Káyisan ka
Waah wa weeyem wa ti púkoo eyye
Aluu pakanam keeyemaam ka ti káasiitan, inci kicanaa.
Cóopiyoo unaa púkoo ya eti Káyisan ka, íllafi upusincanaa ayme akiice púkoo eyye, teyme naakiice yo niŋ peyme naakiice yo. Púkoo eyye Saŋ akiice yo. Eehe nkasoke nii pikee pa, Saŋ aŋuu lompo akiice púkoo ya eti ekooŋan ya éesuume ya eti Saŋ niŋ lompo sileetal sa síhaaciil sa siti Saŋ. Akiicaakiic púkoo eyye ti pikelan eloŋ ya eteyoo, oom waati akina ti ékuluma ti econ eyya nkasok ya Patumos, ti caanak enca ammeya nii kéeyinane ka ti Yéesu unka ti kaakallanee meemak kamma káyinan ka kiteyii.
Ti pakayme naakiice púkoo eyye? Akiicaakiic yo ti sicanku siyema isak niŋ súsupak ti mah ma miti Asii. Pakakee ti kéeyinane ka ti picanku empuu, nkacuk kúnuul kamma kaakallanee enkuu. Pakakee kéeyinane ka, pikalaŋana keeneetaat pánipani nkayeno hiŋes kaalincanii. Pakakee paka nkayeno émakiyanoolo apan káhinut waah ti kámakiyan Pútuun pa. Yéesu náatunk Saŋ apikiic púkoo eyye, kati apenan kéeyinane ka sempe niŋ páhaañi kapucok kíp ti káyinan ka kiteyii.
Ti púkoo eyye, hícump waah úciiticiiti káacenkin niŋ káawincinool, hícump kéeyinane ti Yéesu kásiyoolut ti pácenkinal eteyyo, pale hoonool hiyem le heehiina hat hikina hiyem, Pútuun pa amansa ti coonool niŋ Añii etempo Yéesu Krista, mpíyemi ti elemeyu etempo, pikina pikaakaay iheeku akamool etempo, Seetaani ya, mpupuuñanool pakan etempo keecoke ka kíp ti káyinan ka kiteyii.
Saŋ náayisan nii, Pútuun pa píñikenaañiken meemak ti pakanc pa piti pakan paka. Mpíyisan káñiken enkuu pínapii ti hícump hítaapanu samat nii, épankul, páyiyiŋanal etaam, hikam, úkuuñu niŋ seemak. Píhinaahin eehuu ancuk pakan paka káwunkiyaa umuuyen wa uteyii nkámakiyan po.
Púkoo eyye náayisan lompo hikam heeyem ti pitaako ti pututa Pútuun pa niŋ Seetaani ya. Seetaani ya, eeyem ya lompo nínkinankoo ya, yoopiya ti páhin pínapii ti píhina eteyyo, poko kayem élukuleen elampa ya niŋ ayaamakoola ya eeneetaat a pánipani. Néhin lompo pínapii ti akee aal ahaañiya enfakat. Ti payenkuu Seetaani ya nénapii epilincan pakan paka, néekatinool pakan paka niŋ Pútuun pa, neenaŋii kaakallanee kenfakat. Pale Pútuun pa piheekaaheek hikam eehe pínapii ti Añii etempo Yéesu Krista, Císaacii ca citi Pútuun pa ceetaaŋee ca, ceenoome ca Pútuun pa pakan paka ti hísim etenco.
Saŋ náayisan lompo nii, keecoke ka kíp ti káyinan ka kiteyii ti Císaacii ca niŋ ti tooñaa ya eyya nkátuunane ya, apan kawufanut eloŋii ti kincaam ka kiti Seetaani ya, Pútuun pa efipupuuñanoolii. Mpuwufanii eloŋ ya eepayantoo ya eekaakaay ya pitaako ti patiila éeyeeni ya niŋ ti etaam ya éeyeeni ya.
Kikee kilim keetaake nafaa
Elemeyu - ekina eyem híkon hiti amansa.
Cáwii - ekina eyem la amansa naayem ati hikaw, samat nii cáwii ca citi Pútuun pa, cikina ciyem pakan paka púlooŋ keesayane ka Pútuun pa nii pikina piyem amansa ya ateyii.
