25
A wasiso elelar una noino toraro
Tam 19:7; Lk 12:35“Una du bung ra, a matanitu tagisapat una langit in elar nama noino toraro, ra det los pas anundet a kum lam, ma det wan sur det in barato a musano ra i nolin matok. A limo tagun det, det mananos, ma a limo kai tandet, ka det mananos. Det ra ka det mananos det los anundet a kum lam, ikut ka det los lako kum koto na wel kai tomo nam det. Ikut, det ra det mananos det los anundet a kum lam ma det losi utkai a kum koto na wel tomo nam det. A musano ra i nolin matok ke wanpat lakit, ra a matandet i sunu, ma det inep dumun rop.
“Ra una labino mirum di kakabo lena, ‘Wo, a musano ra i nolin matok i sa wanpat! Mot iap, mot in barato i.’ A kum toraro rop det tuangun, ma det waninar anundet a kum lam. Det ra ka det mananos, det saring det ra det mananos lena, ‘Mot in tabor met nam lakalik wel, uni anumet a kum lam det sa ling na mat.’ Det balu det lena, ‘Awu, sako ken elar nam dat rop. Mot in nan torom det ra det siuru wel ma mot in kukul pas.’ 10 Ikut ra det wan sur det in kukul, a musano ra i nolin matok i wanpat. A limo ra det sa waninar, det wan tomo nami sur a lukaro na unolin, ra di tagar bat a matansako.
11  Lk 13:25-27“Numur a limo ra ka det mananos det wanpat, ma det kakabo lena, ‘Labino, labino, un papos pas met.’ 12  Mt 7:23I balu det lena, ‘A inanos mot nama lingmulus, ka tasman mot.’
13  Mt 24:42“I mo ra mot in tumarong, uni ka mot tasman a bung o a du bung ra a Labino in nanpat uni.
A wasiso elelar una tulu tultul
(Lk 19:11-27)
14 “A matanitu tagisapat una langit i elar utkai nam ara musano ra i waninar sur in nan utiro una ra tamon gisen. I kabo pas anun a tulu tultul, ra i isuaro tar anun a kum ululeng tandetul sur detul in papam nami. 15  Rom 12:6I pitar tar a limo na arip na mani tan ara, ma aru arip tan ara, ma ara arip kai tan ara. I pitar tari torom detul taktakai elar ut nam anundetul a mananos. Ra numur i wan una nun a inawan. 16 O naro ra di pitar tar a limo na arip na mani tano, i wan lakit ma i papam nami, ma i ulabo melet pas a limo na arip taguni. 17 Lenkutkai ra torom o naro ra di pitar tar aru arip na mani tano, i ulabo melet pas aru arip taguni. 18 Ikut, o naro ra di pitar tar ara arip na mani tano, i wan, i kil pas in nutung, ma i por eno tar a mani anun a labino anunu.
19 “Ra i sa suano i, a labino anun a tulu tultul, i wanpat ma i kabo pas detul sur detul in inanos kapo i una nun a mani. 20 O naro ra di pitar tar a limo na arip na mani tano i wan toromi nama limo na arip melet, ra i watungi tano lena, ‘Labino, u pitar tar a limo na arip na mani tang. Tama i, a sa ulabo melet pas a limo na arip taguni.’ 21  Mt 24:45-47; Lk 16:10Anun a labino i balu i lena, ‘Wakak sakit, ui a wakak na tultul, u lingmulus una num a pinapam. An ubek tar ui sur un tamtamabat lako susut na utna, uni u lingmulus una kum nat na utna ri. Ra uniri dar in nan ma dar in gas tomo.’
22 “O naro ra di pitar tar aru arip na mani tano i wan toromi, ma i watungi lena, ‘Labino u pitar tar aru arip na mani tang. Tama i, a sa ulabo melet pas aru arip taguni.’ 23 Anun a labino i balu i lena, ‘Wakak sakit, ui a wakak na tultul, u lingmulus una num a pinapam. An ubek tar ui sur un tamtamabat lako susut na utna, uni u lingmulus una nat na utna ri. Ra uniri dar in nan ma dar in gas tomo.’
