Leetal ya eepoñee ya
Pihiburu pa
Waah wa weeyem wa ti leetal eyye
Aluu pakanam keeyemaam ka ti káasiitan, inci kicanaa.
Leetal eyya nuuyemaa ya fiye ti káasiitan niŋ ekina tom kalaŋ, nesokee Pihiburu pa.
Ayme akiice leetal eyye? Le hiinaat unaa hat, pale hícump ti kéeyinane ka kasok Póol apoñapoñ a. Pikee pa lompo iyyeno Barnabas niŋ ekina tom akee áyiin.
Akiica ya, teyme naakiice leetal eyye? Luu lompo hiinaat unaa hat, pale pikee pa ekiiceekiic sitiil áwii niŋ ŋaasuwan (30) niŋ fotom sitiil áwii ésupak (40) pamuusal eket ya niŋ pilito pa piti Yéesu Krista.
Akiica ya, pakayme naakiice leetal eyye? Leetal eyye, pikee pa akiicaakiic yo ti Pusuwif kéeyinane ti Yéesu nkayeniyee kaakallan kamma káyinan ka kiteyii, nkayeno kaaŋatool, pakakee teyii nkayeno púwunko káyinan ka.
Leetal eyye, weyme néewuntake, niŋ ekina tom weyme úkupee ti leetal eyye? Hikina hiyem kayankananii kati kasiiŋo kíp ti káyinan ka kiteyii. Néenawunanii hak ayme ayem Yéesu, Yéesu ahaŋa an óo an, ahaŋa lompo waah óo waah.
1:1-3 Yéesu ayem Añii ya ati Pútuun pa éeyisane ya unaa Pútuun pa fanfaŋ.
1:4–2:18 Yéesu ahaŋa pumaleekoo pa.
3:1–4:13 Yéesu ahaŋa Móyiis niŋ Josuwa.
4:14–7:28 Yéesu ayem awaaseena ya enfakat a eehaŋe ya puwaaseena pa púlooŋ pakati Pusuwif pa payenka nkawaaseen ka Pútuun pa.
8:1–9:22 Písiyool empa Yéesu naaliile pa ti pututa pakan paka niŋ Pútuun pa, pihaŋa peeliilee pa niŋ pakan paka pínapii ti Móyiis.
9:23–10:39 Yéesu, kaawaaseen ka kiteyoo, ta naawaaseene ta eloŋoo ti kuluwaa ya hak íhalu umuuyen wa utuunaa, kihaŋa uwaaseen wa púlooŋ ewwa puwaaseena pa pakati Pusuwif pa nkawaaseene wa ti Pútuun pa.
11:1–13:25 Naakelan ti káyisan nii, káyinan ataakaataak hikaw, naaluwal lompo ucaw uti pákayiin niŋ pakaal payenka ammeya nii, kacokaacok kíp ti káyinan ka kiteyii fo ti pikelan. Akiica ya naasokii nii, kañaŋaa káyipenan eloŋ ya eti payenkuu, háati nkateñalee nkakallanee samat nii Eenucee ya.
Eehe hitaakaataak nafaa lompo ti unaa.
Alaapalaka ti káasiitan ka kitaaluu, illuum álimaati Pútuun pa púwiiniyan kunuu unaa, mpípankin lompo kunuu unaa kati úyiniyaa káasiitan hilim etempo nuusayanaa ho. Alímaati Pútuun pa piyankanan unaa kati utaakaa eloŋ éesuume, nuutaakaa eloŋ eenape hátikin etempo.
Ⅰ
Káakup ka kiti Pútuun pa pínapii ti Añii etempo
Ⅰ Ta infiyye, Pútuun pa mpúkupkup niŋ símaama unaa pínapii ti piyaamakoola etempo; mpíhinhin fo tan óo tan ti pákupal peemeeŋe niŋ pawenal peemeeŋe. Ⅱ Pale ti kunoom ka kikelan enke, púkupaakup niŋ unaa pínapii ti Añii etempo. Teyoo Pútuun pa mpínapii pipiliil púlunta pa, akina lompo mpimamale kati atoon waah óo waah. Ⅲ Akina ayem ecaaŋ ya eti hamake ha hiti Pútuun pa. Akina ayem anakool a pánipani ya ati Pútuun pa, naayekan waah óo waah ti sempe sa siti hilimoo. Ta naapaye ta kaakuulan umuuyen wa uti pakan paka, naayeno look alacana ti epees yáali ya eti Pútuun pa, peemaka pa. Ⅳ Fiyuu naahaŋe meemak pumaleekoo pa, samat nii fa Pútuun pa mpuwufanoo fa caacaw ceehaŋe citi pumaleekoo pa meemak.
Fa Añii ya ati Pútuun pa naahaŋe fa pumaleekoo pa
Ⅴ Pánipani, Pútuun pa pitaapala pusok yoonool ti pumaleekoo etempo:
“Awe yem Añiinam, písik fíyooy inci yem faafi.”✡1:5 Kícimu 2:7
Niŋ eehe lompo:
“Inci fayeno Paapaa ateyoo, akina naayeno Añiinam.”✡1:5 2 Samiyel 7:14; 1 Heetaakiye 17:13
Ⅵ Pale ta mpúpoñii ta Añii etempo áyaañ a ti púlunta pa, mpusok:
“Pumaleekoo pa púlooŋ piti Pútuun pa, píkilipo hátikinoo.”✡1:6 Kakaman 32:43; Kícimu 97:7
Ⅶ Eehe Pútuun pa mpusoke kiti pumaleekoo etempo, pusok:
“Píhinaahin pumaleekoo etempo samat nii eyam;
mpíhin píhina etempo samat nii kaaleew seemak.”✡1:7 Kícimu 104:4
Ⅷ Pale Añii ya mpusok:
“Awe Pútuun, cáwii ca citii cisiiŋanee-siiŋan fo cancowiyaaw,
cáwii ca citii ceecoonoole.
Ⅸ Aálafilafi heecoonoole, innat heenaput.
Ekina ewune Pútuun pa, peeyem pa Pútuun pa pitii,
pucokuucok pihaŋ pákawiyi
mpunuci niŋ munucu emma éfimucoopii pásuuma.”✡1:9 Kícimu 45:6-7*1:9 Niŋ ekina tom: “Ekina ewune Pútuun pa, Pútuun pa pitii, punucuunuc aakati taak pásuuma.”
Ⅹ Pútuun pa nene pusok:
“Ateeteyo, ti púcook pa, awe liile etaam ya,
awe memanoole lompo patiila niŋ sipeesi.
Ⅺ Waah ewwe púlooŋ éfuucim, pale awe aafatowo fo cancowiyaaw.
Efuulop samat nii wañ weemaamane.
Ⅻ Aafapoon wo samat nii fa hísool napoonee,
ínfaliŋ wo samat nii fa wañ náfaliŋee.
Pale awe yesiyantoo,
eloŋi etetaak pikelan.”✡1:12 Kícimu 102:25-27
ⅩⅢ Pútuun pa pitaapala pusok maleekoo:
“Kéy yeniyam epees yáali,
fo ta inci fatah ta pikamooli ti wooti,
ayyeno amansa ya ateyii.”✡1:13 Kícimu 110:1
ⅩⅣ Ooto weyme uyem pumaleekoo? Pikina púlooŋ kunuu lamma, píhina Pútuun pa. Púpoñiyoopoñ po pípikey pipiyankanan payenka efikafakanee ka.