Púlunta - ekina eyem dúniyaa ya.
Ayaamakoola - akina ayem an aŋa nákup ti caacaw ca citi Pútuun pa. Ayaamakoola pánipani nasoksok eeha Pútuun pa mpusoke ha.
Caminkoloŋ - ekina eyem cuuraay.
Alaapalaka meemak ti káasiitan ka kiti aluu. Alímaati Pútuun pa pípankin kunuu unaa, mpípankin saan unaa pipiyankanan unaa kati úyiniyaa kasayan hilim etempo. Amíini.
Ⅰ
Kaacempes heekiicee ha
Ⅰ Púkoo eyye eyekane waah wa weeyolee wa ewwa Yéesu Krista náayisane wa. Pútuun pa puwufanoo wo ancuk áyisanaa wo pimiikan etempo, kati kámeyi heekaakaay ha pitaako toko fiye. Yéesu Krista náapoñii maleekoo ya eteyoo épikey esok Saŋ amiikan a ateyoo. Ⅱ Saŋ naakaman eeha púlooŋ naacuke ha: Eehe hiyem hilim ha héefulii ha pati Pútuun pa, niŋ tooñaa ya eyya Yéesu Krista naasokoo ya. Ⅲ Aŋe púkoo eti kaayaamakool kiti heekaakaay ha pitaako. Ayihaayih eekaakaay ya kalaŋ eteyyo hátikin canku ya, kayihaayih kéesiitane ho ka nkátuul heekiicee ha ti púkoo eyye, kaatuko caanak ca cílohaniyoo ta eehe púlooŋ efihitaako ta.
Kakican sicanku isak niŋ súsupak sa
Ⅳ Inci Saŋ, yem aluu ti hikiicu, aluu kéeyinane ka keeyem ka ti sicanku sa isak niŋ súsupak sa seeyem sa ti mah ma miti Asii: Alímaati Pútuun pa pisampan aluu mpuwufan aluu kásuumaay, pikina peeyem pa, niŋ peetaakiye pa hínum, niŋ peeyem pa ti ékey. Alímaati Kunuu ka keenape ka isak niŋ kúsupak ka keeyem ka hátikin elemeyu ya, kisampan aluu nkuwufan aluu kásuumaay. Ⅴ Alímaati Yéesu Krista, eehintiyee ya ti eeha nasok ha, asampan aluu naawufan aluu kásuumaay. Akina áyaañe álitoonii ti eket ya, náayemi lompo ati hikaw ha ati pumansa pa púlooŋ pakati púlunta pa.
Náalafi unaa, naafakan unaa ti umuuyen wa utuunaa pínapii ti hísim ha hiteyoo. Ⅵ Náahin unaa upiyeniyaa pakati cáwii, niŋ puwaaseena pakati Pútuun pa✡1:6 Efúlii 19:6 Paapaa ateyoo. Alímaati hamake ha niŋ sempe sa kayeno pakateyoo fo cancowiyaaw púley! Amíini. Ⅶ Nisincan, Yéesu oopa ti ékey niŋ útiŋu wa✡1:7 Dañel 7:13 apan an óo an afaacukoo, háati keeyayoo ka,✡1:7 Sakaliya 12:10 písii pa púlooŋ piti púlunta pa efipiyeno ti esampoolo kamma akina. Fo efihitaako! Amíini.
Ⅷ Ateeteyo Pútuun pa mpusok: “Inci yem Ayáañ a niŋ Akelan a, Alfa ya niŋ Omega ya,*1:8 Ti kaŋ ya eti Kilek, ti alfapet ya, leetal ya éyaañ ya eyem alfa, leetal ya ekelan ya eyem omega. Ta Yéesu naasoke ta nii: “Inci yem Alfa ya niŋ Omega ya”, ekina eyem: “Inci yem Ayáañ a niŋ Akelan a.” eeyem ya niŋ eetaakiye ya hínum, niŋ eeyem a ti ékey, ati sempe sa púlooŋ.”
