26
Det wasiso tomo pas sur det in um doko o Iesu
(Mk 14:1-2; Lk 22:1-2; Jn 11:45-53)
Ra o Iesu i sa watung rop tar a kum wasiso ri, i inanos anun a kum nat na ususer lena, Kis 12:1-27; Mt 20:18“Mot tasmani ut, ra aru bung in rop, din turpas a labino bung na lotu na Wanlakai, ra din pitar tar a Nutun a Musano sur din sak wati unin nanai kutus.”
Una du bung ut ra a kum lamlabino tene etabor torom o God ma a kum mugumugu anun a taro, det kis tomo una labino rumu anun o Kaiapas, a mugumugu na tene etabor. Det wasiso tomo pas sur det in pam ukai eno pas o Iesu, ma det in um doko i. Det watungi lena, “Gong dat pami una labino bung na lotu, sako a taro det in kankan ma det in ukatutur tu inaim.”
Ara ino i lingis in nopolo sangsangnain unin lorin o Iesu
(Mk 14:3-9; Jn 12:1-8)
O Iesu i kis tong o Betani, una rumu anun o Saimon, i ra numugu i misait nama lepra. Lk 7:37-38Ara ino i wan torom o Iesu namin nokoto ra di pami nama wat. Tiro ubalan nin nokoto, a polo sangsangnain kura uni, ma a matano i ka doko. I lingisi unin lorin o Iesu, ra kura utmakai o Iesu i wangon. A kum nat na ususer det tama i, ra det kankan doko uni, ma det watungi lena, “Sur asau ra di lingis orosi kut in nopolo sangsangnain ri? Ilai ra ka di siuru pasi sur lako labino mani sur din tabor a kum sibo na taro nami?”
10 O Iesu i sa tasman asau ra det wasiso uni, ra i watungi tandet lena, “Ilai ra mot pitar a maut torom a ino ri? I sa pam tar a wakak na pinapam sakit un iau. 11  Lo 15:11A kum sibo na taro det in laun bolbolos tomo ut nam mot. Ikut iau, kan kis tukum nisamot. 12 I sa lingis tar in nopolo sangsangnain ri una pining sur in waninar iau sur a bung ra an mat ma din uruk a minating una kulam na minat. 13 A inanos mot nama lingmulus, una kum tamon una rakrakon bual rop, ra din warawai nama Wakak na Wasiso ri, din inanos utkai un asau ra a ino ri i sa pam tari, sur a risano in tur na aim.”
O Judas i nemi sur in pitar tar o Iesu ulaman a kum mugumugu
(Mk 14:10-11; Lk 22:3-6)
14 O Judas Iskariot, ara tagun a noino ma aru nat na ususer, i wan torom a kum lamlabino tene etabor torom o God. 15  Sek 11:12; Jn 11:57Ma i ting det lena, “Ra an pitar tar o Iesu ulamamot, asau mot in kul iau nami?” Ma det pitar tar a tulu noino silwa tano. 16 Turpasi una bung ra i nuknuk sur tu wakak na du bung ra in pitar tar o Iesu ulamandet.
O Iesu tomo nama nun a kum nat na ususer det wan a utna na Wanlakai
(Mk 14:12-21; Lk 22:7-14, 21-23; Jn 13:21-30)
17  Kis 12:14-20Una mugano bung una kum lamlabino bung na lotu na beret ra kalako is uni, a kum nat na ususer det wan torom o Iesu, ma det tingi lena, “U nemi sur met in waninar andat a utna sur a labino bung na lotu na Wanlakai awai?” 18 Ra i balu det lena, “Mur in nanpat sapat o Jerusalem, mur in etorom nam ara musano, ra mur in watungi tano lena, ‘A Tene Ususer i watungi lena: Anung a bung i sa milau. Met nam anung a kum nat na ususer met in ukinalong a labino bung na lotu na Wanlakai munung una num a rumu.’ ” 19 A ru nat na ususer der pam soti ut asau ra o Iesu i sa watung tari tander, ma der waninar a utna na Wanlakai.
