17
A pinin o Iesu i tamtama senene
(Mk 9:2-13; Lk 9:28-36)
Numur tan a wonom na bung, o Iesu i ben pas o Pita, o Jems ma o Jon, i ra a tisin o Jems, ra i ben gisen pas detul usapat una tangai ra i tur toto bing. 2 Pit 1:16-18Tiro iai, detul tama a pinin o Iesu i wanpat senene. In masarino i sisio elar namin matanas, ma anun a kum malu kai i kabang doko elar nama talapor. Uniutra, a tulu nat na ususer detul tama pas o Moses der nam o Elaija der wanpat ra detul wasiso tomo nam o Iesu. O Pita i watungi tan o Iesu lena, “Labino, i wakak ra dat in kis nin. Ra u nemi, an pam lako tulu turturup, ara anumi, ara anun o Moses, ma ara kai anun o Elaija.”
Sng 2:7; Ais 42:1; Mt 3:17; Mk 1:11; Lk 3:22; Lo 18:15Ra i wasiso utmakai, a du bakut ra i talapor doko i pulus bat pas det. Ma in nalngan ara tagisapat una du bakut ra, i watungi lena, “Iri a Nutunglik, a nat na wakak, a gas doko nami. Mot in longoro i.” Ra a tulu nat na ususer detul longoro i, detul ngara doko, ra detul puku pirso nama matandetul una piso. Ikut o Iesu i wan torom detul, ra i pam detul ma i watungi lena, “Motul katutur, gong motul ngara.” Ra detul tamtama toto, ka detul tama melet taio, o Iesu sot mukut kura i.
Ra det wan pirso nanan tagisapat una tangai, o Iesu i turbat tar detul lena, “Gong motul inanos tar taio un asau ri motul sa tama tari, tuk una bung ra a Nutun a Musano in katutur melet gusun a minat.”
10  Mal 4:5Ma anun a tulu nat na ususer detul tingi lena, “Sur asau ra a kum tene ususer tagun a Warkurai det watungi lena o Elaija in nanpat mugu?” 11 I balu detul lena, “A lingmulus ut, o Elaija in nanpat mugu ma in ukodos melet a kum utna rop. 12  Mt 11:14Ikut uniri a watungi torom motul lena, o Elaija i sa wanpat taru, ma ka det tasman lele i, det pam a kum sakino petutna uni, elar ut nam anundet a nemnem. Lenkutkai ra torom a Nutun a Musano, in taramo a ngunungut ulaman a taro.” 13  Lk 1:17Ra a tulu nat na ususer detul tasmani maragom lena, i wasiso torom detul un o Jon a Tene Baptaiso.
O Iesu i lakro ru a laulau na nion gusun ara natlik
(Mk 9:14-29; Lk 9:37-43)
14 O Iesu ma a tulu nat na ususer det wanpat nisan a kunur na taro, ra ara musano i wan torom o Iesu, i kis butkeke numugu nisano, 15 ma i watungi lena, “Labino, un maris a nutunglik a nat musano, i ser mat lalang, ma i ser taramo a labino ngunungut. A susut na bung i ser puku una sungun, o una danim. 16 A sa ben tari munung torom anum a kum nat na ususer, ikut ka det pet lar pasi sur det in ulangolango i.”
17 O Iesu i balu i lena, “Mot a taro tagun uniri, ka mot nurnur ma mot a kum tene sakino. A sa kis suano i torom mot. Nangisin mo mot in nurnur? Mot in ben a nat ra urin torom iau.” 18 O Iesu i wasiso dekdek torom a laulau na nion, ra i pirso mut gusun a natlik. Ra una du bung utra i langolango.
19  Mt 10:1Numur a kum nat na ususer det wan torom o Iesu, ma det ting eno i lena, “Ilai ra ka met lakro lar pas a laulau na nion gusuni?” 20-21  Mt 21:21; Mk 11:23; Lk 17:6; 1 Kor 13:2Ma i balu det lena, “Uni anumot a nurnur i natino doko. A inanos mot nama lingmulus, ra anumot a nurnur in natino elar namin pitino mastad, mot in pet lar pasi sur mot in watungi tan a tangai ri lena, ‘Un karai taginin utong,’ ra in karai kut. Katu utna in ngangitin torom mot.”* Una ramano kum du buk una wasiso Grik, a ramano kum wasiso kai i kis una vers ri. I lenri: Ikut, a ngas na laulau na nion lenri in pirso kut una niaring ma a winewel, awu sur un tu utna kai.
O Iesu i wasiso melet una nun a minat ma a katkatutur melet
(Mk 9:30-32; Lk 9:43-45)
22  Mt 16:21O Iesu ma anun a kum nat na ususer det wan tomo tong una papor Galili, ra i watungi tandet lena, “Din pitar a Nutun a Musano ulaman a taro 23 ma det in um doko i. Numur tan a tulu bung o God in ulaun melet pasi.” Ra a kum nat na ususer det longoro i, det tupunuk doko uni.
A takis sur a rumu na etabor
24  Kis 30:13; 38:26O Iesu ma anun a kum nat na ususer det wanpat tong o Kapernaum, ra det ra det ser los takis sur a rumu na etabor, det wan torom o Pita ma det tingi lena, “Anumot a tene ususer i ser pitar a takis sur a rumu na etabor o awu?” 25 Ra i mulaot lena, “Ma.”
O Pita i ruk una rumu, ra o Iesu i wasiso mugu mut, ra i tingi lena, “Saimon, asau u nuki, a kum king taginin upiso det ser los a takis ma a ikul tan osi? Tan a kum nutnutun det o tan a taro gisen?” 26 Ra i balu i lena, “Tan a taro gisen.” O Iesu i watungi tano lena, “Ra i lenra, a kum nutnutun det, det langolango, ka det ser kul a takis. 27 Ikut, sur gong dar ban ukankan det, un nan usa utasi ma un boko. In mugano kiripo ra un dat pasi, un pagom a wano, ra un los pas a mani gusuni. Ma un los tari torom det sur a takis anundar rop.”

17:2: 2 Pit 1:16-18

17:5: Sng 2:7; Ais 42:1; Mt 3:17; Mk 1:11; Lk 3:22; Lo 18:15

17:10: Mal 4:5

17:12: Mt 11:14

17:13: Lk 1:17

17:19: Mt 10:1

17:20-21: Mt 21:21; Mk 11:23; Lk 17:6; 1 Kor 13:2

*17:20-21: Una ramano kum du buk una wasiso Grik, a ramano kum wasiso kai i kis una vers ri. I lenri: Ikut, a ngas na laulau na nion lenri in pirso kut una niaring ma a winewel, awu sur un tu utna kai.

17:22: Mt 16:21

17:24: Kis 30:13; 38:26