Leetal ya eepoñee ya Filemon
Filemon
Waah wa weeyem wa ti leetal eyye
Aluu pakanam ti káyinan keeyemaam ka ti káasiitan, inci kicanaa.
Leetal eyya nuuyemaa ya fiye ti káasiitan, Póol akiice yo. Póol apoñapoñ a ati Eenucee ya, Yéesu Krista. Naakiic yo ti akee áyiin, aŋa nkasok Filemon, áyiin eetaake, náayemi ti canku ya eeyem ya ti saatee ya eti Kolos. Póol naakiic leetal eyye, kamma akee áyiin aŋa nkasok Onesim, eeyem amiikan ati Filemon, pale naatey.
Onesim, ta naateye ta, hikee hinoom naakaay pati Póol, pati núkuluma ya. Póol naakalaŋanoo kiti hilim ha hiti Pútuun pa, náayinan. Ti leetal eyye, Póol naaluum Filemon, aponket Onesim, naacokoo samat nii áwiyoo ti káyinan.
Leetal eyye néeyisan sempe sa seeyem sa ti ekooŋan ya éesuume ya eti Yéesu Krista siti kayesan eloŋ an, samat nii Onesim eloŋoo fa neeyesane fa. Póol naasok púcook pa, Onesim ataakut nafaa, pale fiye ataakaataak nafaa náayemi lompo áwiyi ti káyinan ka kiti Ateeteyo, samat nii fa caacaw ca citi Onesim inciyem fa, “Eetaake nafaa”.
Alaapalaka ti káasiitan ka kitaaluu. Alímaati Pútuun pa púwiiniyan saan unaa mpípankin kunuu unaa kati úyiniyaa kasayan hilim etempo ti caacaw Añii etempo Yéesu Krista. Amíini.
Ⅰ
Kakican ka
Ⅰ Inci Póol, eekulee ya ti núkuluma kamma Yéesu Eenucee ya, inci kiice leetal eyye. Inci niŋ Timote, an unaa ti káyinan, ukicanuu, awe Filemon, áwii unii niŋ áhinool unii. Ⅱ Nuukican lompo kéeyinane ka ti Yéesu Krista payenka nkaconcoolo ka lati ekumpaan ya etii, niŋ ahoop unaa Afiya, niŋ Aakip, áwii unaa ti pítaakool pa piti káatuunan ka kiti ekooŋan ya éesuume ya. Ⅲ Alímaati Pútuun pa paapaa ya ati unaa niŋ Ateeteyo Yéesu Krista kasampan aluu nkawufan aluu kásuumaay.
Kaluum niŋ hisoku Pútuun pa apalaka
Ⅳ Filemon, tan óo tan ta inci iyyeniye kaluum kitii, insoksok Pútuun pa piti unaa apalaka. Ⅴ Kaatuko inci síyaasi fa állafiye fa keesampanee ka púlooŋ pakati Pútuun pa, niŋ káyinan enka antaake ka ti Ateeteyo Yéesu. Ⅵ Inci oopa ti kaluum Pútuun pa, ancuk pucokool empa nuucokoolaa pa ti káyinan, kati píhini áapimeyi pihaŋ toko heenape ha púlooŋ eeha nuutaakaa ha ti eloŋ ya eti unaa niŋ Eenucee ya. Ⅶ Awíyam ti káyinan, pálafi pa pitii puwufanaamufan pásuuma penfakat niŋ páhaañi, kamma állafiye keesampanee ka pakati Pútuun pa, apan immonan lompo saanii.
Póol kaluum ka kiteyoo Filemon kiti Onesim
Ⅷ Ooto hoonool inci iyyemuu ti kaluum. Kamma nuuyemaa pakoonool niŋ Eenucee ya ati Pútuun pa, ekina ewune inci intaak sempe siti hisokuyi eeha aññaŋe íhinu. Ⅸ Pale kamma pálafi, inci puluumi. Inci Póol, eemaamane, apan íyyemi fiye ti núkuluma kamma Yéesu Eenucee ya. Ⅹ Inci oopa ti kaluumi kiti Onesim, éeyenoonii ya añiinam inci ti núkuluma. Ⅺ Ataakut hínum ti awe nafaa,*1:11 Ti kaŋ ya eti Kilek, “Onesim”, ekina eyem “nafaa”. pale fiye ataakaataak nafaa ti inci niŋ awe. Ⅻ Fiye, háati fa naayem fa yaanam, inci oopa ti éñahaniyoo puu ti awe. ⅩⅢ Inci láfiyoolafi hicoku pukolam kati ayankananam ti caacawi le ti núkuluma enne inci iyyem ne tenno kamma ekooŋan ya éesuume ya. ⅩⅣ Pale inci láfiit íhinu waah taamanta aasokutam iyyoo. Inci láfiiti hítunku áapihinam waah weenape, láfilafi áapihin wo ti pásuumayi.
ⅩⅤ Pikee pa Onesim ákatinoolee-kátinool niŋ awe ti caanak ceetama, ancuk kati áñohoonii puu ti awe fo cancowiyaaw. ⅩⅥ Kaatuko fiye aneetaat amiikan lamma, pale ahaŋaahaŋ amiikan, akina an unaa ti káyinan, apan an óo an álafiyoo. Ti inci áwiyam aŋa inci íllafiye, pale ti awe ahaŋaahaŋ áwii, akina áwiyi an niŋ ani ti Ateeteyo.
ⅩⅦ Páawoo aacokaamcok nii áwiyi, wananoo pinap samat nii fa aafawananam fa. ⅩⅧ Niŋ áhinuuhin heenaput, niŋ fotom naayekani nikopu, nanf no ti inci. ⅩⅨ Inci Póol yem le ti hikiicu niŋ epeesam, inci facooyi. (Etínawunani nii awe faŋi, aayekanaam-yekan eloŋi.) ⅩⅩ Ee, awe anam ti káyinan, káluma hín waah weetaake nafaa ti inci kamma Ateeteyo, monan yaanam ti Eenucee ya. ⅩⅪ Híiniyaamhiini nii, fa inci iyyemuu fa fiye ti hikiicu, áafahin eeha inci insokuu ha, ímmeyi lompo nii áafahin pihaŋ eehe. ⅩⅫ Memanoolam lompo ékaap, kaatuko inci taakaataak cíki nii Pútuun pa efipisayan kaluum ka kiti aluu, mpíhinam púñohoonii puu ti aluu.
Kakican kikelan
ⅩⅩⅢ Epafulas, eeyem ya niŋ inci ti núkuluma kamma Yéesu Eenucee ya, akicanuu. ⅩⅩⅣ Pákawiyam píhina Mark, Alistaak, Temas niŋ Luk, kakicanuu lompo.
ⅩⅩⅤ Alímaati Ateeteyo Yéesu Krista asampan kunuu aluu.