20 Ra i sa lirop, o Iesu tomo nama nun a noino ma aru nat na ususer det kis una inangon. 21 Det wangon ra i watungi lena, “A inanos mot nama lingmulus, ara tagun mot in pitar tar iau ulaman a kum ebar.” 22 Det tupunuk doko ra det rop taktakai det turpas a iting toromi lena, “Labino, awu sur iau niko?” 23  Sng 41:9O Iesu i balu det lena, “O naro ra mir puk tomo amir aru du beret una dis, i ut ra in pitar tar iau ulaman a kum ebar. 24 A Nutun a Musano in mat elar nami ra di sa tumus tari una Buk Tabu. Ikut in laulau sakit torom a musano ra in pitar tari torom a kum ebar. In wakak toromi ra ka din ususi, sur gong i taramo a dekdek na warkurai ra uni.” 25 O Judas, i ra in pitar tari torom a kum ebar, i tingi lena, “Tene Ususer, awu sur iau niko?” I balu i lena, “Ui ut ra.”
A ururop na inangon anun a Labino
(Mk 14:22-26; Lk 22:14-20; 1 Kor 11:23-25)
26 Det wangon utmakai, ra o Iesu i los pas a beret, i watung wakak pas uni, i tibiki, ma i tabor anun a kum nat na ususer nami, ra i watungi lena, “Mot in rakoni ma mot in nani. Iri a pining.” 27 Numur i los pas a kap, i watung wakak pas uni ra i pitari tandet. I watungi lena, “Mot rop mot in inum taguni. 28  Kis 24:8; Jer 31:31-34; Sek 9:11; 1 Kor 10:16Iri a gaping, a kunubus ra i dat tomo tar a taro nam o God. A gaping ri, i tilingis sur in unus ru a kum sakino petutna anun a susut na taro. 29 A watungi tamot lena, kan inum meleti mo lako wain, tuk ra dat in inum a matok na wain una matanitu anun o Tita.”
30  Lk 22:39; Jn 18:1Ra det sa kele tar a kelekele na lotu, det wan tito usapat una Tangai na Oliw.
O Iesu i wasiso mugu taru un o Pita ra in ipul
(Mk 14:27-31; Lk 22:31-34; Jn 13:36-38)
31  Jn 16:32O Iesu i watungi tandet lena, “Miri umirum, mot rop mot in nan pas kut gusun iau, i kibino una kum utna ra in nanpat un iau. Elar nami ra di sa tumus tari una Buk Tabu lena,
O God i watungi lena, ‘An um a tene tamtamabat anun a kum sipsip,
ra a kum sipsip det in kalabor susuaro.’ Sek 13:7
32  Mt 28:7, 16Ikut, ra a sa katutur melet gusun a minat, an mugu utong o Galili.” 33 O Pita i watungi tano lena, “Ra det rop det in nan pas gusun ui, ikut iau awu.” 34  Mt 26:69-75O Iesu i watungi tano lena, “A inanos ui nama lingmulus, miri umirum, a kereke ken kurkurirakuk utmakai, ra un ipul a tulu dino lena, ko tasman iau.” 35 O Pita i watungi tano lena, “Kan ipul ru ui. Ra iau kai an iru tomo nam ui, i wakak kut.” Ma a kum nat na ususer rop kai det watungi lenutra.
O Iesu i wararing tiro o Getsemani
(Mk 14:32-42; Lk 22:39-46)
36 O Iesu tomo nam anun a kum nat na ususer det wanpat una nubual a risano o Getsemani, ra i watungi tandet lena, “Mot in kis kut nin, ma iau an nan lilik utong, sur an wararing pas.” 37 Ra i ben pas o Pita tomo nama ru nutnutun o Sebedi. Una du bung ut ra, i tupunuk ma i maut doko a nuknukino. 38  Jn 12:27I watungi tandetul lena, “Anung a nilaun i maut doko nama tupunuk, milau mo an mat nami. Motul in kis kut nin, ma motul in koikoi taru ut tomo nam iau.” 39 I wan lilik taru usa numugu, i puku tuntudung taru una piso, ma i wararing lena, “Tita, ra gunuk in sot, un los ru a kap na mamaut ri gusun iau. Ikut gong u mur anung a nemnem, un muri ut anum a nemnem.”
40 I milet melet torom a tulu nat na ususer, ra i tama detul, detul sa inep dumun. I ting o Pita lena, “Pepetlai, ka motul in pet lari sur motul in koikoi tomo nam iau un tu du bunglik kut? 41 Motul in koikoi, ma motul in wararing, sur gong motul puku una ululam. A niomotul i nemi, ikut a pinimotul i tungulu kut.”