24 “Numur, i ra di pitar tar ara arip na mani tano i wan toromi, ra i watungi lena, ‘Labino, a tasmani lena ui a tene ngalngalia. U ser pasong pas a utna ra ko marut tari, ma u git pasi kai, a win a utna ra ko marut tari. 25 A ngaran ui, ra a wan, a por eno tar anum a mani. Iri melet mi anum a mani.’ 26 Anun a labino i balu i lena, ‘Ui a laulau na tultul, a tabalamat na musano ui. U sa tasman tari lena, a pasong a utna ra ka marut tari, ma a git pasi kai a wino utna ra ka marut tari. 27 Ilai ra ko ubek tar anung a mani una beng sur an los pas anung a mani ma tu sibano kai una bung ra an nanpat uni? 28 Mot in los ru a mani gusuni, ma mot in pitar tari torom o naro ra anun a noino arip na kina. 29  Mt 13:12; Mk 4:25; Lk 8:18Uni, osi ra i utur ukai a labino, din tabor meleti sur anun a utna in labo bing, ma osi ra ke utur ukai tu utna, din rakon ru asau lik ra kura i pam ukai i. 30  Mt 8:12; Lk 13:28Ra mot in woro pirso ru a tultul ri, ra ke gas un tu utna, una dumirum, a nubual ra di tangtangis ma di ungingit lokondi iai.’
A Nutun a Musano in isuaro a taro una bung na warkurai
31  Mt 16:27; 19:28“A Nutun a Musano in nanpat nama nun a minamar, tomo nama nun a kum ensel, ra in kis una nun a kiskis na king. A kiskis ra a labino minamarino. 32  Ese 34:17; Tam 20:11-13A taro tagun a kum gapman rop det in nan tomo umatano, ma in isuaro det, elar nama tene tamtamabat anun a kum sipsip i isuaro a kum sipsip gusun a kum meme. 33 In tulu a kum sipsip sur a papor sot na lamano, ma a kum meme sur a papor kair. 34 A king in watungi tandet ra kura una papor sot na lamano lena, ‘Mot wan urin, mot ra o Tita i sa watung udan tar mot. Mot in rakon pas a matanitu di sa waninar tari sur anumot, tagun numnumugu utmakai una turturkibin ina rakrakon bual. 35  Ais 58:7Uni a murak ra mot tabor iau, a muruk ra mot inum iau, a usiro ra mot ben ruk iau una rumu. 36 Ka tin namalu anung ra mot pitar in namalu tang, a misait ra mot tamtamabat iau, ma a kis una karabus ra mot lumu iau.’
37 “A kum tene tokodos det in tingi lena, ‘Labino, nangisin met tama ui ra u murak ma met tabor ui, o u muruk ra met tabor ui nam lako danim? 38 Nangisin met tama ui ra u usiro ra met ben ruk ui una rumu, o ka tin namalu anum ra met pitar in namalu tam? 39 Nangisin met tama ui ra u misait, o u kis una karabus, ra met lumu ui?’
40  Snd 19:17; Mt 10:42; Mk 9:41“A king in balu det lena, ‘A inanos mot nama lingmulus, asau ra mot sa pam tari torom tu musano oros kut tagun a kum tistising ri, mot sa pam tari ut un iau.’
41  Mt 7:23“In watungi bulung torom det una papor kair na lamano lena, ‘Mot wan gisen gusun iau. A dekdekin a warkurai na minabalu i sa kis un mot. Mot nan una labino sungun ra ken mat, ra di sa waninar tari sur o Satan ma anun a kum ensel. 42 Uni a murak ra ka mot tabor iau, a muruk ra ka mot inum iau. 43 A usiro ra ka mot ben ruk iau una rumu, ka tin namalu anung ra ka mot pitar tin namalu tang, a misait ma a kis una karabus ra ka mot lumu iau.’
44 “Det bulung det in tingi lena, ‘Labino, nangisin met tama ui ra u murak, o u muruk, o u usiro, o ka tin namalu anum, o u misait, o u kis una karabus, ra ka met warut ui?’
45 “In balu det lena, ‘A inanos mot nama lingmulus, asau ra ka mot pam tari torom tu musano oros kut, ka mot pami kai un iau.’ 46  Dan 12:2; Jn 5:29Ra det in nan sur a ngunungut tukum. Ikut a kum tene tokodos det in nan sur a nilaun tukum.”

25:1: Tam 19:7; Lk 12:35

25:11: Lk 13:25-27

25:12: Mt 7:23

25:13: Mt 24:42

25:15: Rom 12:6

25:21: Mt 24:45-47; Lk 16:10

25:29: Mt 13:12; Mk 4:25; Lk 8:18

25:30: Mt 8:12; Lk 13:28

25:31: Mt 16:27; 19:28

25:32: Ese 34:17; Tam 20:11-13

25:35: Ais 58:7

25:40: Snd 19:17; Mt 10:42; Mk 9:41

25:41: Mt 7:23

25:46: Dan 12:2; Jn 5:29