Ⅰ Púful toko Yéesu naasilo Jerusalem kamma pikee pahaaño piti Pusuwif. Ⅱ Po Jerusalem, pukol Putum pa piti Písaacii pa, intaak éwacuma eelutee neetaak sícimpaŋ isak, eyya neyonkalee Petusata ti kaŋ ya eti Hiburu. Ⅲ Ti oom pícimpaŋ pakan keemeeŋe kéekuuñe nkahinto: kéefuume, kéehute niŋ payenka nkanow niŋ efank.*5:3 An ámiit man Saŋ lompo akiice fiye: “Hítuulu nkayeniye man ma kati muwenee. 4 Kaatuko maleekoo eti Pútuun neloom ékey neewen man ma. Niŋ epayaa mo hiwenu, aŋa náyaañ a apinako ti man ma nákuuñanee-kúuñan, ti káakuuñu óo káakuuñu enka naataake.” Ⅴ Intaak toko áyiin éehute fo sitiil áwii niŋ kaat niŋ síhaaciil (38).

Ⅵ Yéesu naacukoo la naahintiye la, náasi nii afiyyaa ti oom pacuk naasokoo: “Aálafilafi kafisak?” Ⅶ Eéhute ya naañahanoo: “Ahámpaatiin, taakut an eekaakaayam kámocan ti éwacuma ya niŋ man ma muwenee. Niŋ inci yeniyaa pikaayu, cólum, akee náatikinam.” Ⅷ Yéesu naasokoo: “Lito! Coop kahun ka kitii inkaay.” Ⅸ Tokotoko áyiin a náakuuñanee, náaseepin kahun ka kiteyoo náayaañ pikaayu.

Eehuu ti hinoom ha hiti kayeno ka hiti Pusuwif pa nihitaakiye. Ⅹ Ekina ewune pakati kikaw ka pakati Pusuwif pa nkasok áyiin a éekuuñanee ya: “Fíyooy hinoom ha hiti kayeno ka, aañaŋut káaseepin kahun ka kitii.” Ⅺ Pale naañahanii: “Ayíin a éekuuñanaam a asokaam: 'Coop kahun ka kitii inkaay.'” Ⅻ Nkacakanoo: “Ayme áyiin asokuu: 'Coop kahun ka kitii inkaay'?” ⅩⅢ Pale éekuuñanee ya ámiit oom an kaatuko pakan paka kameeŋaameeŋ apan Yéesu naapuuto.

ⅩⅣ Po hátikin, Yéesu naatook áyiin a ti ekumpaan ya enfakat ya eti Pútuun pa naasokoo: “Síitan! Aákuuñanee-kúuñan, timpi nene muuyen ancuk heehaŋe luu timpi hitaakiyi.” ⅩⅤ Púful toko, áyiin a naacaasok pakati kikaw ka pakati Pusuwif pa nii Yéesu ákuuñanoo. ⅩⅥ Ekina ewune pakati kikaw ka nkáyaañ kaakallan Yéesu kamma naayeniye íhinu enkuu ti hinoom ha hiti kayeno ka. ⅩⅦ Pale Yéesu naañahanii: “Paapaa atoom oopa ti páhin fo fiye, inci lompo oopa ti páhin.”

ⅩⅧ Pañahanal empuu puwune pakati kikaw ka pakati Pusuwif pa nkahaŋ toko nkaŋese fa efikamuk Yéesu. Kaatuko Yéesu átuulut hinoom ha hiti kayeno ka, apan naasok nii Pútuun pa faafoo, apilehoolan faŋoo niŋ Pútuun pa.

ⅩⅨ Yéesu naañahan pakati kikaw ka: “Inci pusok aluu pánipani ya, Añii ya ayinaat íhinu waah faŋoo pale eeha nacuk ha ti Paapaa ya, kaatuko eeha Paapaa ya náhin ha, hikina Añii ya lompo náhin. ⅩⅩ Paapaa ya álafilafi Añii ya, náyisanoo eeha púlooŋ náhin ha. Afánayisanoo lompo weecukantee weehaŋe pafom ewwa inniyem wa fiye ti hicuku, ancuk aluu niŋaŋiyaa. ⅩⅪ Samat nii fa Paapaa ya nalitan fa keekete ka naawufanii eloŋ ya, fo lompo Añii ya naawufan eloŋ ya aŋa náalafiye ya. ⅩⅫ Apan Paapaa ya áhinantoo kíiti an, pale Añii ya naakate kati áhin kíiti, ⅩⅩⅢ ancuk pakan paka púlooŋ kati kámakiyan Añii ya, samat nii fa nkámakiyan fa Paapaa ya. Aŋa éemakiyanut a Añii ya, ámakiyanut lompo Paapaa ya éepoñiyoo ya.