42 A manru na dino melet i wan gusun detul, ma i wararing lena, “Tita, ra ken sot sur un los ru a kap na mamaut ri gusun iau, an inumi ut. An muri ut anum a nemnem.” 43 I milet melet, ra i tama detul, detul sa inep dumun melet, uni a matandetul i sa sunu doko. 44 Ra i wan melet gusun detul, i mantulu wararing, ra i watung melet a niaring ra i sa watung tari munung.
45 Ra i milet melet torom a tulu nat na ususer, i watungi tandetul lena, “Pepetlai, motul in inep liklik mukut ma motul in mana? Tama i, a du bung i sa milau, ra din pitar tar a Nutun a Musano ulaman a kum tene sakino. 46  Jn 14:31Motul katutur, dat na wan! Tama i, a musano ra in pitar tar iau ulaman a kum ebar, i sa wanpat.”
Di dat pas o Iesu
(Mk 14:43-50; Lk 22:47-53; Jn 18:3-12)
47 Ra o Iesu i wasiso utmakai, o Judas, ara tagun a noino ma aru nat na ususer, i wanpat, det nama kunur na taro. Det los a kum totok na inaim ma a kum nalnal. A kum lamlabino tene etabor torom o God ma a kum mugumugu anun a taro, det tulu ru det. 48 O naro ra in pitar tar o Iesu ulaman a kum ebar i sa inanos mugu tar a kunur na taro una ukinalong ra in pami lenri, “O naro ra an gom a pangpagor na wano, i ut ra. Mot in pam ukai i.”
49 Uniutra o Judas i wan torom o Iesu ra i watungi lena, “Wakak na mirum, Tene Ususer!” Ra i gom a pangpagor na wano. 50 O Iesu i watungi tano lena, “Pasang, un pami kut asau ra u wan urin suri.” Ma a taro ra, det wan torom o Iesu, det pam ukai i ma det dat pasi.
51  Jn 18:26Ara tagun det ra det wan tomo nam o Iesu, i dat pas anun in totok na inaim, ra i tau kutus ru in talngan a tultul anun a mugumugu na tene etabor torom o God. 52  Stat 9:6; Tam 13:10O Iesu i watungi tano lena, “Uruk melet anum in totok una bano, uni det rop ra det etau nama kum totok na inaim, det in iru nama kum totok na inaim. 53 Pepetlai, u nuki lena, in ngangitin sur an saring o Tita sur lako susut na arip na ensel, ra uniutri in tulu ru det torom iau? 54 Ikut, ra an pami lenra, ka din pam sot pas a kum wasiso na Buk Tabu una kum utna ri ra i sot sur din pami un iau.”
55  Lk 19:47; 21:37Una du bung ra, o Iesu i watungi tan a kunur na taro lena, “Pepetlai, kutiro iau a tene inaim ma a tene wolong, sur i mo ri mot wanpat nama kum totok na inaim ma a kum nalnal sur mot in pam ukai pas iau? Una kum bung rop a ser kis ubalan in noworo ina rumu na etabor, a ser ususer a taro, ma ka mot pam ukai iau. 56 Ikut a kum utna rop ri i wanpat sur din pam sot pas a kum tumtumus anun a kum poropet.” Numur anun a kum nat na ususer rop det kalabor susuaro pas gusuni.
O Iesu i tur una warkurai umatan a taro na kiwung
(Mk 14:53-65; Lk 22:54-55, 63-71; Jn 18:13-14, 19-24)
57 Det ra det sa pam ukai pas o Iesu, det beni utiro una rumu anun o Kaiapas a mugumugu na tene etabor torom o God. A kum tene ususer tagun a Warkurai ma a kum mugumugu kura det sa wan tomo. 58 O Pita i mur nanan o Iesu, ikut i bakbak ut gusuni, tuk una nubual anun a mugumugu na tene etabor torom o God. I ruk una nubual ra, ma i kis tomo nama kum tene tamtamabat sur in tama asau ra din pami un o Iesu.
