Buk Baibel long tokples Kandas Rom 11

O God i ulaun pasi kut a pak na taro Israel

1 I mo ra a iting lena, pepetlai, o God i rosumur gusun anun a taro? Awu, i nuk pas det ut. Iau kai, a te Israel ut, o tubun o Abaram ma tagun a kabotaro Benjamin. 2 O God ke rosumur gusun anun a taro, ra numugu utmakai i sa tasman tar det. Pepetlai, ka mot tasman asau ra a Buk Tabu i watungi un o Elaija? I eloklok tan o God una sakino petutna ra a taro Israel det pami. I watungi lena, 3 “Labino, det sa um doko ru anum a kum poropet, ma det sa rege ru i kai a kum kabulu na tuntun etabor torom ui. Ma iau sot mukut kuri, ma det nemi sur det in um doko iau kai.” 1 Kin 19:10, 14

4 Ikut o God i balu o Elaija lena, “Anung a wonom mawit na arip na taro kura ut, ra ka det lotu torom o Bal*.” 1 Kin 19:18

5 Lenkutkai ra uniri, o God i sa pilok pas a pak na taro, kibino una nun a marmaris. 6 O God i sa pilok pas det una nun a marmaris ut, awu sur una kum pinapam ra det pami. Gunuk ra o God in pilok pas det kibino una kum pinapam ra det pami, awu sur a marmaris ra.

7 Asau dat in watungi? A taro Israel det sisio sur tu kisapi ra det in tokodos uni umatan o God, ikut ka det sio pasi. Det kut ra i sa pilok pas det, det sio pasi, ma ara taro kai, awu. I udekdek bat a balandet. 8 Elar nami ra di sa tumus tari una Buk Tabu lena,

“O God i utalara a nuknukin det,

ma i upulu a matandet, sur gong det tamtama,

ma i ukutkut a talngandet, sur gong det longoro,

tuk uniri.” Lo 29:4

9 Ma o Dewid kai i watungi torom a Labino lenri,

“Ra det kis tomo una nundet a lu na inangon,

un pukusi sur in elar namin nukun torom det,

elar nama uben ra i pam sikot det,

elar nam in nutung ra det puku dorong uni,

ma a warkurai na minabalu kai.

10 Un upulu bat a matandet

sur gong det tamtama,

ma un madek tar det,

sur a surundet in bul tukum una labino maut.” Sng 69:22-23

O God i ulaun a taro ra awu sur a taro Israel

11 I mo ra a iting melet lena, pepetlai, ra a taro Israel det puku, det puku tukum? Awu! Ikut, o God i ulaun pas a taro gisen, kibino una sakino petutna anun a taro Israel, sur in ukatutur a nuknukin a taro Israel, sur det kai det in nemnem sur o God in ulaun pas det. 12 Ra a taro Israel det rosumur gusun a kisapi ra o God in ulaun det uni, o God i watung udan a taro gisen tagun a rakrakon bual. Ra i los ru a wasiso na udan gusun a taro Israel, i pitar tari torom a taro gisen. Ikut ra a taro Israel rop det in milet melet torom o God, a taro tagun a rakrakon bual det in dan sakit.

13 Uniri a tumtumus torom mot a taro ra awu sur a taro Israel. Mot tasmani lena a papam na aposel torom mot. Ma a ulabo pas anung a pinapam, uni i maut doko. 14 Una nung a pinapam ri, a nemi sur an ukatutur a nuknukin anung a kabotaro, sur lako taro tagun det, det in nemnem sur a wakakino ra o God i pam tari un mot, ra in ulaun pas det. 15 O God i rosumur munung gusun a taro Israel, sur in marom nama taro gisen tagun a rakrakon bual. Ra o God in ben melet pas a taro Israel, in wakak sakit, in elar nami ra det sa katutur melet gusun a minat. 16 An wasiso elelar lenri: Ra a mugano du beret di pitari torom o God, elar nama ngasino anun a taro Israel, in kudulano beret rop anun o God. Ra a wakakor nin nanai di pitari torom o God, a kum kanokano kai anun o God ut.†

