27
Di pitar tar o Iesu torom o Pailat
(Mk 15:1; Lk 23:1-2; Jn 18:28-32)
Una kobot raut, a kum lamlabino tene etabor rop torom o God ma a kum mugumugu anun a taro, det wasiso tomo pas un o Iesu sur din um doko i. Det ker pas aru lamano, det beni ra det pitari ulaman o Pailat, a labino mugumugu tagun a gapman.
O Judas i popos
(Ap 1:18-19)
O Judas, i ra i pitar tar o Iesu ulaman a kum ebar, i tasmani lena di sa warkurai tar o Iesu sur in mat, ra a labino tupunuk i losi. I milet ra i pitar melet ru a tulu noino silwa torom a kum lamlabino tene etabor torom o God ma a kum mugumugu. Ma i watungi lena, “A sa pam tar a sakino petutna, uni a sa usobor tar o naro ra ke pam tu sakino.” Ra det balu i lena, “Met, met lai? Ui ut!” Ap 1:18-19; Mt 26:14-15I woro ru a tulu noino silwa una rumu na etabor, ra i wan ma i popos.
A kum lamlabino tene etabor torom o God det los pas a kum silwa, ra det watungi lena, “Ke tokodos una Warkurai sur dat in ubek a mani ri una ululeng na mani, uni a mani ri a ikul tagun a musano ra di um doko i.” Ra det wasiso tomo pas uni, ma det kul pas a du piso gusun a tene pam kuro nama piopap, sur din porpor a kum minat ina kum usiro tiro iai. I mo ra di watung a nubual ra nam “A piso na gap,” ma a taro det watungi ut lenra tuk uniri. Sek 11:12-13Lenra di pam sot pas a wasiso ra o Jeremaia a poropet i sa watung tari numugu lena, “Det los pas a tulu noino silwa, a matano ra a taro Israel det ubek tari una musano ra. 10 Ma a tulu noino silwa ra di kul pas a du piso anun a tene pam kuro nama piopap, elar nama Labino i watung tari tang.”
O Pailat i ting o Iesu
(Mk 15:2-5; Lk 23:3-5; Jn 18:33-38)
11 O Iesu i tur umatan o Pailat, a mugumugu tagun a gapman, ma a mugumugu i tingi lena, “Ui a king anun a taro Juda?” Ra o Iesu i balu i lena, “I ut ra u sa watung tari.” 12  Ais 53:7A kum lamlabino tene etabor torom o God ma a kum mugumugu det takuni, ikut ke balu det. 13 Ra o Pailat i tingi lena, “Ko longoro a susut na utna ri det takun ui nami?” 14 Ke balu det un tu etakun ra det takuni nami, awu. Ra a mugumugu tagun a gapman i kisin doko uni.
Di pitar a warkurai sur o Iesu in mat
(Mk 15:6-15; Lk 23:13-25; Jn 18:39–19:16)
15 Una kum kilalo rop una kum lamlabino bung na lotu na Wanlakai, a mugumugu tagun a gapman i ser palos ru ara karabus ra a taro det sasaring suri. 16 Una kilalo ra, ara musano a risano o Barabas i kis una karabus una nun a kum lamlabino sakino petutna, ma a taro rop det tasmani. 17 A kunur na taro det wanpat tomo torom o Pailat, ra i ting det lena, “Osi ra mot nemi sur an palos ru i torom mot? O Barabas o o Iesu, i ra di watungi nama Karisito?” 18  Jn 11:47-48; 12:19I watungi lenri, uni i sa tasmani lena, a kum mugumugu anun a taro Juda, det pitar tar o Iesu toromi una sakino nuknukin det. 19 Ra o Pailat kura utmakai i pam a warkurai, anun a ino i pitar ru a wasiso toromi lena, “Gong u pam tu utna una tene tokodos ra, katu niraro anunu. Uni nanganong mirum, a ririon, ma a kum utna a tama i una musano ra, i ban laulau anung a nilaun.”
20 Ikut a kum lamlabino tene etabor torom o God ma a kum mugumugu det ukatutur a balan a kunur na taro sur det in sasaring sur o Barabas, ma sur din um doko o Iesu. 21 A mugumugu tagun a gapman i ting det lena, “Osi na pasander ra mot nemi sur an palos ru i torom mot?” Det balu i lena, “O Barabas.” 22 O Pailat i ting det lena, “Asau ra an pami un o Iesu, i ra di watungi nam o Karisito?” Det rop det balu i lena, “Sak wati unin nanai kutus!” 23 Ma i ting det lena, “Sur asau? Asi na sakino utna ra i sa pam tari?” Ikut det kukukuk dekdek lena, “Sak wati unin nanai kutus!”
