Ⅰ Yéesu náameyi nii Pufalisaay pa kásiyaasi nii akina oopa ti hitaaku niŋ íhinu pátise pinapana pihaŋ Saŋ Ⅱ (apan Yéesu tom faŋoo ayeniye íhinu pátise pale pinapana pa pakateyoo). Ⅲ Fiye, Yéesu náaful Judaay apuñoho Galilee. Ⅳ Añaŋaa hinapu ti mah ma miti Samali.

Ⅴ Ti oom pítin, Yéesu naacol ti saatee ya eyya nkasok ya Sikaa ti mah ma miti Samali, pukol etaam eyya Jakob naawune ya faw añiinoo Josef. Ⅵ-Ⅷ Toko ésaapun ya eti Jakob neeyem. Caanak ca ti hikaw, Yéesu naayok ti kasapal ka, naayeno pukol ésaapun ya, pinapana pa pakateyoo nkakaay ti saatee ya hinoom paliyal.

Ti oom káayenuma, akee aal ati Samali náakey piyook. Yéesu naasokoo: “Wunam pilaan.” Ⅸ Aal a naañahanoo: “Pale awe Asuwif inci aal ati Samali, puume ayyinaam kaluum man?” Asokaasok eehuu kaatuko Pusuwif pa kanakanooliyantoo niŋ pakati Samali. Ⅹ Yéesu naañahanoo: “Niŋ aameya hínum kawun ka kiti Pútuun pa, ímmeyi eeyemuu ya ti kaluum man, awe himuumi anti luumoo man, naawuni man miti eloŋ.” Ⅺ Aal a naasokoo: “Ahámpaatiin, awe taakut nikopu apan ésaapun ya éloosaaloos. Puume áafayini hitaaku man ma miti eloŋ eyyuu? Ⅻ Maamaa atoonii Jakob awufane unii ésaapun eyye, akina himuumoo le nalaan hínum, niŋ epuukoo niŋ pukoolee pa piteyoo. Fo an puume ancoke faŋi? Fo awe haŋoo hamake?” ⅩⅢ Yéesu naañahanoo: “An óo an aŋa nalaan man emme, pálaani efinene pucokoo, ⅩⅣ pale an óo an aŋa eelaane man emma inci uwwunoo ma, pálaani etinene pucokoo fo cancowiyaaw: man emma inci uwwunoo ma efimiyeno teyoo káapun kenfakat keekaakaayoo kawufan eloŋ ya eepayantoo ya.” ⅩⅤ Aal a naasokoo: “Ahámpaatiin, wunam ti man emmuu ancuk pálaani etinene pucokam, etinene wasoolo ékey piyook le man.”

ⅩⅥ Yéesu naasokoo: “Kaay cáayonkalii áyiini íññohoonii le.” ⅩⅦ Aal a naañahanoo: “Inci taakut áyiin.” Yéesu naasokoo: “Aasokaasok páni fa ansoke fa nii aataakut áyiin. ⅩⅧ Kaatuko pákayiin isak antaake hínum apan aŋa ayyem ya fiye neyoo áyiini tom. Páni ansoke.” ⅩⅨ Aal a naasokoo: “Ahámpaatiin, inci cukaa nii awe ayaamakoola. ⅩⅩ Símaama unii, ti tíntiŋ eyye nkaluum Pútuun pa, pale aluu Pusuwif pa innisok nii, la ñaŋee la kaluum Pútuun pa yem Jerusalem.” ⅩⅪ Yéesu naasokoo: “Aaluu, yínanam, caanak unca ti ékey, etinene niluum Paapaa ya ti tíntiŋ eyye lamma niŋ ekina tom Jerusalem. ⅩⅫ Aluu pakati Samali inniluumluum aŋa ínnimiit, unii Pusuwif pa nuuluum aŋa nuumeya, kaatuko ti Pusuwif pa Pútuun pa éfipinapii kati pifakan pakan paka. ⅩⅩⅢ Pale caanak unca ti ékey cícoliyoocol fala, ta sempe sa siti Kunuu ka keenape ka niŋ siti tooñaa ya éfisihin pakan paka kápiyenoonii puluuma pánipani pakati Paapaa ya,*4:23 Niŋ ekina tom: “Pale caanak unca ti ékey cícoliyoocol fala, ta puluuma pánipani efinkaluum Paapaa ya ti kunuu niŋ ti tooñaa, kaatuko payenkuu kayem puluuma pa payenka Paapaa ya naayem ka ti hiŋes.” kaatuko payenkuu kayem puluuma pa payenka Paapaa ya naayem ka ti hiŋes. ⅩⅩⅣ Pútuun pa, kunuu; sempe sa siti Kunuu ka keenape ka niŋ siti tooñaa ya, sikina lamma síyina íhinu pakan paka kápiyenoonii puluuma pánipani.”†4:24 Niŋ ekina tom: “Pútuun pa, kunuu, payenka efikaluum po pa kañaŋaa po kaluum ti kunuu niŋ ti tooñaa.” ⅩⅩⅤ Aal a naasokoo: “Méyimeyi nii Mesi ya aŋa nkasok a lompo Eenucee ya ati Pútuun pa oopa ti ékey. Niŋ ákeyyoo afaakaman unii waah óo waah.” ⅩⅩⅥ Yéesu naasokoo: “Inci eeyem a fiye ti káakup naawe, inci yem akina.”