59 A kum lamlabino tene etabor torom o God, tomo nama taro na kiwung rop, det sisio sur tu torotoro na wasiso un tu sakino utna ra o Iesu i sa pam tari, sur det in takuni nami, ma det in um doko i uni. 60 A susut na tene torotoro det wanpat, ikut ka det sio lar pas tu utna ra det in takuni nami. Aru ra der wanpat murmur, 61  Jn 2:19-21der watungi lena, “A musano ri i watungi lena, ‘An rege ru a rumu na etabor ri anun o God, ma an pam melet pasi una tulu bung kut.’ ”
62 A mugumugu na tene etabor torom o God i tur, ra i ting o Iesu lena, “Pepetlai, kon balu det? Asau ra un balu a kum wasiso na etakun ri nami?” 63  Ais 53:7; Mt 27:12Ikut o Iesu ke wasiso. A tene etabor ra, i watungi tano lena, “Una risan o God, ra i laun, un inanos met ra ui a Karisito a Nutun o God, o awu.”
64  Sng 110:1; Dan 7:13; Mt 24:30O Iesu i watungi tano lena, “I ut ra u sa watungi. Ma a watungi tamot lena, turpasi uniri, mot in tama a Nutun a Musano in kis una papor sot na laman o God, i ra i dekdek sakit, ma numur mot in tama i ra in nanpat una kum du bakut tagisapat una langit.” 65  Mt 9:3; Jn 10:33A mugumugu na tene etabor i kankan ra i raros anun in namalu ut, ra i watungi lena, “I sa wasiso laulau un o God. Dat nem melet lako wasiso na etakun sur asau? Tama i! Mot sa longoro tar anun a kum wasiso laulau un o God. 66  Wkp 24:16; Jn 19:7Asau mot nuki?” Ra det balu i lena, “I wakak sur in iru.”
67  Ais 50:6; 53:5Ma det ibis in masarino, ma det tubuli, ra ara taro det pasori, 68 ra det watungi lena, “Karisito, ui a poropet, un inanos met. Osi ra i takalo ui?”
O Pita i ipul ru o Iesu
(Mk 14:66-72; Lk 22:56-62; Jn 18:15-18, 25-27)
69 Ra o Pita i kis utmakai nago upiso una rumu ra, ara toraro, a tultul i wan toromi ra i watungi lena, “Ui kai ara tagun det ra mot ser wan tomo nam o Iesu a te Galili.” 70 Ikut i ipul umatandet rop, i watungi lena, “Ka tasman asau ra u wasiso uni.” 71 Ra i wan utong nisan a matansako ina in noworo, ara toraro bulung i tama pasi, ra i watungi tan a taro tiro iai lena, “A musano ri, der ut nam o Iesu a te Nasaret.” 72 Ma i ipul melet, i liliman lena, “A lingmulus ut, ka tasman a musano ra.”
73 Numur lilik, det ra det tur tiro iai det wan torom o Pita, det watungi tano lena, “A lingmulus ut ra ui kai ara tagun det. Met longoro lele ui kut una num a liu na wasiso.” 74 Ma i liliman torom det lena, “Ra an toro o God in warkurai dekdek iau. Ka tasman a musano ra.” Ra uniutra a kereke i kurkurirakuk mut. 75  Mt 26:34Ma o Pita i nuk pas a wasiso ra o Iesu i sa watung tari tano lena, “A kereke ken kurkurirakuk utmakai, ra un ipul a tulu dino lena, ko tasman iau.” Ra i pirso gusun a nubual ra, ma i tangis dokodoko i.

26:2: Kis 12:1-27; Mt 20:18

26:7: Lk 7:37-38

26:11: Lo 15:11

26:15: Sek 11:12; Jn 11:57

26:17: Kis 12:14-20

26:23: Sng 41:9

26:28: Kis 24:8; Jer 31:31-34; Sek 9:11; 1 Kor 10:16

26:30: Lk 22:39; Jn 18:1

26:31: Jn 16:32

26:32: Mt 28:7, 16

26:34: Mt 26:69-75

26:38: Jn 12:27

26:46: Jn 14:31

26:51: Jn 18:26

26:52: Stat 9:6; Tam 13:10

26:55: Lk 19:47; 21:37

26:61: Jn 2:19-21

26:63: Ais 53:7; Mt 27:12

26:64: Sng 110:1; Dan 7:13; Mt 24:30

26:65: Mt 9:3; Jn 10:33

26:66: Wkp 24:16; Jn 19:7

26:67: Ais 50:6; 53:5

26:75: Mt 26:34