Kaawaaseen ka keewaaseenee ka poonool kóŋ kiti Eenucee ya
Ⅰ Eeha hilim ha heesiiŋanee ha hiti Móyiis níhiyisane ha hinakoolut tak niŋ weenape wa weekaakaay wa ékey, pale samat nii hísaalumant etewwo lamma. Ekina ewune, keeŋese ka kati kaloh Pútuun pa pínapii ti uwaaseen wa woonool woonool wuu ewwa nkáhin wa etiil óo etiil weepayantoo wa, hilim ha heesiiŋanee ha hiyinaatii íhinu kapiyeno kéetuuniye. Ⅱ Niŋ híyiniyini íhinu pakan paka kapiyeno kéetuuniye, ooto uwaaseen wa anti ufiyo núuyekuniye, kamma payenka nkáhin wo ka anti kakuulanee poonool kóŋ ti umuuyen wa uteyii, ancuk kunuuwii kitempanaa. Ⅲ Pale uwaaseen ewwuu núunawunanii umuuyen wa uteyii etiil óo etiil. Ⅳ Kaatuko yinaat pitaako hísim hiti kíciin niŋ hiti kíceken kati hífulan umuuyen. Ⅴ Ekina ewune, Eenucee ya, ti ékey ya eteyoo ti púlunta pa, naasok:
 
“Aálafiit uwaaseen uti púlukuleen niŋ pikee paliyal,
pale uwwufanam enii.
Ⅵ Súumuti lompo ti uwaaseen uti púlukuleen peeleemanee motic
niŋ uwaaseen uti kaaponket umuuyen.
Ⅶ Fiye inci insok: 'Pútuun, eheeyam,
inci kéyyookey kati hín eeha állafiye ha,
samat nii fa inkiicee fa kutoom ti pakiical pa peesampanee pa.'”10:7 Kícimu 40:6-8
 
