Ang Sulat Para sa Mga Hebreohanun
1
Ang Dios Naghambal paagi sa Anang Bata
1 Katong una pa gid naghambal ang Dios sa atun mga kamal-aman paagi sa mga propeta sa raku gid nga beses kag sa nagkalain-lain nga mga paagi. 2 Pero sa kadyang urihing mga inadlaw naghambal tana kanatun paagi sa anang Anak mismo nga amo ang anang gintalana nga mangin manunubli kang tanan nga mga butang. Paagi sa anang Anak nga dya gintuga kang Dios ang kalibutan. 3 Ang gamhanan nga himaya kang Dios nagasirak sa anang Anak kag kon ano ang kinaiya kang Dios amo man ang ana kadya. Paagi sa anang gamhanan nga pulong padayon na nga ginatipigan ang tanan nga butang sa bilog nga kalibutan. Pagkatapos nga gintinloan na ang katawhan sa mga kasal-anan nagpungko tana sa tuo nayon*1:3 Sa tuo nayon kang Dios- nagatumud kang pinakadungganun nga katungdanan kang pinakagamhanan sa tanan.
4 Gani nga ang Anak mas labing gamhanan sangsa mga anghel, amo man nga mas labing dungganun ang ngaran nga gintugro kana kadya sangsa ngaran kang mga anghel. 5 Hay wara ang Dios maghambal sa bisan kay sin-o nga mga anghel nga,
“Ikaw akun Anak;
Kadya nga adlaw ako nangin Amay nimo.Ӡ1:5 Mga Salmo 2:7
Kag ang Dios wara man maghambal nga,
“Ako mangin anang Amay,
Kag tana mangin akun Anak.”
6 Kang ipadara run kang Dios ang anang panganay ‡1:6 ukon Bugtong nga Anak rugya sa lupa, naghambal tana,
“Ang tanan nga mga anghel kang Dios dapat magsimba kana.”§1:6 Deuteronomio 32:43
7 Kon nahanungud tana sa mga anghel amo dyaay ang ginhambal kang Dios,
“Ang anang mga anghel ginhimo na nga daw hangin,
ang mga surugoon na nga dya ginhimo na nga daw kalayo nga nagadaba-daba.”*1:7 Mga Salmo 104:4
8 Pero sa anang Anak tana, amo dya ang ginkuon kang Dios kana,
“Ang imo pagginahum, O Dios,
magapadayon gid sa wara ti katapusan.
Kag matarung gid ang imo paggahum sa imo ginharian.
9 Nalipay ikaw sa matarung nga buhat,
Gani ginpili ikaw kang Dios, nga imo Dios,
kag gintugroan kang tuman nga kalipay labaw sa imo nga mga kaimawan.Ӡ1:9 Mga Salmo 45:6-7
10 Kag nagkuon man ang Dios sa anang Anak,
“Ikaw Ginoo, katong una pa gid,
ang nagtuga kang kalibutan,
kag ang kalangitan, ikaw man kabay ang naghimo kadya?
11 Dya sanda magataliwan, pero ikaw magapabilin man gihapon.
Magadaan sanda tanan kadya nga daw bayo.
12 Pareho kang kunup, pagapid-un mo sanda kadya,
kag pagaislan nga daw bayo.
Pero ikaw tana amo man angud,
Magapabilin ikaw hasta sa wara ti katapusan.”‡1:12 Mga Salmo 102:25-27
13 Pero sa mga anghel tana, ang Dios wara gid naghambal sa bisan kay sin-o kananda nga,
“Pungko lang ikaw sa akun tuo nayon §1:13 sa tuo nayon nagatumud kang pinakadungganun nga katungdanan
hasta nga himoon ko ang imo mga kaaway
nga turungtongan kang imo mga kahig.” *1:13 Ukon hasta nga pyerdihun ko ang tanan nimo nga mga kaaway. Mga Salmo 110:1
14 Kar-on, ano gid haw ang mga anghel nga dya? Sanda tanan kadya, mga ispirito nga nagaalagad sa Dios nga anang ginasugo para sa pagbulig sa mga tawo nga magaagum kang kaluwasan.
*1:3 1:3 Sa tuo nayon kang Dios- nagatumud kang pinakadungganun nga katungdanan
†1:5 1:5 Mga Salmo 2:7
‡1:6 1:6 ukon Bugtong nga Anak
§1:6 1:6 Deuteronomio 32:43
*1:7 1:7 Mga Salmo 104:4
†1:9 1:9 Mga Salmo 45:6-7
‡1:12 1:12 Mga Salmo 102:25-27
§1:13 1:13 sa tuo nayon nagatumud kang pinakadungganun nga katungdanan
*1:13 1:13 Ukon hasta nga pyerdihun ko ang tanan nimo nga mga kaaway. Mga Salmo 110:1