1 Ra i sa rop a limo na bung, o Ananias, a mugumugu na tene etabor torom o God ma a ramano kum mugumugu na lotu, ma o Tetulas, a tene mananos tagun a kum warkurai, det wanpat tong o Sisaria, ra det inanos o Peliks a labino mugumugu tagun a gapman una nundet a kum etakun un o Pol. 2 Ra di sa kabo pas o Pol, o Tetulas i turpas a wasiso torom o Peliks lena,

“Labino, met kis suano i una molmol utuntudu im. Una kum wakak na nuknukim, u ukodos a susut na utna sur anumet a kinkinis in wakak una nundat a papor. 3 Met nama taro tagun a kum tamon rop, met gas doko nama num a kum warkurai ma met watung wakak sakit torom ui. 4 Ikut kan wasiso suano i, sako a pinim in ngoro. A saring ui sur un maris met ma un longoro anumet tu nat na wasiso.

5  Ap 17:6“Met tama i lena a musano ri a tene pam purpuruon, i ser turpas a kum purpuruon epotor torom a taro Juda una rakrakon bual rop. Ma i a mugumugu tagun ara torotoro na lotu di watungi nama lotu Nasaret. 6-8  Ap 21:28-30Ma i nemi sur in ban udur a rumu na etabor sur in dur umatan o God. Ikut met pam ukai pasi. Ui ut un ting o Pol, sur un tasman a lingmulusino tano, una kum utna ri met takuni nami.”* Una ramano kum du buk una wasiso Grik, a ramano kum wasiso kai i kis una vers ri. I lenri: Ma met nemi sur met in warkurai i elar nama numet a Warkurai. Ikut o Lisias a labino mugumugu anun a kum tene inaim i ruk ra i dat gisen pasi gusun a lamamet nama dekdek. Ra i itula sur met ra met takun a musano ri, sur met in nan torom ui ma met in tur umatam ma met in inanos ui. 9 Numur a ramano taro Juda kai det warut una etakun, det watungi lena, a kum wasiso ri i lingmulus ut.

10 O Peliks, a labino mugumugu tagun a gapman, i pikmato o Pol sur in wasiso, ra o Pol i watungi lena, “A gas sur an wasiso batbat iau, uni a tasmani lena u sa tene warkurai a susut na kilalo torom met a taro Juda. 11 Ra un ting a taro, un tasmani lena, a noino ma ru bung bat iau kut, ra a wan usapat o Jerusalem, sur an lotu. 12 Ma det ra det takun iau, ka det tama tar iau ra mir in engaras nam taio ubalan in noworo ina rumu na etabor, ma ka det tama tar iau kai ra an upurpuruon a kunur na taro una kum rumu na lotu, o una balano tamon. 13 Ma ka det in ulingmulus lar pas anundet a kum etakun una kum utna ri ra det takun iau nami.

14 “Ikut uniri an inanos talapor ui lena, a ser mur a Kisapi anun o Karisito, ra det watungi nama torotoro na lotu. Una kisapi ri, a lotu ut torom o God anun a kum tumtubu met tagun numugu, ma a nurnur una kum utna rop ra di sa tumus tari una Warkurai anun o Moses ma una kum buk anun a kum poropet. 15  Jn 5:28-29Anung a nurnur un o God i elar nama taro ri. Iau kai a kis langlang nama nurnur lena o God in ukatutur melet pas a wakak na taro ma a laulau na taro gusun a minat. 16 Lenkutkai ra, a dekdek doko sur anung a nilaun in tokodos umatan o God, ma umatan a taro kai.

17 “A kabano kilalo, a kis gisen gusun o Jerusalem, ra numur a milet melet usapat sur an los tar a mani na etabor torom anung a taro ra det sibo, ma sur an pitari kai a kum wewegua sur din tun det elar nama etabor torom o God. 18  Ap 21:12-28Numugu ra ka ruk utmakai ubalan in noworo ina rumu na etabor, a sa pam rop tar a kum warkurai sur an talapor umatan o God. Ra a ruk sur an pam a pinapam na etabor, ka det pastorom iau nam lako susut na taro, ma ka pam tu purpuruon kai. 19 Ikut a ramano taro Juda tagitong una papor Asia, det kis una rumu na etabor una bung ra di pam ukai pas iau. Ra tu utna din takun iau nami, in wakak sur det ut det in nan urin ma det in takun iau umatam. 20 Ma i wakak sur det ra kuri det, det in watung tu sakino ra det sa sio pasi un iau, ra a tur umatan a taro na kiwung sapat o Jerusalem. 21  Ap 23:6Kutiro, det takun iau una nung ara wasiso kut. Ra a tur umatandet, a kakabo lena, ‘A tur una warkurai umatamot uniri, uni a nurnur una nilaun melet gusun a minat.’ ”

22  Ap 23:26O Peliks i talapor wakak ut una lotu ri di watungi nama Kisapi anun o Karisito, ra i umana tar a warkurai munung, ma i watungi lena, “Ra o Lisias, a labino mugumugu anun a taro na inaim in nanpat, an ubeki maragom a warkurai una etakun ri.” 23 Ra i inanos a mugumugu anun a kum tene inaim lena, “O Pol in kis na karabus una num a warkurai. Un tamtamabati nama marmaris, ma gong u turbat a kum paspasano sur det in waruti.”

24 A kabano bung bat tari, o Peliks i wanpat melet, der nama nun a ino o Darusila, a ino Juda. O Peliks i itula sur o Pol, ra i longoro anun a wasiso una nurnur un o Karisito Iesu. 25 O Pol i wasiso una tokodos na petutna, ma una petutna ra taio in tamtamabat wakak anun a nilaun, ma una bung na warkurai kai anun o God ra numur in nanpat, ra o Peliks i ngara, ra i watungi lena, “Pol, un nan munung. Un tu bung ra an langolango, an itula melet sur ui.” 26 Ra i ititula liklik suri, ra der ser wasiso tomo, uni i nemi utkai lena o Pol in ukodosi nam tu mani, sur in palos ru i.

27 Ra aru kilalo i sa rop, o Posius Pestus i keles ru o Peliks. Ikut o Peliks ke palos ru o Pol, uni i nemi sur in ugasgas a taro Juda.