24  Lo 21:6-9O Pailat i tama i lena, ke pet lar pas tu utna mo, ma a labino purpuruon milau in nanpat. Ra i los pas a danim, i gos pas aru lamano umatan a kunur na taro, ra i watungi lena, “A langolango gusun a gapin a tene tokodos ri. Mot ut din warkurai mot uni.” 25  Ap 5:28A taro rop det balu i lena, “I wakak kut, a warkurai na minabalu una gapino in kis un met ma una kum nutnutumet kai.” 26 O Pailat i palos ru o Barabas torom det. Ra di sa takalo tatar o Iesu, i pitar tari tan a kum tene inaim sur det in sak wati unin nanai kutus.
A kum tene inaim det urongon laulau un o Iesu
(Mk 15:16-20; Jn 19:2-3)
27 A kum tene inaim anun a mugumugu tagun a gapman det dat pas o Iesu utiro urumu una labino rumu anun anundet a mugumugu. Ra det ben tomo pas a kum tene inaim rop toromi. 28  Lk 23:11Det palos ru anun a kum malu, ma det mar tari namin merek na malu. 29 Ra det liko pas in narus a loklokono ma det ubek tari unin lorino elar nama kukup anun a king. Det upampam tari namin nubuku una sot na lamano* In merek na malu, a kukup ma in nubuku detul tamtama elar nama ememar anun a king. ma det kis butkeke umatano, ma det urongon laulau uni lena, “Ui a king anun a taro Juda!” 30  Ais 50:6Ma det ibisi, det rakon pas in nubuku gusuni, ma det raprapus in lorino nami. 31 Ra det sa urongon laulau papas uni, det palos ru in namalu gusuni. Det mar tari melet nama nun a kum malu, ma det ben pirso i sur din sak wati unin nanai kutus.
Di sak wat o Iesu unin nanai kutus
(Mk 15:21-32; Lk 23:26-43; Jn 19:17-27)
32 Det pirso ra det barato pas ara te Sairini, a risano o Saimon, ma det ungongos tari sur in los in nanai kutus anun o Iesu. 33 Det wanpat una nubual ra di watungi nam o Golgota, a kukuraino a “Nubual na Lor na Minat.” 34  Sng 69:21Det pitar tar a wain tan o Iesu, ra di sa pam tomo tari nam ara utna ra i mapak. I inum tama i, ikut ke nemi sur in inumi. 35  Sng 22:18Ra det sa sak wat tari unin nanai kutus, det pilai laki sur det in isuaro anun a kum malu torom det taktakai. 36 Numur det kis ma det tamtamabat o Iesu. 37 Sapat netes tan in lorin o Iesu unin nanai kutus, det ubek tar a wasiso na etakun uni, di tumus tari lena,
IRI O IESU, A KING ANUN A TARO JUDA.
38  Ais 53:12Ma di sak wat tari kai aru tene wolong tomo nami una arin nanai kutus, ara una papor sot, ma ara kai una kair. 39  Sng 22:7; 109:25Det ra det wanan sakit o Iesu, det watung laulau i ma det lele lorindet toromi. 40  Mt 26:61; Jn 2:19Ma det watungi lena, “Ui mo ra u watungi lena un rege ru a rumu na etabor ma un pam melet pasi una tulu bung kut, uniri un ulaun pas ui mo. Ra ui a Nutun o God, un pirso gusun in nanai kutus.” 41 A kum lamlabino tene etabor torom o God ma a kum tene ususer tagun a Warkurai ma a kum mugumugu, det kai det urongon laulau un o Iesu, det watungi lena, 42 “I ulaun pas a taro gisen, ikut ken ulaun lar pasi ut. Ra i a King anun a taro Israel, uniutri in pirso gusun in nanai kutus ma dat in nurnur uni. 43  Sng 22:8I nurnur ut un o God. Ra o God i nemi, uniutri in ulaun pasi, uni i ut i sa watung tari lena, ‘Iau a Nutun o God.’ ” 44 Aru tene wolong ra der kete tomo nami, der kai der watung laulau i.
O Iesu i mat
(Mk 15:33-41; Lk 23:44-49; Jn 19:28-30)
45 Turpasi una noino ma aru pakano bung una suan, tuk una tulu pakano bung una lirop, a bual rop i dumirum. 46 Ra i tulu pakano bung, o Iesu i kukukuk dekdek lena, “Eloi, Eloi, lema sabakatani?” A kukurai ina wasiso ra i lenri, “Anung a God, anung a God, ilai ra u wan gusun iau?” Sng 22:1
