Ⅰ Púful toko, pakati Israyel nkacuk nii Móyiis ákampaniyoo-kampan ti tíntiŋ ya, nkaconcoolo ti Aaron nkasokoo: “Awe, memanool unii pútuun empa efipunow unii hátikin. Kaatuko Móyiis aŋuu, áyiin a éefulanii ya unii ti mah ma miti Esipt úmiit heetaakiyoo.” Ⅱ Aaron naañahanii: “Nífulan pukop sanoo ya peeyem pa ti unuu pakaal aluu niŋ epuuk aluu pákayiin niŋ pakaal, ínnicoopiyam po.” Ⅲ Pakati Israyel púlooŋ nkáfulan pukop pa piteyii piti sanoo ya, peeyem pa ti unuuwii, nkácoopii po Aaron. Ⅳ Naacoop po náayeluŋan po náanuŋ po ti múuloo, naamemanool himuum sanoo hiti cíciin. Fiye pakati Israyel nkaceek kapusok: “Israyel, ehe pútuun pa putuunaa péefulanii pa unaa Esipt!” Ⅴ Ta Aaron naacuke ta eeha pakan paka nkayeniye ha íhinu, naalut kaaciin hátikin himuum cíciin ca naasok: “Kacom efuutaakaa pahaaño úpumakiyanaa Ateeteyo.” Ⅵ Eti kacom eteyyo mpucom mic, pakan paka incakawaaseen kaawaaseen kenfakat ti kaaciin ka. Pikee púlukuleen pa, nkaleeman po motic; pikee pa, nkawaaseen po kaawaaseen kiti kásuumaay. Kayoŋ ka nkiyeno kipili nkilaan, púful toko nkilito pahaaño.

Ⅶ Po ti tíntiŋ ya, Ateeteyo naasok Móyiis: “Hiliikan wano, kaatuko pakani payenka ánfulanii ka ti mah ma miti Esipt kamuuyenaa meemak. Ⅷ Kakatanaakatan mpacas pítin empa inci insokii pa kanapan. Nkamemanool faŋii cíciin citi sanoo, nkákilipo hátikin etenco nkawaaseen tenco. Nkasok: 'Israyel, ehe pútuun pa putuunaa péefulanii pa unaa ti mah ma miti Esipt!'” Ⅸ Ateeteyo nene asok Móyiis: “Inci cukaacuk pakan paka payenke, pakan keeyanke ekun. Ⅹ Fiye katam inci púwananii káñiken ka kutoom teyii ímpucaloolii. Pale awe, inci fáhin keesokuu maamaa kapimeeŋ nkáyenoonii síi enfakat.”

Ⅺ Pale Móyiis naaŋiino Ateeteyo Pútuun pa piteyoo naasokoo: “Ateeteyo, weyme uwune aakati wánanii káñiken ka kitii ti pakan paka pakatii payenka ánfulanii ka ti mah ma miti Esipt ti sempe sa siti epeesi? Ⅻ Weyme uwune pakati Esipt kati kasok: 'Pakanc puwune Ateeteyo náafulan pakati Israyel ti mah ma mutuunaa, kati amukii ti pítintiŋ pa fo kapa.' Ateeteyo, timpi ñíken, yesan kunuuwi timpi táhii hítaapanu eehuu ti pakani. ⅩⅢ Náwuno Abraham, Isaak niŋ Israyel, pimiikan pa pakatii payenka ansintooliye ka ti faŋi nii: 'Inci fáhin keesokuu maamaa kapimeeŋ samat nii picaaŋaŋ pa piti patiila. Inci fawufanii mah ma púlooŋ emma inci íyyinananii ma, éfimiyenoonii miteyii fo eket maamaa.'” ⅩⅣ Fiye, Ateeteyo naayesan kunuuwoo ti hítaapanu eeha naasoke ha íhinu pakanoo.

ⅩⅤ Móyiis náayesoonii, náawanoonii ti tíntiŋ ya, ápiyekanii sínankiin sa súsupak sa seepeefiye sa, la kilim ka keesiiŋanee ka nkikiicee la ti upii wa úsupak wa. ⅩⅥ Sínankiin ensuu, sikina siyem páhin pa piti Pútuun pa, pikina himuum etempo pikiice po. ⅩⅦ Fiye Móyiis niŋ Josuwa kápulohanii, Josuwa náasi paceekal pa piti pakan paka, naasok Móyiis: “Paceekal piti hikam piyem pati pikin pa.” ⅩⅧ Móyiis naañahanoo: “Haani, neetaat paceekal piti keeheeke, niŋ ekina tom paceekal piti payenka nkaheeke, pale caacook inci ínsiye.”