Saŋ hicuku ha hiteyoo Eenucee ya ati Pútuun pa pucuk fiye nii éyawut
Ⅸ Inci Saŋ, an aluu ti káyinan, kamma inci iyyem anapana ati Yéesu, inci áwii aluu ti kamukut ka kiti kúnuul ka enka nkitaako ka ti keeyem ka ti cáwii etempo. Kacoopaamcoop ti econ eyya nkasok ya Patumos kamma inci íntuunane hilim ha hiti Pútuun pa niŋ tooñaa eyya Yéesu náayisanaam ya. Ⅹ Ti Hinoom ha hiti Ateeteyo, Kunuu ka keenape ka nkúwanoonii ti inci, fiye ínsi pusonam hilim heeceeke samat nii kámpiis. Ⅺ Nihisok: “Kiic ti kaahit aŋa ankaakaay ya hicuku, impoñ ko ti sicanku sa isak niŋ súsupak sa seeyem sa ti pisaatee empe: Efes, Sumilin, Pelukam, Tiyatil, Saatis, Filatelufi niŋ Lawotise.”
Ⅻ Iyyeso kati cuk eeyem a ti káakup niŋ inci. Ta inci iyyesiye ta incuk písiiŋanuma lampi piti sanoo piyema isak niŋ súsupak. ⅩⅢ Ti pututa písiiŋanuma lampi pa intaak an eecuke nii Añii An, náasoolo hísool heehaane heewaniye fo ti wootoo niŋ kaafaal keecuke nii sanoo keeposoole púsusoo. ⅩⅣ Wan wa uti hikawoo núuhiini hat nii épin, ñíkinoo iññicuk nii kaaleew seemak. ⅩⅤ Wootoo nuumiñal nii mañ meesafee, hilimoo nihicuk nii kúsuu kenfakat kiti kaatii.✡1:15 Dañel 7:9,13; 10:5-6 ⅩⅥ Naacok ti epeesoo yáali sicaaŋaŋ isak niŋ súsupak, epaay eeliye ti upii úsupak néefulii ti putumoo.✡1:16 Esaaya 49:2 Puhooŋuyoo mpimiñal samat nii caanak ceeyem ti hikaw.
ⅩⅦ Ta inci incukoo ta, innow ti wootoo pucuk fiye nii an eekete. Pale naanaŋ epeesoo yáali ti inci naasok: “Timpi fe! Inci yem Ayáañ a niŋ Akelan a.✡1:17 Esaaya 44:6; 48:12 ⅩⅧ Inci lompo yem eeyem a Kaloŋa; inci ketaaket, pale fiye sincan, inci oopa kaloŋa fo cancowiyaaw púley! Iyyekan púkululuma pa piti eket ya niŋ piti cáwii ca citi keekete ka. ⅩⅨ Fiye, kiic eeha ancuke ha, heeyem ha ti pitaako fiye niŋ heekaakaay ha pitaako hátikin. ⅩⅩ Sicaaŋaŋ sa isak niŋ súsupak sa ensa ancuke sa ti epeesam yáali, niŋ písiiŋanuma lampi pa piti sanoo ya isak niŋ súsupak sa siyem eehe: Sicaaŋaŋ sa isak niŋ súsupak sa siyem pumaleekoo pa piti sicanku sa isak niŋ súsupak sa, písiiŋanuma lampi pa isak niŋ súsupak sa siyem sicanku sa isak niŋ súsupak sa.”
✡Ⅰ:Ⅵ 1:6 Efúlii 19:6
✡Ⅰ:Ⅶ 1:7 Dañel 7:13
✡Ⅰ:Ⅶ 1:7 Sakaliya 12:10
*Ⅰ:Ⅷ 1:8 Ti kaŋ ya eti Kilek, ti alfapet ya, leetal ya éyaañ ya eyem alfa, leetal ya ekelan ya eyem omega. Ta Yéesu naasoke ta nii: “Inci yem Alfa ya niŋ Omega ya”, ekina eyem: “Inci yem Ayáañ a niŋ Akelan a.”
✡Ⅰ:ⅩⅤ 1:15 Dañel 7:9,13; 10:5-6
✡Ⅰ:ⅩⅥ 1:16 Esaaya 49:2
✡Ⅰ:ⅩⅦ 1:17 Esaaya 44:6; 48:12