47 Ara taro tagun det ra det tur milau det longoro i, ra det watungi lena, “O naro ri i kakabo sur o Elaija.” 48  Sng 69:21A iapiap kut, ara tagun det i kalabor, ra i los pas ara utna ra i ser dop a polo. I puk pasi una wain ra i mititir, i ubek pasi unin nanai ra i tulsu toto i usapat sur o Iesu in inumi. 49 Ara taro kai tagun det, det watungi lena, “Te, dat in madek tari munung. Dat in tama i ra o Elaija in nan pirso sur in ulaun pasi, o awu.” 50 O Iesu i kukuk dekdek melet pas, ra i ubek ru anun a nilaun.
51  Kis 26:31-33; Ibr 10:19-20Una du bung ut ra, in namalu ra di mabat kutus nami sa urumu una rumu na etabor i tararos potor, turpasi tagisapat netes tuk unago piso. A guri i wanpat, ma a kum watat det tapagol. 52 A kum kulam na minat det papos, ma a susut na taro anun o God ra det sa mat, det katutur melet. 53 Det pirso gusun a kum kulam na minat. Ma numur tan a katkatutur melet anun o Iesu, det wanpat sapat o Jerusalem, a tamon anun o God, ma det tur pat torom a susut na taro. 54 A mugumugu anun a kum tene inaim, ma det kai ra kura tomo nami ra det tamtamabat o Iesu, det taramo a guri, ma det tama a kum utna ra i wanpat, ra det ngara doko. Det watungi lena, “I lingmulus ut, a musano ri a Nutun o God.”
55  Lk 8:2-3A susut na wardain kai ra det mur o Iesu tagitong o Galili sur det in waruti, det tur bakbak taru ut, ma det tama a kum utna ri. 56 Kura epotor tandet, a tulu ino kai ri, o Maria Magdalen, ma o Maria a nan o Jems ma o Josep, ma a nan aru nutnutun o Sebedi.
Di inep tar o Iesu una kulam na minat
(Mk 15:42-47; Lk 23:50-56; Jn 19:38-42)
57 Ra i sa lirop, ara tene gongon, a te Arimatia, a risano o Josep, i kai ara nat na ususer anun o Iesu, 58  Lo 21:22-23i wan torom o Pailat ma i saring pas a minatin o Iesu tano. Ra o Pailat i itula sur din pitar tari tano. 59 O Josep i los pas a minatino, ma i pulus pasi namin wakak na matok na malu, 60  Ais 53:9ra i inep tari una nun a matok na kulam na minat, ra i sa kil tari una papor wat. I bulus bat tar a matansako na kulam ra nama labino wat, ra i wan gusuni. 61 O Maria Magdalen ma o Maria kai, a nan o Jems ma o Josep, der kis taru numugu tan a kulam na minat.
Det tamtamabat a kulam na minat
62 Una bung numur, a Bung na Sabat, a kum lamlabino tene etabor torom o God ma a kum Parisi det wan tomo torom o Pailat. 63  Mt 12:40; 16:21; Mk 9:31; 10:33-34; Lk 9:22; 18:31-33; Jn 2:19-21Det watungi tano lena, “Labino, met nuk pas a wasiso anun a tene torotoro ri. Ra i laun utmakai, i watungi lena, ra a tulu bung in rop, in laun pat melet. 64 Un tulu ru lako taro sur det in tamtamabat wakak a kulam na minat, elar nama tulu bung, sako anun a taro na ususer det in nanpat ma det in wolong pas a minatino, ra det in inanos a taro lena i sa laun melet gusun a minat. Ra a torotoro ri anundet, in labo taun a torotoro ra numugu o Iesu i sa watung tari.” 65 O Pailat i watungi tandet lena, “Uniutri mot in ben pas a kum tene tamtamabat ma mot in nan. Mot in tamtamabat wakak a kulam na minat elar ut nam anumot a mananos.” 66 Ra det wan, ma det udekdek bat tar a kulam na minat. Det ubek a ngas na ukinalong sur det in tasman pasi kut lena taio i sa papos tari. Ma det utur tar a kum tene tamtamabat sur det in tamtamabati.

27:5: Ap 1:18-19; Mt 26:14-15

27:9: Sek 11:12-13

27:12: Ais 53:7

27:18: Jn 11:47-48; 12:19

27:24: Lo 21:6-9

27:25: Ap 5:28

27:28: Lk 23:11

*27:29: In merek na malu, a kukup ma in nubuku detul tamtama elar nama ememar anun a king.

27:30: Ais 50:6

27:34: Sng 69:21

27:35: Sng 22:18

27:38: Ais 53:12

27:39: Sng 22:7; 109:25

27:40: Mt 26:61; Jn 2:19

27:43: Sng 22:8

27:48: Sng 69:21

27:51: Kis 26:31-33; Ibr 10:19-20

27:55: Lk 8:2-3

27:58: Lo 21:22-23

27:60: Ais 53:9

27:63: Mt 12:40; 16:21; Mk 9:31; 10:33-34; Lk 9:22; 18:31-33; Jn 2:19-21