A Pas anun o Pol torom
o Pilimon
A wasiso talapor mugu
O Pol i tumus a pas ri torom o Pilimon. O Pilimon i ara labino musano tagun a tamon Kolosi, ma a tene nurnur kai. Anun ara tene ititula, a risano o Onesimus, i kalabor pas gusuni. Numur di ukarabusi, ra i etorom pas o Pol una karabus. O Pol i warawai toromi ra i nukpukus. Ra di palos ru o Onesimus, o Pol i nemi sur in milet melet torom anun a mugumugu o Pilimon, ra i tumus a pas ri torom o Pilimon sur o Onesimus in losi. I inanosi lena, gong i kankan torom o Onesimus, in gas pasi kut, uni i sa nukpukus, ma i nurnur un o Iesu elar nam o Pilimon.
A inawan ina Pas Pilimon:
A turturkibin ina buk ri (1-3)
A wakak na petutna anun o Pilimon (4-7)
O Pol i nemi sur o Pilimon in gas pas o Onesimus (8-22)
A ururop na wasiso anun o Pol torom o Pilimon (23-25)
1
Iau, o Pol, a karabus, uni a nurnur un o Karisito Iesu. Mir nam o Timoti a tisindat, mir tumus a pas ri torom ui Pilimon, a wakak na pasamet una pinapam, Kol 4:17; 2 Tim 2:3ma torom o Apia a tisindat a ino, ma torom o Arkipus a pasandat una inaim nama Wakak na Wasiso, ma torom a taro na lotu ra mot ser wan tomo una num a rumu. A marmaris ma a malmal anun o God a Tamandat, ma a Labino o Iesu Karisito in kis tomo nam mot.
A marmaris ma a nurnur anun o Pilimon
Ra a wararing, a ser nuk pas ui, ma a watung wakak torom o God un ui. Uni a longoro i lena, u nem a taro rop anun o God, ma u nurnur una Labino o Iesu. A wararing lena, un upuaso anum a nurnur un o Karisito torom a taro ma un ususer det uni. Ra un pami lenri, in warut ui sur un mananos una kum wakak na utna rop anundat ra i kis un o Karisito. 2 Kor 7:4Tisinglik, anum a marmaris torom a taro anun o God i sa pitar tar a labino gasgas tang, ma i uragot iau, uni u ugasgas a nilaun anundet.
O Pol i saring o Pilimon sur o Onesimus
Ara utna a nem doko i sur un pami. I topas iau sur an wasiso dekdek torom ui uni, uni dar tar tisino un o Karisito. Ikut, a saring wakak ui, uni a nem ui. Iau, o Pol, a sa takano, ma uniri a kis na karabus, uni a nurnur un o Karisito Iesu, 10  Kol 4:9; 1 Kor 4:15a saring pas anum a nimulaot un o Onesimus, a nutunglik una nurnur. I wanpat torom iau ra a kis una karabus, ma i nukpukus. Ra uniri, i elar nama nutunglik mulus ut una nurnur. 11 Numugu ke gas matano sur in papam torom ui, ikut uniri, i a wakak na tene pinapam mo, torom ui ma iau.* A rising Onesimus a kukuraino lena, “i topasi ut a pinapam.”
12 Uniri a tulu ru i milet mo torom ui. Ra i wan gusun iau, i elar nam ara kukur tagun anung a nilaun i wan tomo nami. 13 A nemi sur in kis mukut tomo nam iau, sur in keles ui Pilimon, ma in warut iau, ra a kis una karabus uni a warawai nama Wakak na Wasiso. 14 Ikut ka nemi sur an ungongos pas ui sur un warut iau, ui ut un pami elar nama num a gasgas. Kan pam tu utna, tuk ui ut un mulaot. 15 Kutiro o Onesimus i kis gisen lilik pas kut gusun ui, sur i mo ri, in kis tukum tomo nam ui. 16  1 Tim 6:2Uniri ken elar melet mo nama tene ititula, in elar nama tisimlik mulus una nurnur. A nem doko i, ikut a tasmani lena, anum a marmaris toromi i labo taun a marmaris ra a marisi nami, uni, i anum a tene pinapam ma a tisimlik kai una Labino.
17 Ra u nuki lena dar pasano, un gas melet pas o Onesimus, elar nami ra un gas pas iau ut. 18 Ra i sa pam tar tu sakino torom ui, o i sa los pas anum tu utna, iau mukut an balu i. 19 Iau o Pol, iau ut a tumus a wasiso ri nama lamang: an balu asau ra torom ui. Kan watung tu utna tam, ui ut u sa tasman tari lena, a matok na nilaun ra u sa los pasi, i kibino ut un iau, ma i elar nama dinau torom ui. 20 A lingmulus, tisinglik, una risan a Labino, a nemi sur un gas melet pas o Onesimus. Ui a tisinglik un o Karisito, un ugasgas anung a nilaun. 21 Ra a tumus a pas ri, a tasman mulusi lena, un muri ut anung a sasaring torom ui, ma a tasmani kai lena un pam a utna in labo taun asau ra a saring ui suri.
22  Pil 1:25; 2:24Ara utna kai: A saring ui sur un waninar tu kukur rumu sur iau, uni a nurnur lena, o God in upirso ru iau gusun a karabus sur an milet melet torom mot. Iri a win anumot a kum niaring.
A ururop na wasiso na marmaris
23  Kol 1:7O Epapras, i ra i karabus tomo nam iau, uni i nurnur un o Karisito Iesu, i pitar ru anun a marmaris torom ui. 24  Kol 4:10-12, 14; 1 Tim 4:10-11Ma det kai ri, o Mak, o Aristakus, o Demas ma o Luk. Met paspasano tomo una pinapam.
25 A marmaris anun a Labino o Iesu Karisito in kis una niomot.

1:2: Kol 4:17; 2 Tim 2:3

1:7: 2 Kor 7:4

1:10: Kol 4:9; 1 Kor 4:15

*1:11: A rising Onesimus a kukuraino lena, “i topasi ut a pinapam.”

1:16: 1 Tim 6:2

1:22: Pil 1:25; 2:24

1:23: Kol 1:7

1:24: Kol 4:10-12, 14; 1 Tim 4:10-11