ⅩⅩⅣ “Inci pusok aluu pánipani ya, aŋa éesiye hilimam náayinan aŋa éepoñiyaam ya, ataakaa eloŋ ya eepayantoo ya, átahinee kíiti pale áfuliyooful ti eket ya apinako ti eloŋ ya. ⅩⅩⅤ Inci pusok aluu pánipani ya, caanak unca ti ékey cícoliyoocol fala, ta keekete ka éfikasi hilim ha hiti Añii ya ati Pútuun pa, apan keekaakaay ho ka hísiyu efikaloŋ. ⅩⅩⅥ Samat nii fa Paapaa ya naayekane fa eloŋ ya ti himuumoo fo lompo naawufane Añii ya apiyekan eloŋ ya ti himuumoo. ⅩⅩⅦ Naawufanoo kayine kiti íhinu kíiti kamma naayem Añii An. ⅩⅩⅧ Timpi niŋaŋo kamma eehuu, kaatuko caanak unca ti ékey ta keeyem ka púlooŋ ti kiyaak ka éfikasi hilimoo, ⅩⅩⅨ nkálitoonii ti eket ya. Kéehine ka heenape ha éfikalitoonii ti eket ya nkataak eloŋ ya, kéehine ka heenaput ha éfikalitoonii ti eket ya nkasiiŋanee ti pisiya.

ⅩⅩⅩ “Inci himuumam yinaat íhinu waah, eeha inci ínsiye ha ti Paapaa atoom inci nínhin kíiti. Páhinalam kíiti peecoonoole kaatuko ŋesut héesuumaam ha pale héesuume ha éepoñiyaam ya.”

ⅩⅩⅪ Yéesu nene asokii: “Niŋ inci yeniyaa eetantake ya ati faŋam, eeha inci insok ha hiti pánipani tom. ⅩⅩⅫ Akee ayeniye eetantake ya atoom, méyimeyi nii eeha naasoke ha kutoom hiti páni. ⅩⅩⅩⅢ Aluu, innipoñ pakan ti Saŋ, akina eetantake ya atoom naasok pánipani ya. ⅩⅩⅩⅣ Iyyema inci, soolahut an apiyeno eetantake ya atoom pale sokaasok enkuu kati nifakanee. ⅩⅩⅩⅤ Saŋ acukaacuk samat nii lampi eecaaŋanee picaaŋ cataŋ, ínsuum aluu hínum ti kakalaŋan ka kiteyoo ti caanak ceetama. Pakalaŋanal empuu pucukaacuk nii ecaaŋ enfakat. ⅩⅩⅩⅥ Pale iyyema inci, taakaataak waah weetantake kutoom pihaŋ eeha Saŋ naasoke ha kutoom, ukina uyem weecukantee ewwa Paapaa ya naawufanaam wa píhin, íyyemi wo ti íhinu. Pikina mpíyisan nii Paapaa ya ápoñiyaam. ⅩⅩⅩⅦ Paapaa ya éepoñiyaam ya, akina himuumoo ayem eetantake ya atoom. Pale nitaapala nísi hilimoo, niŋ fotom hicuku himuumoo. ⅩⅩⅩⅧ Hilim ha hiteyoo hikinut ti saan aluu kaatuko níyinanut aŋa náapoñii ya. ⅩⅩⅩⅨ Innikalaŋkalaŋ pinap hilim ha hiti Pútuun pa kaatuko aluu nímiiloolaa-míilool nii tenko efinitaak eloŋ ya eepayantoo ya, ántuŋ kilim enkuu kutoom nkúkupe. ⅩⅬ Pale innipook ékey ti inci kati nitaak eloŋ ya.

ⅩⅬⅠ “Soolahut hímulu hiti pakan. ⅩⅬⅡ Pale méyimeyi aluu, nílafiit Pútuun pa. ⅩⅬⅢ Ti caacaw Paapaa atoom inci ínkeyii, nisayanutam. Niŋ akee ákeyyoo ti caacaw faŋoo efinisayanoo. ⅩⅬⅣ An óo an oopa ti hiŋes kámakiyan kéefulii ti áwiyoo, pale niŋesut kámakiyan ka kéefulii ka ti Pútuun pa poonool pa. Fiye, puume éfiniyiniyam káyinan? ⅩⅬⅤ Timpi nímiilool nii inci fayeno anooka ya ataaluu hátikin Paapaa ya, anooka ya ataaluu ayem Móyiis aŋa ínnihine ya cíki. ⅩⅬⅥ Niŋ níyinanaayinan Móyiis, anti níyinanam kaatuko kutoom naakiice. ⅩⅬⅦ Pale niŋ níyinanut eeha naakiice ha, puume éfiniyini káyinan hilimam?”