ⅩⅨ Emma Móyiis naalohane ma pikin pa naacuk cíciin ca, naacuk pakan paka ti ekii, náañiken naawant pínankiin pa empa hilim ha heesiiŋanee ha nihikiicee pa tempo, mpuhumaloolo t’etaam tíntiŋ ya. ⅩⅩ Naacoop cíciin ca enca nkamemanoole ca naawant co ti seemak sa ínciyeluŋ, náatuum páyeluŋal pa pipiyeno efol, naacoop oom efol apuhoholan yo ti man ma, náahin pakati Israyel kapilaan mo.

ⅩⅪ Móyiis naasok Aaron: “Weyme kayoŋ enke nkíhinuu fo áaluuŋ ko ti kaamuuyen kenfakat?” ⅩⅫ Aaron naañahanoo: “Káluma inci luumuu, timpi ñíken ti inci, awe himuumi áameyimeyi fa kayoŋ enke nkílafiye fa íhinu heenaput. ⅩⅩⅢ Kíkeyyookey nkusokam: 'Memanool unii pútuun peekaakaay hinowu unii hátikin kaatuko Móyiis aŋuu, éefulanii ya unii ti mah ma miti Esipt, úmiit heetaakiyoo.' ⅩⅩⅣ Inci iññahanii: 'Aŋa ataake sanoo áfulan yo.' Nkáfulan po nkawufanam. Inci uwwant po ti seemak sa, cíciin ence íncifulii!”

ⅩⅩⅤ Móyiis naacuk nii Aaron akataakat pakan paka kápihin héesuumii. Fiye, efikasuu hátikin keepookii ka. ⅩⅩⅥ Ta naacuke ta eehuu, naacaasiiŋo ti putum pikin pa naasok: “Kéelafiye ka Ateeteyo kákey peti inci!” Pakati síi ya eti Lewi púlooŋ nkaconcoolo teyoo. ⅩⅩⅦ Naasokii: “Ehe eeha Ateeteyo Pútuun pa piti Israyel mpusoke ha: 'An óo an ti aluu acoop káakuntu ka kiteyoo, nimuumuusool ti pikin pa innimuk ñúnu aluu niŋ pakatu aluu, pákawii aluu niŋ pikinool aluu.'” ⅩⅩⅧ Pakati síi ya eti Lewi nkáhin eeha Móyiis naasokii ha. Nkamuk oom hinoom pakan máamun síwuli síhaaciil (3,000). ⅩⅩⅨ Móyiis naasok pakati síi ya eti Lewi: “Písik fíyooy, Ateeteyo asampanaa-sampan aluu inniyenanee ti kaapii kati niyeno píhina pa pakateyoo kamma innimukale epuuk aluu pikampaani, ñúnu aluu niŋ pakatu aluu.”

ⅩⅩⅩ Eti kacom eteyyo, Móyiis naasok pakan paka: “Nimuuyenaa-muuyen meemak, fiye inci pisilo ti tíntiŋ ya pati Ateeteyo, pikee pa inci íyyiniyoo íhinu apuponket kaamuuyen ka kitaaluu.” ⅩⅩⅪ Móyiis naañoho pati Ateeteyo naasokoo: “Káluma, pakan paka payenke kamuuyenaa-muuyen meemak kamma nkamemanoole faŋii pútuun piti sanoo. ⅩⅩⅫ Inci luumuu ponketii kaamuuyen ka kiteyii, niŋ fotom káluma, intoot caacawam ti púkoo ya la ankiice la ucaw wa uti pakani.” ⅩⅩⅩⅢ Ateeteyo naañahanoo: “Haani, ucaw keemuuyene ka ti inci, poko inci fatoot ti púkoo ya etoom. ⅩⅩⅩⅣ Fiye kaay coop kayoŋ enkuu pa inci insokuu pa. Síitan, maleekoo ya etoom efeenowi hátikin. Pale caanak unca ti ékey ta inci inkaakaay ta kaasiiŋan pakan paka payenkuu ti pisiya kamma kaamuuyen ka kiteyii.”

ⅩⅩⅩⅤ Ateeteyo náatahii hítaapanu ti pakan paka kamma nkáluuŋe Aaron apimemanool cíciin ca.