Ⅰ Ateeteyo naasok Móyiis: “Wuc sínankiin súsupak seepeefiye seenakoole niŋ sícook sa ensa anhumaloole sa. Inci fakiic toko kilim ka keekiicee ka hínum ti sícook sa. Ⅱ Memanoolo, kacom mpucom insilo patiila pisempuc tíntiŋ ya eti Sinayi, aakati siiŋo hátikinam. Ⅲ An timpi ánapoolii niŋ awe, an timpi akaay pan óo pan ti kanaac tíntiŋ ya. Háati púlukuleen pa - písaacii pa, pifil pa niŋ síis sa - timpi puhoon pukol tíntiŋ ya.”

Ⅳ Móyiis naawuc sínankiin súsupak seepeefiye seenakoole niŋ sícook sa. Eti kacom eteyyo mpucom mic naasilo ti tíntiŋ ya eti Sinayi samat nii fa Ateeteyo naasoke fa, naacoopool sínankiin sa súsupak sa. Ⅴ Móyiis apucol, Ateeteyo náawanoonii ti háaputa ha naasiiŋo pukoloo, naayonkal caacawoo “Ateeteyo”. Ⅵ Púful toko naamuus hátikin Móyiis naasok: “Inci yem Ateeteyo, Pútuun pa peemeeŋe pa panap niŋ paket hikaw, inci fíisantoo káñiken, immeeŋ pálafi niŋ pucoonool. Ⅶ Iyyísan pálafi pa putoom fo ti sikaay siyema wúli (1,000). Imponket heenaput ha niŋ kaamuuyen ka púlooŋ. Pale inci cokantoo eelaahe samat nii éehinut likee. Insiiŋan-siiŋan ti pisiya keemuuyene ka ti inci nkanatam, insiiŋan ti pisiya lompo epuukii niŋ keesokii maamaa fo ti sikaay síhaaciil niŋ fotom sipaakiil.”

Ⅷ Móyiis naahaaŋ ti ékilipo puhooŋuyoo t’etaam hátikin Ateeteyo. Ⅸ Púful toko naasok: “Ati Pútuun, niŋ kutoom kúsuumuu inci luumuu napool niŋ unii. Inci méyimeyi nii pakan paka payenke kayankaayank ekun, pale ponket umuuyen wa utoonii niŋ hilaahu ha hitoonii, incok unii pakani.”

Ⅹ Ateeteyo naasok Móyiis: “Síitan, inci piliil písiyool niŋ aluu. Inci fáhin hátikin pakani púlooŋ weecukantee weetaapala utaako ti písii pa púlooŋ, pan óo pan ti etaam ya. Pakan paka púlooŋ keeyem ka niŋ awe efikacuk heefeyanana eeha Ateeteyo naakaakaay ha íhinu pínapii ti awe. Ⅺ Eeha inci iyyem ha aluu ti hisoku fíyooy, níhin ho pinap. Inci fayaan hátikin aluu pakati Amol, pakati Kanaan, pakati Het, pakati Pelis, pakati Hiw niŋ pakati Yepus. Ⅻ Nitah kunuu timpi niliil písiyool niŋ pakan paka pakati mah emma efininako ma temmo kaatuko éfinkaluuŋ aluu ti kaamuuyen. ⅩⅢ Pale efinihancalool uciin wa uteyii, ínnipucalool pínankiin pa piteyii piti meeñeya ma, innifiit kumuum énaati ya eteyii eeyaale ya eyya nkasok ya Asela. ⅩⅣ Timpi nítuul pikee pútuun kaatuko inci Ateeteyo caacawam 'Pasowe', Pútuun peesowa. ⅩⅤ Timpi niliil písiyool niŋ pakan paka pakati mah ma. Niŋ ekina tom, kéesuuniye ka ti kaawaaseen pínaati pa piteyii efikayonkal aluu ínnilafi hili paliyal empa nkawaaseene pa pínaati pa. ⅩⅥ Niŋ nicoopaa ti epuukii púmaacul kápiyenoonii pakaal epuuk aluu, epuukii púmaacul éfikahin lompo epuuk aluu kápusuuno ti kaawaaseen pínaati pa piteyii.

ⅩⅦ “Timpi níyeluŋan mañ ínninuŋ mo ti púmuuloo kati nimemanool pínaati piti mañ.

ⅩⅧ “Efínihin pahaaño pa piti kúmpuul ka keetaakut ka leweñoo. Nili kúmpuul keetaakut leweñoo fo kunoom isak niŋ kúsupak, samat nii fa inci insoke fa aluu. Níhin eehuu ta nihiñaŋe ta pitaako ti hiim ha hiti Apip, kaatuko ti oom hiim ínnifulii ti mah ma miti Esipt.

