11
O Iesu ma o Jon a Tene Baptaiso
(Lk 7:18-35)
Ra o Iesu i sa wasiso rop taru torom anun a noino ma aru nat na ususer, i wan tagitiro sur in ususer a taro ma in warawai una kum tamon, tong una papor Galili. O Jon i kis una karabus ma i longoro a kum pinapam anun o Karisito. Ra i tulu ru anun a kum nat na ususer sur det in tingi lena, “Ui mo, ra di wasiso mugu taru un ui lena, un nanpat, o met in kis langlang utmakai sur taio?” Ais 35:5-6; 61:1Ra o Iesu i balu det lena, “Mot in milet melet, ma mot in inanos o Jon una sau ri mot sa longoro i ma mot sa tama tari: A kum pulu det sa tamtama, det ra a kikindet i mat det sa wan tokodos, a kum lepra det sa langolango, a kum kutkut det sa longoro, a kum minat det sa laun, ma di warawai nama Wakak na Wasiso torom a kum sibo na taro. Osi ra i tama a kum utna ri a pami, ma anun a nurnur ke puku, i sa dan.”
Ra a kum nat na ususer anun o Jon det wan, o Iesu i inanos a kunur na taro un o Jon lena, “Una bung ra mot wan una nubual kalako taro uni torom o Jon, asau ra mot tamtama suri? Kutiro in nere ra i erere una wuwu? Awu. Asau ra mot wan sur mot in tama i? A musano ra i emar nama kum wakak na malu? Awu. Tama i, det ra det ser emar nama kum wakak na malu det ser kis una kum rumu na king. Asau ra mot wan sur mot in tama i? A poropet? Ma! A watungi tamot, o Jon i labo sakit taun a kum poropet. 10  Lk 1:76Di sa tumtumus taru uni una Buk Tabu lena,
‘Tama i, iau an tulu ru anung a tene los wasiso sur in mugu tam,
i ra in waninar anum a kisapi numugu tam.’ Mal 3:1
11 A inanos mot nama lingmulus, o Jon a Tene Baptaiso i labo sakit taun a taro rop taginin upiso. Ikut osi ra i natino sakit una matanitu tagisapat una langit, i labo taun o Jon.
12  Lk 16:16“Turpasi una kilalo ra o Jon a Tene Baptaiso i turpas a warawai ma tuk uniri, a matanitu tagisapat una langit i dekdek sur in lubung, ma a dekdek na taro det dekdek doko nama inaim sur det in turbati. 13 A kum poropet ma a Warkurai anun o Moses det upuaso a wasiso anun o God, tuk una kilalo ra o Jon i turpas anun a pinapam uni. 14  Mal 4:5; Mt 17:10-13; Mk 9:11-13Det wasiso una poropet Elaija ra in nanpat. Ra mot nem na nurnur una wasiso ra, uniri, o Jon i sa pam sot pasi, uni i a poropet Elaija ra in nanpat. 15 Osi ra arin talngano kura, i wakak sur in longoro nami.
16 “An elaro a taro tagun uniri nama sau? Det elar nama kum nat liklik ra det kis una balano tamon ma det kakabo torom a kum paspasan det lena,
17 ‘Met wup tulal,
ikut ka mot lagori,
ma met kele a kelekele na tupunuk,
ikut ka mot tangis.’
18 O Jon i wanpat, ke wan tu wakak na utna ma ke inum a wain, ra det watungi uni lena, ‘A laulau na nion kura uni.’ 19  Mt 9:14A Nutun a Musano i wanpat, i wangon ma i inum, ra det watungi uni lena, ‘Tama i, a musano ri a tene inangon ma a tene ininum, a pasan a kum tene los takis ma a kum tene sakino.’ Ikut a kum pinapam anun o God i upuaso i lena, anun a mananos i a mananos mulus.”
A warkurai na minabalu torom det ra ka det nukpukus
(Lk 10:13-15)
20 O Iesu i wasiso na kankan torom a taro una kum tamon ra i sa pam tar anun a susut na utna na ukisin doko tiro iai, uni ka det nukpukus. 21  Ais 23:1-18; Ese 26:1–28:26; Jol 3:4-8; Amo 1:9-10; Sek 9:2-4I watungi lena, “In laulau torom mot a taro Korasin, ma in laulau kai torom mot a taro Betsaida. Ra gunuk di sa pam tar a kum utna na ukisin ri torom a taro Tair ma o Saidon, elar nami ra a sa pam tari torom mot, kanapi det in nukpukus lakit ma det in tobo, det in emar nama kum malu na tupunuk ma det in talus a pinindet nama kubus na sungun. Ikut mot, ka mot nukpukus. 22 A watungi tamot lena, una bung na warkurai, a warkurai torom mot a taro Korasin ma o Betsaida, in laulau doko taun a warkurai torom a taro Tair ma o Saidon. 23  Ais 14:13-15; Stat 19:24-28Ma mot kai a taro Kapernaum, pepetlai, mot nuki lena din ulabo pas mot usapat netes? Awu, din woro pirso ru mot kut una labino sungun. Gunuk ra di sa pam tar a kum utna na ukisin torom a taro Sodom, elar nami ra di sa pam tari torom mot, kanapi o Sodom kuri utmakai i. 24  Mt 10:15; Lk 10:12A watungi tamot lena, una bung na warkurai, a warkurai torom mot a taro Kapernaum in laulau doko taun a warkurai torom a taro Sodom.”
Dat in nan torom o Iesu sur in umana dat
(Lk 10:21-22)
25  1 Kor 1:26-29Una du bung ra, o Iesu i watungi lena, “Tita, ui a Labino tagun a langit ma a rakrakon bual rop. A watung ulabo pas ui, uni u munu a kum utna ri tan a kum tene mananos ma det ra det tastasman, ma u upuaso i kut, torom det ra det elar nama kum nat liklik. 26 A lingmulus, Tita, uni anum a nemnem i lenutra.
27  Mt 28:18; Jn 3:35; 17:2; Pil 2:9; Jn 1:18; 10:15“O Tita i sa pitar tar a kum utna rop torom iau. Katutaio i tasman o Nutunu, o Tamano kut i tasmani, ma kataio kai i tasman o Tamano, o Nutunu kut i tasmani, ma det kai ra o Nutunu i nemi sur in upuaso o Tamano torom det.
28  Jer 31:25“Mot rop ra pinimot i ngoro ma a kum mamaut i monong mot, mot in nan torom iau, sur an umana mot. 29 Mot in los anung in nikip, ma mot in ususer tang, uni a magirang i wowowon ma a ser unatino pas iau. Mot in los in nikip ri sur a niomot in mana. 30  1 Jon 5:3Uni in nikip ri an pitari tamot ke ngangitin, ma a nilolosino ke maut.”

11:4: Ais 35:5-6; 61:1

11:10: Lk 1:76

11:12: Lk 16:16

11:14: Mal 4:5; Mt 17:10-13; Mk 9:11-13

11:19: Mt 9:14

11:21: Ais 23:1-18; Ese 26:1–28:26; Jol 3:4-8; Amo 1:9-10; Sek 9:2-4

11:23: Ais 14:13-15; Stat 19:24-28

11:24: Mt 10:15; Lk 10:12

11:25: 1 Kor 1:26-29

11:27: Mt 28:18; Jn 3:35; 17:2; Pil 2:9; Jn 1:18; 10:15

11:28: Jer 31:25

11:30: 1 Jon 5:3