ⅩⅩⅦ Ti oom káasiiŋuma, pinapana pa pakati Yéesu nkáñohoonii, ínnimii ta nkacukoo ta ti káakup niŋ aal. Pale háati oonool teyii acakanutoo: “Weyme állafiye?” niŋ ekina tom: “Weyme uwune áyyemi ti káakup niŋ aal aŋe?” ⅩⅩⅧ Fiye, aal a naakat toko élumpa ya eteyoo naañoho ti saatee ya naasok pakan paka: ⅩⅩⅨ “Níkey nipisincan akee áyiin eesokaam waah wa púlooŋ ewwa inci ínhine wa. Fo áyiniyini piyeno Eenucee ya?” ⅩⅩⅩ Fiye nkáfulii ti saatee ya nkakaay pati Yéesu.

ⅩⅩⅪ Eehuu púlooŋ ti pitaako, pinapana pa pakateyoo nkaŋiiniyoo nkasokoo: “Rabi, li waah!” ⅩⅩⅫ Pale naañahanii: “Inci taakaataak paliyal piti hili empa aluu ínnimiit.” ⅩⅩⅩⅢ Pinapana pa pakateyoo nkayeno picakanool: “Fo an ákeyyookey apuwunoo paliyal?” ⅩⅩⅩⅣ Yéesu naañahanii: “Paliyal pa putoom piyem íhinu héesuume ha éepoñiyaam ya, impa páhin empa naawufanaam pa. ⅩⅩⅩⅤ Fo nisokantoo: 'Le niŋ kiim kipaakiil efuumaañaa'? Pale inci insok: níhaafin, innisincan ukit wa, útuuniyaa kaamaañ! ⅩⅩⅩⅥ Aŋa namaañ a oopa ti hisayu cooy ya eteyoo, naaconcenool paliyal, pikina piyem pakan paka keeyem ka ti ékey ti eloŋ ya eepayantoo ya. Ancuk aŋa nasuk a niŋ aŋa namaañ a efikataak pásuuma ti coonool. ⅩⅩⅩⅦ Kusoku enke kiti páni: 'Akee nasuk akee naamaañ.' ⅩⅩⅩⅧ Inci poñe aluu nipimaañ kaakit enka ínnihinut. Pakakee káhine ko, aluu innimaañ páhin pa piteyii.”

ⅩⅩⅩⅨ Hícump pakati Samali keekine ka ti oom saatee nkáyinan ti Yéesu kamma aal a naasokii: “Asokaamsok eeha púlooŋ inci ínhine ha.” ⅩⅬ Ekina ewune pakati Samali ta nkacole ta pati Yéesu nkaluumoo apiyeno neyii, Yéesu naayeno neyii kunoom kúsupak. ⅩⅬⅠ Kéeyinane ka teyoo nkahaŋ toko nkameeŋe meemak kamma kilim ka kiteyoo, ⅩⅬⅡ nkasok aal a: “Fiye úyinanutoo kamma eeha ansoke ha unii pale kamma unii faŋ unii núusiyoo, núumeyi nii akina ayem Afakana ya pánipani ya ati púlunta pa.”

ⅩⅬⅢ Kunoom ka kúsupak enkuu kupumuus, Yéesu náaful toko naañoho Galilee. ⅩⅬⅣ Akina himuumoo mpaasok: “Ayaamakoola ámakiyanantee ti saatee ya eteyoo.” ⅩⅬⅤ Fiye ta naacole ta Galilee, pakati toko nkawananoo kaatuko poko lompo kakaayaakaay pahaaño pa piti Himuusu haJerusalem nkacuk eeha púlooŋ naayeniye ha íhinu ti pahaaño pa.

ⅩⅬⅥ Púful toko, Yéesu náañohoonii Kana eti Galilee pa naayesane pa man ma elaan. Intaak áhampaatiin áhina ati amansa ya aŋa añiinoo akampaani éekuuñe ti saatee ya eti Kafaanawum. ⅩⅬⅦ Ta náasiye ta nii Yéesu áfuliyooful Judaay ápucolii Galilee, naakaay teyoo naaluumoo apuwano Kafaanawum káakuuñan akampaani ya ateyoo eeyem ya ti putum eket. ⅩⅬⅧ Yéesu naasokoo: “Taamanta nicukut píyisan niŋ weecukantee étiniyinan púlay!” ⅩⅬⅨ Ahína ya naañahanoo: “Ahámpaatiin, wano niŋ inci le niŋ añiinam afaaket!” Ⅼ Yéesu naasokoo: “Kaay, añiini afaaloŋ.” Ayíin a náayinan hilim eeha Yéesu naasokoo ha, naakaay. ⅬⅠ Ta naayeniye ta puñoho, pimiikan pa pakateyoo nkapaakoolanoo nkasokoo: “Añiini oopa kaloŋa!” ⅬⅡ Naacakanii: “Teyme naafisake?” Nkañahanoo: “Hukan papayal hili kawaay pasowe-eniinoo mpifisake.” ⅬⅢ Paapaa ya náapannum nii, tempo Yéesu naasokoo nii: “Añiini afaaloŋ.” Fiye akina niŋ miin ma miteyoo púlooŋ nkáyinan ti Yéesu.

ⅬⅣ Eehuu hiyeniye píyisan pa púsupiyenu pa empa Yéesu náahine pa Galilee, ta náañohoonii ta ápufulii Judaay.