A wasiso elelar una arin nanai na oliw

17 A taro Israel det elar namin nanai na oliw mulus, ma mot a taro gisen mot elar namin lomlom nin nanai na oliw. O God i pak ru a ramano kum kano gusun in nanai na oliw mulus. I los pas a ramano kum kano lomlom na oliw, ma i pam a bading tomo namin nanai na oliw mulus. Ra uniri, mot laun tagun a polo ra i wan gusun a wakakor nin nanai na oliw mulus. 18 Gong mot tama pisopiso a kum kano ra di sa pak ru det. Ra mot tama pisopiso det, mot in nuk pasi lena, in wakakor nin nanai ut i pitar a nilaun torom mot a kum kano, awu sur a nilaun i wan tagun mot. 19 Kutiro mot in watungi lena, “O God i pak ru a ramano kum kano sur in kubus tar iau una nubual ra di sa pak ru det gusuni.” 20 A lingmulus ut, o God i pak ru det uni ka det nurnur. Ikut mot, mot tur dekdek uni mot nurnur. Gong mot ulabo pas mot, mot in ngara. 21 Uni o God ke maris bat a kum kano tagun in nanai na oliw mulus. Ra i pami lenra torom det, in pami kai lenra torom mot ra ka mot nurnur.

22 I mo ra mot in tama a marmaris ma a kankan anun o God. I ese anun a kankan torom det ra det wan gisen gusuni, ma i ese anun a marmaris torom mot, ra mot tur dekdek una nun a marmaris, ma ka mot mana gusuni. Ikut, ra awu, in pak ru mot kai. 23 Ma a taro Israel kai, ra det in nurnur det kai din kubus tomo melet det namin nanai na oliw mulus, uni i topas o God sur in kubus tomo melet det. 24 O God i pak pas mot gusun in lomlom nin nanai na oliw, ma i kubus tomo tar mot namin nanai na oliw mulus, ra awu sur tagun mot. Ra i pami lenra, ke ngangitin sur in kubus tomo melet a kum kano tagun in nanai na oliw mulus namin nanai ino.

O God i nem na ese anun a marmaris torom a taro rop

25 A kum tistising, a nemi sur mot in mananos una utna ra numugu i kis eno, sur gong mot ulabo pas mot. I lenri: Ara taro Israel, in dekdek a balandet, tuk ra a niluluk ina taro gisen ra det nurnur in elar nama nuknukin o God. 26 Una kisapi ri, o God in ulaun rop pas a taro Israel. Elar nami ra di sa tumus tari una Buk Tabu lenri,

“A Tene Ulaun in nanpat tagisapat o Saion,

ma in ben pukus a kabotaro anun o Jekop gusun anundet a petutna na rosumur gusun o God. ‡

27 Ra iri a kunubus ra an pami tomo nam det,

an lakro ru anundet a kum sakino petutna.” Ais 59:20-21; 27:9

28 A taro Israel det a kum ebar anun o God, uni ka det nurnur una Wakak na Wasiso, sur in udan mot a taro gisen. Ikut, o God i maris doko det, uni i pilok pas a kum tumtubun det tagun numugu. 29 Uni o God ke ser los pukus anun a kum etabor ma ke ser pukus a nuknukino gusun a taro ra i sa kabo pas det. Awu!

30 Numugu, mot a taro ra awu sur a taro Israel, mot ser pitarngat torom o God. Ikut uniri, mot sa rakon anun a marmaris, uni a taro Israel det pitarngat toromi. 31 I lenkutkai ra, uniri a taro Israel det pitarngat torom o God, sur det in rakon anun a marmaris, uni i maris mot. 32 Uni o God i madek tar a taro rop sur anundet a pitarngat in ker det, sur in ese anun a marmaris torom det rop.

A watung ulabo torom o God

33 Nandet! I labo sakit a kum wakak na ululeng anun o God,

anun a wakak na nuknuk ma anun a mananos.

A warkurai anun o God i labo sakit, kataio in palos lar pasi.

Katutaio i tasman anun a kum kisapi.

34 “Osi i tasman a nuknukin o God?

Ma osi i wasiso waruti?” Ais 40:13

35 “Osi ra i sa tabor tar o God nam tu utna sur in balu i toromi?” Jop 41:11

36 Uni i ut i ukis a kum utna rop,

ma i ut i kibin a kum utna rop,

ma anunu ut a kum utna rop.

Dat in watung ulabo pas o God, ken rop ma ken rop. Amen.