Ⅰ Ateeteyo naasok Móyiis: “Níful le, awe niŋ kayoŋ enka ánfulanii ka Esipt innikaay ti mah emma inci insintooliye ma Abraham, Isaak niŋ Jakob nii fawufan mo keesokii maamaa. Ⅱ Inci fapoñ maleekoo epinow aluu hátikin. Inci fayaan pakati Kanaan, pakati Amol, pakati Het, pakati Pelis, pakati Hiw niŋ pakati Yepus. Ⅲ Efininako ti mah ma meemeeŋe ma keekee niŋ múkum. Pale inci himuumam etikaay niŋ aluu kaatuko niyankaayank ekun; niŋ inci kaayaa niŋ aluu fápucalool aluu pántoon ti pítin pa.”

Ⅳ Móyiis náatuunan kilim enkuu pakan paka. Ta kayoŋ ka nkísiye ta kilim ka keefeyanana enkuu nkiyeno esampoolo, ekina neewun kásankalooliit. Ⅴ Kaatuko Ateeteyo asokaasok hínum Móyiis: “Sok pakati Israyel: 'Niyankaayank ekun; niŋ inci kaayaa niŋ aluu étuulaaŋanaa, fápucalool aluu pántoon. Nífulan pukop pa niŋ pikeenoo pa pitaaluu, inci fasincan fa inci fáhin niŋ aluu.'” Ⅵ Ekina ewune písik ta nkayeniye ta pukol tíntiŋ ya eti Horeb, pakati Israyel nkawaat pukop pa niŋ pikeenoo pa piteyii.

Ⅶ Ti oom caanak, intaak ékuut eyya Móyiis naaluwe caacaw ca “ékuut ya eti pipaakool pa”. Fiye, Móyiis naacoop yo naasiiŋan yo tíkitaaŋ pikin pa épilaaŋ po. An óo an éelafiye káakup niŋ Ateeteyo, náaful ti pikin pa naakaay pati ékuut ya eti pipaakool pa. Ⅷ Tan óo tan Móyiis naayeniye pikaayu lati ékuut ya, an óo an naalito naasiiŋo ti putum ékuut ya eteyoo apisincan Móyiis fo anako. Ⅸ Niŋ Móyiis anakiyaa ti ékuut ya eti pipaakool pa, háaputa ha henfakat ha heekaaye ha patiila nihisiiŋo ti putum ékuut ya, Ateeteyo naayeno káakup niŋ Móyiis. Ⅹ Ta pakan paka nkacuk ta háaputa ha nihisiiŋiye ti putum ékuut ya, an óo an náakilipo puhooŋuyoo t’etaam ti putum pa piti ékuut ya eteyoo. Ⅺ Ateeteyo náakup niŋ Móyiis kápucoonool samat nii fa an nákup fa niŋ áwiyoo an. Púful toko Móyiis náañohoonii ti pikin pa, pale ayankanana ya ateyoo Josuwa, akampaani ya ati Nun, naatowo po ti ékuut ya eti pipaakool pa.

Ⅻ Fiye, Móyiis naasok Ateeteyo: “Síitan, Ateeteyo! Awe sokaam: 'Coop payenke.' Pale áayisanutam aŋa aafapoñ niŋ inci apiyankananam. Apan awe sokaam: 'Méyiyuumeyi meemak,*33:12 Niŋ ekina tom: “Apan awe sokaam: 'Inci mamaluu.'” kitii lompo nkúsuumam.' ⅩⅢ Fiye káluma, niŋ kutoom kúsuumuu yísanam heeyem ha ti kunuuwi, ancuk inci méyiyuu, kutoom lompo nkúsuumi. Náwuno lompo nii síi eyye pakani.” ⅩⅣ Ateeteyo naañahanoo: “Inci himuumam fanapool niŋ awe iyyihani, kunuuwi nkipepan.” ⅩⅤ Móyiis naasokoo: “Niŋ awe himuumi napoolut niŋ unii, timpi sok unii úful le. ⅩⅥ Niŋ awe napoolut niŋ unii, inci niŋ pakani, puume an áfaameyi nii kutoonii kúsuumuusuum? Piyeno pa pitii ti pututa unii efipuwun etuukuf niŋ pikee písii pa púlooŋ piti etaam ya.” ⅩⅦ Ateeteyo naañahan Móyiis: “Fiye inci fáhin eeha ansoke ha, kaatuko kitii kúsuumaamsuum ímmeyiyi meemak.”†33:17 Niŋ ekina tom: “kitii kúsuumaamsuum immamali.”

ⅩⅧ Móyiis naasokoo: “Káluma katam pucuk ecaaŋ ya eti hamake ha hitii!” ⅩⅨ Ateeteyo naañahanoo: “Inci famuus hátikini íyyisani panap pa putoom púlooŋ, iyyonkal caacawam 'Ateeteyo' ancuk aakati sí co. Iyyísanyisan pálafi niŋ paket hikaw ti payenka inci immamale ka. ⅩⅩ Pale aayinaat hicuku puhooŋuyam kaatuko an ayinaatam hicuku naaloŋ kaloŋa.” ⅩⅪ Ateeteyo nene asokoo: “Ehe énankiin pukolam, kéy siiŋo teyyo. ⅩⅫ Fiye niŋ ecaaŋ ya eti hamake ha hitoom emuusaa, inci fayoli ti kawuŋ ka keeyem ka ti énankiin ya úwwufalooli niŋ epeesam fo ta inci famuus. ⅩⅩⅢ Niŋ fúlaa toko fáfulan epeesam aakati yíni hicuku pusonam pale puhooŋuyam piyinaatee hicuku.”