Ⅷ Eenucee ya náayaañ asok: “Aálafiit an kati awaaseeni púlukuleen niŋ pikee paliyal, súumuti ti uwaaseen uti púlukuleen peeleemanee motic, niŋ lompo uwaaseen uti kaaponket umuuyen.” Asokaasok eehe háati fa uwaaseen ewwuu nuuwaaseenee fa samat nii fa hilim ha heesiiŋanee ha hiti Móyiis nihisoke fa. Ⅸ Fiye naapenan: “Eheeyam, inci kéyyookey kati hín eeha állafiye ha.” Fiyuu náafulane waah wa úyaañ wa apisiiŋan úsupiyenu wa. Ⅹ Páawoo Yéesu Krista áhinaahin eeha Pútuun pa mpílafiye ha, ekina ewune nuukuulanee ti umuuyen kamma kaawaaseen enka náahine ka niŋ eniinoo poonool kóŋ.
Ⅺ Awaaseena óo awaaseena ati Pusuwif pa, nasiiŋosiiŋo hinak óo hinak ápihin páhin pa piteyoo. Náhinhin tan óo tan uwaaseen wa woonool wuu, apan uyinaat íhalu umuuyen wa uti pakan paka. Ⅻ Pale Eenucee ya áhinaahin kaawaaseen koonool ápihal umuuyen wa fo cancowiyaaw, púful toko naayeno look ti epees yáali ya eti Pútuun pa. ⅩⅢ Náayemi fiye ti hítuulu Pútuun pa pipitah pikamooloo ti wootoo naayeno amansa ya ateyii.10:13 Kícimu 110:1 ⅩⅣ Kaatuko ti kaawaaseen koonool náahine keeyemee ka ti kaakuulan kapiyeno pakan kéetuuniye fo cancowiyaaw. ⅩⅤ Kunuu ka keenape ka lompo nkíyisan unaa nii eehe hiti tooñaa. Nkíyaañ kusok:
ⅩⅥ “Aŋe ayem písiyool pa
empa inci inkaakaay pa hiliilu niŋ poko po hátikin.
Efiwas hilim ha hitoom heesiiŋanee ha ti saanii,
inkiic ho ti kunuuwii,
inci Ateeteyo soke ho.”10:16 Jeremiya 31:33
ⅩⅦ Nene kipenan:
“Inci etinene náwuno umuuyen wa uteyii
niŋ heenaput eeha nkáhine ha.”10:17 Jeremiya 31:34
ⅩⅧ Niŋ umuuyen uponketee, kaawaaseen kiti íhalu umuuyen, asoolahutee nene.
Kamukut ti káyinan
ⅩⅨ Ooto pakanam ti káyinan, úyiniyaayini pinako niŋ cíki la haŋee la kaasampan pínapii ti hísim ha hiti Yéesu. ⅩⅩ Eket ya eteyoo épankine unaa pítin péeyeeni pínapii ti kahuuy ka kenfakat ka, pítin peehiiŋe ti eloŋ. ⅩⅪ Nuutaakaa lompo awaaseena enfakat ti ekumpaan ya eti Pútuun pa.*10:21 Niŋ ekina tom: “awaaseena enfakat ti pakati Pútuun pa.” ⅩⅫ Páawoo utaakaataak oom pítin niŋ oom awaaseena enfakat, ooto ulohaa Pútuun pa niŋ kunuu keekuule peeŋatoolut ti káyinan ka kutuunaa, kaatuko hísim ha hiti Eenucee ya hikuulanaa-kuulan saan unaa ti pámiiloolal óo pámiiloolal peenaput ancuk kunuu unaa kitempanaa, siniin unaa insiñowee ti man meekuule. ⅩⅩⅢ Ucokaa piliit ti eeha nuusokaa ha nii úhinaahin cíki teeho, timpi ukatanaa, kaatuko éeyinanane ya unaa áfulantoo ti hilimoo. ⅩⅩⅣ Umíiloolaa puume éfuutunkoolaa ti kaapii kiti pálafi niŋ páhinal peenape. ⅩⅩⅤ Pakakee paka kasalaasal káwusen ti pipaakool nantoonool; timpi ninapanii. Pale uyankananoolaa pihaŋhaŋ toko nuucokaa piliit kamma innicuke nii hinoom ha hiti ékey ya eteyoo hílohaniyoo-lohan.
ⅩⅩⅥ Niŋ ucoonoolaa uputowiyaa ti kaamuuyen, unaa papayal hisayu kameye ka kiti tooñaa ya, kaawaaseen kiti íhalu umuuyen ewwuu nene kutowiit. ⅩⅩⅦ Heetowiye ha unaa hiyem, piyeno ti ewatate niŋ hítuulu heekaakaay ha ékey, hikina hiyem, hinoom eeha Pútuun pa éfipihin ha kíiti pikamool etempo mpuwantii ti seemak sa senfakat sa ensa efisisowii sa. ⅩⅩⅧ Niŋ an apookaa hínum hilim ha heesiiŋanee ha hiti Móyiis, keetantake pákasupak niŋ fotom pákahaaciil nkasok nii tooñaa, apookaapook hilim ha heesiiŋanee ha, oom an namukeemuk peetaakut paket hikaw. ⅩⅩⅨ Niŋ oom an añaŋee kaasiiŋan ti pisiya, puume conko inkaakaay hicuku ti an eefaace ti Añii ya ati Pútuun pa? Acokut likee hísim ha hiti písiyool pa heekuulanoo ha, naateñal Kunuu ka keenape ka kéeyisane ka unaa panap pa piti Pútuun pa. Puume inkaakaay hicuku teyoo? ⅩⅩⅩ Kaatuko úmeyiyaameyi eesoke ya nii:
“Kánukan atoom. Inci fañahanii heenaput eeha nkáhine ha.”10:30 Kakaman 32:35
Nene asok:
“Ateeteyo áfaahin kíiti pakanoo.”10:30 Kakaman 32:36
ⅩⅩⅪ Efiyeno hítaapanu henfakat aapunow ti sipees Pútuun pa peeyem pa kaloŋa.
ⅩⅩⅫ Nínawuno kunoom ka kúcook ka ta innisayane ta ekooŋan ya éesuume ya. Ti oom caanak innimukut hínum ti kúnuul kenfakat samat nii eeyem ti esuum. ⅩⅩⅩⅢ Pikee pa inniteñalee, innikallanee hátikin pakan paka, pikee pa inninanf ti pakakee paka keeyoke ka fiyuu. ⅩⅩⅩⅣ Kamma pákawii aluu ti káyinan nkakulee, aluu lompo innitaak paseeña samat nii aluu púlooŋ niyem po. Ta nkacoope ta hitaaku ha hitaaluu ti sempe, ínsuum aluu kamma innimeya nii efinitaak hitaaku henfakat heehaŋe ho, eeha innimeya ha nii etihitaak pilehu. ⅩⅩⅩⅤ Fiye ooto timpi niyesan puson aluu cíki ya etaaluu, kaatuko cíki eyyuu efeewun Pútuun pa mpucooy aluu meemak. ⅩⅩⅩⅥ Niñaŋaa kamukut ancuk kati níhin eeha Pútuun pa mpílafiye ha, innitaak eeha mpíyinanane ha. ⅩⅩⅩⅦ Hilim ha hiti Pútuun pa hisok:
“Etikamp, eeñaŋe ya ékey áfaakey
ántuŋ atakuuteen.
ⅩⅩⅩⅧ Pakanam keecoonoole ka
kamma káyinan ka kiteyii efikaloŋ,
pale súumutam ti an óo an eeyesanaam pusonoo.”10:38 Hapakuk 2:3-4
ⅩⅩⅩⅨ Unaa, uneetaataa payenka nkayesan ka pusonii Pútuun pa te nkápucaloolee, pale payenka nkataak ka káyinan te nkafakanee.

Ⅹ:Ⅶ 10:7 Kícimu 40:6-8

Ⅹ:ⅩⅢ 10:13 Kícimu 110:1

Ⅹ:ⅩⅥ 10:16 Jeremiya 31:33

Ⅹ:ⅩⅦ 10:17 Jeremiya 31:34

*Ⅹ:ⅩⅪ 10:21 Niŋ ekina tom: “awaaseena enfakat ti pakati Pútuun pa.”

Ⅹ:ⅩⅩⅩ 10:30 Kakaman 32:35

Ⅹ:ⅩⅩⅩ 10:30 Kakaman 32:36

Ⅹ:ⅩⅩⅩⅧ 10:38 Hapakuk 2:3-4