Leetal ya éhaaciyenu ya eyya Saŋ naakiice ya
3 Saŋ
Waah wa weeyem wa ti leetal eyye
Aluu pakanam ti káyinan keeyem ka ti káasiitan fo fiye, inci neekicanaa.
Aŋe leetal ya éhaaciyenu ya eti Saŋ. Ayme akiice leetal eyye? Moonool muu niŋ eekiice ya éyaañ a niŋ ésupiyenu ya, akina ayem áhampaatiin a, Saŋ, anapana ya ati Yéesu.
Ti ayme naakiice leetal eyye? Ti akee áyiin aŋa nkasok Kayus, áyiin aŋa ammeya nii, Saŋ álafiyoolafi meemak (1). Kayus aŋuu, naataak káasiiŋuma keenape ti canku ya, kiti kawanan ekaawoola ya payenka nkakaawool ka káatuunan hilim ha hiti Pútuun pa. Saŋ naasokoo nii, acok piliit ti páhin empa naayem pa tempo (5-8).
Leetal eyye, eti weyme? Saŋ akiicaakiic leetal eyye apuwatan áyiin aŋa nkasok Cotulef, áhampaatiin ti canku ya eti Kayus. Cotulef aŋuu, acoonut kawanan ekaawoola ya payenka nkakaay ka káatuunan hilim ha hiti Pútuun pa, naakit lompo an kati awananii, naayaan ti canku ya payenka ammeya ka nii, kawananaawanan oom ekaawoola. Alehut toko, naayeno lompo kaahancalool kilim kiti kincaam ti kaapii Saŋ niŋ pakakee pupoñapoñ pa. Saŋ náayisan nii, niŋ akina akaayaa po, afaacoonanool heeyem ha ti pitaako (9-10). Naasok Kayus, áyipenan íhinu heenape, pale heenaput tom (11-12).
Alaapalaka ti káasiitan ka kiti aluu. Alímaati Pútuun pa putowo ti káapankin saan unaa mpúwiiniyan kunuu unaa, kati úyiniyaa kasayan hilim etempo, ti caacaw Añii etempo Yéesu Krista. Amíini.
Ⅰ
Kakican ka
Ⅰ Aŋe inci áhampaatiin a. Inci yemuu ti hikiicu áwiyam Kayus, aŋa inci íllafiye ya ti tooñaa ya. Ⅱ Awíyam ti káyinan, inci oopa ti kaluum Pútuun pa aakati taak kásuumaay, waah wa púlooŋ nuutempo ti eloŋ ya etii samat nii fa intempiye fa ti káyinan ka kitii. Ⅲ Inci taakaataak pásuuma penfakat ta pakakee ti kéeyinane ka nkákeyii ta nkakamanam fa ancoke fa tooñaa ya sipees súsupak, niŋ fa antowiye fa ti eloŋ teyyo. Ⅳ Eeha nihihaŋam ha pásuuma meemak hiyem niŋ inci síyaa nii epuukam unka ti eloŋ ti tooñaa ya.
Kaamankool píhina Ateeteyo
Ⅴ Awíyam ti káyinan, pawenali pinapoolaa-napool niŋ an éeyinane kaatuko ayyankanan-yankanan meemak kéeyinane ka, háati fa nkayem fa ekaawoola. Ⅵ Poko himuumii kakamane pálafi pa pitii hátikin canku ya. Káluma yankananii samat nii fa Pútuun pa mpílafiye fa ancuk kati kahankan kaakaawool ka kiteyii. Ⅶ Kaatuko káfuliyooful kapikaay káatuunan caacaw ca citi Eenucee ya, peesayut kayankanan ka kéefulii ka ti kéeyinanut ka. Ⅷ Ooto unaa uñaŋaa kayankanan pakan paka payenke fiye, ancuk utaakaa lompo himpaac ti páhin pa piteyii piti tooñaa ya.
Káyipenan heenape
Ⅸ Inci kiicaakiic faw leetal canku ya etii, pale Cotulef, éelafiye ya piyeno áhampaatiin a, naapook unii. Ⅹ Fiye niŋ inci kéyyoo, fakaman eeha naayem ha ti íhinu, niŋ fa naayem fa ti kincaam apunook unii. Eehuu hifomutoo, napookpook kawanan pakan unaa ti káyinan, naakit lompo kéelafiyii ka kawanan naayaanii ti canku ya.
Ⅺ Awíyam ti káyinan, timpi yípenan heenaput pale heenape. Eéhine ya heenape, akina ati Pútuun pa. Eéhine ya heenaput ámiit Pútuun pa. Ⅻ An óo an ákupaakup heenape ti Temetilus, háati tooñaa ya éyisanaayisan nii eenape. Unii lompo núukupkup heenape teyoo, apan nímeyimeyi nii eeha nuusoke ha hiti tooñaa.
Kakican kikelan
ⅩⅢ Inci taakaataak hícump eeha iññaŋuu hisoku, pale láfiit ho hikiicu. ⅩⅣ Inhín cíki nii efimaacukoolaa tokofiye, immaayeniyaa ímmaakupaa.
ⅩⅤ Kásuumaay kiyeno naawe. Pákawiyi pe kakicanuu. Kican pákawi unaa puu, an óo an ti caacawoo.