Leetal ya ésupiyenu ya eyya Saŋ naakiice ya
2 Saŋ
Waah wa weeyem wa ti leetal eyye
Aluu pakanam keeyemaam ka ti káasiitan, inci kicanaa.
Aŋe leetal ya ésupiyenu ya eti Saŋ. Leetal eyye, ayme akiice yo? Eekiice yo ya, ayonkalaayonkal faŋoo “áhampaatiin a” (1), pale ti káawincinool, úyiniyaayini hisoku nii oonool oonooluu eekiice ya leetal ya éyaañ ya, akina ayem Saŋ, anapana ya ati Yéesu.
Teyme Saŋ naakiice leetal eyye? Máamun ti caanak ca coonool ca ta naakiice ta Saŋ éyaañ ya. Hikaw ha lompo hiti leetal eyye, hoonool huu niŋ Saŋ éyaañ ya.
Ti pakayme Saŋ naakiice leetal eyye? Leetal eyye, akiicaakiic yo ti “aal aŋa Pútuun pa mpimamale ya niŋ epuukoo” (1). Keemeeŋe nkasok nii, aal a aŋe niŋ epuukoo káyiniyini piyeno canku niŋ éyeniin ya eteyyo.
Heetaake ha hikaw ti leetal eyye, hikaayaakaay fo ti waah úhaaciil:
1. Kéeyinane ka kálafooli (5-6);
2. Kaloŋ ti eloŋ eti tooñaa (4,6,9);
3. Káhin kata kati kafaas faŋii ti pikalaŋana pa keeneetaat ka pánipani (7-11).
Alaapalaka ti káasiitan ka kitaaluu. Alímaati Pútuun pa pípankin kunuu unaa, mpúwiiniyan saan unaa kati úyiniyaa kasayan hilim etempo, ti caacaw ca citi Añii etempo Yéesu Krista. Amíini.
Ⅰ
Kakican ka
Ⅰ Aŋe inci áhampaatiin a yemuu ti hikiicu, inci kicanuu awe aal a aŋa Pútuun pa mpimamale ya, niŋ epuuki, payenka inci íllafiye ka ti tooñaa ya. Neetaat inci lamayam láfiye aluu, pale niŋ payenka púlooŋ keemeya ka tooñaa ya. Ⅱ Uláfilafi aluu kamma tooñaa ya neekine ti unaa, neeyeno niŋ unaa fo cancowiyaaw. Ⅲ Waah wa úhaaciil ewwe efuuyeno niŋ unaa: panap, paket hikaw niŋ kásuumaay. Ewwuu, ti Pútuun pa Paapaa ya núufulii niŋ ti Yéesu Krista, Añii ya ati Paapaa ya, ti tooñaa niŋ pálafi.
Eloŋ ti tooñaa niŋ pálafi
Ⅳ Inci intaak pásuuma penfakat ta inci ímpannume ta nii pakakee ti epuuki unka ti eloŋ ti tooñaa ya samat nii fa Paapaa ya naasoke fa unaa. Ⅴ Fiye, aaluu, inci luumuu, úlafooliyaa. Inci neetaati ti hikiicu hilim héeyeeni pale hilim eeha núusiyaa kápiliŋ ti púcook pa. Ⅵ Aŋe ayem pálafi: útuulaa kilim enka Pútuun pa mpuwufane ka unaa. Ehe hilim ha: samat nii fa ínnisiye fa kápiliŋ ti púcook pa, pusok, nílafooli.
Ⅶ Sokaasok eehe kamma hícump picaakoola pakan nkahancalooliye ti púlunta pa, kéeyinanut ka nii Yéesu Krista ákeyyookey samat nii an. An óo an eecuke nii payenkuu, oom an, acaakoola niŋ lompo akamool a ati Eenucee ya. Ⅷ Ooto nitah kunuu timpi nípuul páhin empa núuhine pa, pale ancuk kati nitaak cooy púmpuluŋ ya etaaluu. Ⅸ An óo an eelehut ti pakalaŋanal pa piti Eenucee ya, pale naakatan po, oom an ataakut Pútuun pa. An óo an eetowiye ti pakalaŋanal pa, ataakaataak Paapaa ya niŋ Añii ya. Ⅹ An óo an éekeyii ti aluu apan ácoopiyoot pakalaŋanal empe, timpi niwananoo ti pukumpaan aluu niŋ fotom timpi nikicanoo. Ⅺ Kaatuko an óo an eekicanoo, ananfaananf lompo ti páhin pa piteyoo peenaput pa.
Kakican kikelan
Ⅻ Inci taakaataak hícump waah ewwa iññaŋe aluu hisoku, ewwa ammeya nii, láfiit wo hikiicu ti kaahit. Pale ínhin cíki nii, éfikey hiyoopu aluu nuuyeniyaa núukupaa, ancuk utaakaa pásuuma penfakat.
ⅩⅢ Epuuk ya pakati púnuwi ti káyinan, aŋa Pútuun pa mpimamale ya, kakicanuu.