (2:14-26)
A magiran a taro una kum ururop na bung (3:1-9)
O Pol i udekdek o Timoti (3:10-4:5)
O Pol i wasiso uni ut (4:6-18)
A ururop na wasiso anun o Pol torom o Timoti (4:19-22)
1
Iau o Pol, a aposel anun o Karisito Iesu una nemnem anun o God, sur an wasiso talapor una nilaun ra i sa uliliman tari torom dat un o Karisito Iesu. Ap 16:11; 1 Tim 1:2A tumus a pas ri torom ui Timoti, a wakak na nutunglik una nurnur. A marmaris ma a wakak na petutna ma a malmal, tan o God a Tamandat ma o Karisito Iesu anundat a Labino, in kis tomo nam ui.
O Pol i udekdek a nurnur anun o Timoti
Ap 23:1Una kum mirum ma a waspi, a ser wararing sur ui, ma a ser watung wakak torom o God. I ra a papam toromi nama tokodos na ninunuk, elar nama kum tumtubung tagun numugu. A nuk melet pasi ra u tangis iau, ma a nem doko i sur an tama ui sur an bukus nama gasgas. Ap 16:1A nuk pas anum a lingmulus na nurnur, ra i elar nama nurnur anun aru ino ri, o tubum o Lois ma o nam o Unis. A tasmani lena a ngas na nurnur ra, kura kai un ui. 1 Tim 4:14I mo ra a inanos ui melet sur un ukatutur melet anum a etabor, elar nama sungun ra di wupi ra i kunabor. A etabor ra, o God i tabor ui nami una bung ra a ubek aru lamang netes un ui. Rom 8:15Uni o God ke tabor dat nama nion na nginara, awu. I tabor dat nama Tokodos na Nion ra i pitar a dekdek torom dat, ma a marmaris ma a petutna ra ara taktakai in tamtamabat wakak anun a nilaun.
Ep 2:8-9; Tai 3:5Gong u maimai sur un wasiso talapor una nundat a Labino, ma gong u maimai un iau, ra uniri a kis una karabus una risano. Ikut, un waninar sur ui kai, un taramo a ngunungut una Wakak na Wasiso tomo nam iau. Ra un taramo a ngunungut, o God ut in pitar a dekdek torom ui. I ut i sa ulaun pas dat, ma i kabo pas dat sur a nilaun ra katu dur uni. Awu sur i kibino una nundat a kum wakak na pinapam, awu. I kibino ut una nun a nemnem, ma anun a marmaris, ra i pitar tari torom dat un o Karisito Iesu. Numugu utmakai, ra ke ukisi utmakai a rakrakon bual, i maris mugu dat. 10  Ibr 2:14Ra uniri, dat sa tama a marmaris anun o God torom dat, una inawan pat anun anundat a Tene Ulaun, o Karisito Iesu, i ra i urop ru a minat. Ma una Wakak na Wasiso, i upuaso a nilaun tukum sur in nanpat talapor.
11  1 Tim 2:7O God i sa pilok pas iau sur an tene warawai nama Wakak na Wasiso, an aposel ma an tene ususer kai uni. 12 Iri a kibino ra a taramo a ngunungut lenri. Ikut, ka maimai, uni a tasman o naro ra a nurnur uni, ma a tasman mulusi lena, in pet lar pasi sur in tamtamabat a pinapam, ra i sa pitar tari tang, tuk una bung na warkurai.
13 A tokodos na etowo ra a sa ususer tar ui nami, i elar nama wakak na malalar sur un muri. Un muri tomo nama nurnur ma a marmaris. A nurnur ma a marmaris anundat, ra kura dat un o Karisito Iesu. 14  1 Tim 6:20Una dekdekin a Tokodos na Nion ra i kis un dat, un tamtamabat wakak a Wakak na Wasiso ra o God i sa pitar tari tam.
15 U tasmani lena a taro rop, ra det kis una papor Asia, det sa wan pas gusun iau. O Pigelus ma o Emogenes aru tagun det. 16 A wararing sur o God in maris o Onesiporus det tamtamano, uni i ser ugasgas iau, ma ke maimai un iau ra a kis una karabus. 17 Ra i wanpat tong o Rom i sisio nanan ut sur iau, tuk i sio pas iau. 18 A wararing sur a Labino in maris o Onesiporus una bung na warkurai. U sa tasman wakak a kum pinapam na warut ra i sa pam tari torom iau tiro o Epeses.

1:2: Ap 16:11; 1 Tim 1:2

1:3: Ap 23:1

1:5: Ap 16:1

1:6: 1 Tim 4:14

1:7: Rom 8:15

1:8: Ep 2:8-9; Tai 3:5

1:10: Ibr 2:14

1:11: 1 Tim 2:7

1:14: 1 Tim 6:20