ⅩⅨ “Cikampaani óo cikampaani cíyaañ, citoom, niŋ lompo élukuleen óo élukuleen etaaluu éeyiine éyaañ, etoom: síis sa, pifil pa niŋ písaacii pa. ⅩⅩ Niŋ nitaakaa cífali céeyiine cíyaañ ceepukee, ínnilafiyaa cífali ca cipiloŋ, niñaŋaa kaawaaseen císaacii ti putum etenco. Inníhinut fo, innifiit ekun etenco. Iyyema añii akampaani áyaañ apukee ti miin ma mitaaluu, fo niwaaseen císaacii ti putum pa piteyoo, ancuk añii ya aloŋaa.

“An timpi ákey hátikinam sipeesoo ñaanii.

ⅩⅪ “Kunoom isak niŋ hoonool innitaake ti lóokuŋ ya kiti páhin, pale heewase ha isak niŋ kúsupak ínniyekunoolo háati ti caanak ca citi piya pa niŋ citi kaamaañ ka. ⅩⅫ Inníyaañaa kaamaañ uli, níhin pahaaño pa piti kaamaañ ka; innipayaa kaamaañ ka, níhin pahaaño pa piti kaaconcenool pamaañal pa. ⅩⅩⅢ Etiil óo etiil, pákayiin paka púlooŋ pakati kayoŋ ka kitaaluu éfinkakey hátikinam fo ñiyema ñáhaaciil, inci Ateeteyo, Pútuun pa piti Israyel. ⅩⅩⅣ Fayaan hátikin aluu písii pa piti mah ma, incoop etaam ya eteyii uwwufan yo aluu, ancuk penanaa etaam ya etaaluu. Inníkeyyoo nipisiiŋo hátikinam ti ñáhaaciil eññuu, inci Ateeteyo Pútuun pa pitaaluu, an átalafi hicoopu mah ma mitaaluu.

ⅩⅩⅤ “Niŋ niyeniyaam kaawaaseen púlukuleen, hísim etempo timpi hinapool niŋ waah weetaake leweñoo. Timpi nimank efoofa ya eti kaawaaseen ka eti pahaaño pa piti Himuusu ha fo eti kacom eteyyo. ⅩⅩⅥ Etiil óo etiil, weehaŋe wa panap ti pamaañal pa púcook pa piti pitaam pa pitaaluu, éfinicoopii po ti ekumpaan ya etoom, inci Ateeteyo Pútuun pa pitaaluu.

“Etiniyik cifil niŋ miin ma miti íññaa etenco.”

ⅩⅩⅦ Ateeteyo naasok Móyiis: “Kiic kilim enke, kaatuko ti kilim enke inci illiile naaluu písiyool pa putoom, awe niŋ Israyel.” ⅩⅩⅧ Móyiis naayeno toko niŋ Ateeteyo hánant hanakan fo kunoom áwii ésupak (40), aliit alaanut. Naakiic ti sínankiin sa seepeefiye sa kilim ka ŋaasuwan ya kiti písiyool pa.

ⅩⅩⅨ Móyiis náawanoonii ti tíntiŋ ya eti Sinayi niŋ sínankiin sa súsupak sa siti hilim ha heesiiŋanee ha ti epeesoo. Kákupat ka kiteyoo niŋ Ateeteyo kuwune puhooŋuyoo mpimiñal, pale ámiit. ⅩⅩⅩ Aaron niŋ pakati Israyel púlooŋ ta nkacuke ta fa puhooŋu pa piti Móyiis mpimiñale fa nkafe hikoluyoo. ⅩⅩⅪ Pale Móyiis naayonkalii, Aaron niŋ pakati kikaw ka púlooŋ pakati Israyel nkañoho ti Móyiis, náakup neyii. ⅩⅩⅫ Púful toko pakati Israyel púlooŋ nkaloh Móyiis, naasokii hilim ha heesiiŋanee ha púlooŋ eeha Ateeteyo naawufanoo ha ti tíntiŋ ya eti Sinayi.

ⅩⅩⅩⅢ Ta Móyiis naapaye ta káakup neyii naacoop kafonkoloŋ ápikimpitool puhooŋuyoo. ⅩⅩⅩⅣ Pale tan óo tan ta Móyiis naanakiye ti ékuut ya eti Ateeteyo kati ákup neyoo náafulan kafonkoloŋ ka fo ta áfaafulii. Niŋ áfuliyoo naakaman pakati Israyel waah óo waah ewwa Ateeteyo naasokoo. ⅩⅩⅩⅤ Pakati Israyel nkacuk puhooŋuyoo fa mpimiñale fa. Niŋ fúlaa toko, Móyiis naañahan kafonkoloŋ ka ti puhooŋuyoo, toko nakat ko fo ta afaañoho káakup niŋ Ateeteyo.