Leetal ya eepoñee ya pakati Filipoy
Filipoy
Waah wa weeyem wa ti leetal eyye
Aluu pakanam ti káyinan keeyemaam ka ti káasiitan, inci kicanaa.
Leetal eyya nuuyemaa ya fiye ti káasiitan, Póol akiice yo, akina ti núkuluma. Póol apoñapoñ a ati Eenucee ya, Yéesu Krista. Naakiic yo ti kéeyinane ka pakati canku ya eeyem ya ti saatee ya eti Filipoy. Canku eyyuu, Póol asiiŋane yo. Naakalaŋan toko, le niŋ afaawantee ti núkuluma.
Akina ti núkuluma ya, kéeyinane ka pakati Filipoy nkawantool sipees, nkawufan mañ ma akee áyiin aŋa nkasok Epaflotit apucoopoo mo. Ekina ewune, Póol naakiic leetal eyye, apusokii apalaka.
Ti leetal eyye, naapenanii páhaañi kati katowo ti káyinan ka kiteyii hátikin keepookii ka nkáyemiyii ti kaakallan. Naasokii kataak tan óo tan pásuuma, nkaluum Pútuun pa nkasok po apalaka ti waah óo waah. Naalompo asokii, timpi kásiitan pakakee pikalaŋana pa keeneetaat ka ti kakalaŋan kiti ekooŋan ya éesuume ya eti Yéesu Krista.
Ti kayoŋ ka kiti pikalaŋana pa keeneetaat pa pánipani payenkuu, intaak pakakee keecoke kíp ti cosaan ya eti Pusuwif pa. Ti cosaan ya eti Pusuwif pa, nkanakan-nakan epuukii niŋ kataakaa kunoom isak niŋ kíhaaciil samat nii fa Pútuun pa mpusoke fa Abraham maamaa ateyii. Kanakan enkuu kikina kiyem píyisan pa piti písiyool pa empa Pútuun pa mpiliile pa niŋ pakan etempo. Pale pamuusal eket ya niŋ pilito pa piti Yéesu, kanakan enkuu kitaakut nene nafaa, kaatuko Yéesu afakane unaa pale neetaat kanakan. Ti caanak ca citi Póol, pakakee pikalaŋana pa keeneetaat ka pánipani payenkuu, nkasok nii an anakanutee ayinaatee kafakan, ekina ewune Póol náañiken meemak, kaatuko kaalehanool kanakan nkayaake niŋ Yéesu Krista.
Naasokii lompo kati kawananoolo faŋii samat nii Yéesu, nkacok pakakee paka pahaŋ fa nkacoke fa faŋii. Ancuk kati káyini piyeno pakoonool. Naasokii, eloŋ ya eti Yéesu nkañaŋe káyipenan. Nkáyipenan lompo ñíhampaatiin ña pakati canku ya, keeyem ka ti eloŋ samat nii Yéesu. Ti piyeno pakoonool nuuyinaa pisiiŋo kíp ti káyinan ka kiti unaa ti ekooŋan ya éesuume ya.
Alaapalaka ti káasiitan ka kitaaluu. Alímaati Pútuun pa púwiiniyan saan unaa mpípankin kunuu unaa kati úyiniyaa kasayan hilim etempo ti caacaw Añii etempo Yéesu Krista. Amíini.
Ⅰ
Kakican ka
Ⅰ Aŋe inci Póol niŋ Timote, pimiikan pakati Yéesu Eenucee ya, ukicanaa aluu púlooŋ. Inci oopa ti hikiicu aluu keesampanee ka pakati Yéesu Krista keeyem ka ti saatee ya eti Filipoy, niŋ pakati kikaw ka pakati aluu niŋ piyankanana pa pakateyii.
Ⅱ Alímaati Pútuun pa Paapaa ati unaa niŋ Ateeteyo Yéesu Krista kasampan aluu, nkawufan aluu kásuumaay.
Hisoku ha hiti Póol Pútuun pa apalaka
Ⅲ Tan óo tan ta kunuuwam nkílike aluu, insok Pútuun pa piti unaa apalaka. Ⅳ Illuumluum niŋ pásuuma, tan óo tan ta inci iyyeniye kaluum kiti aluu púlooŋ, Ⅴ kaatuko niyankananaam-yankanan káatuunan ekooŋan ya éesuume ya, kápiliŋ hinak ínniyaañe yo ta hísiyu fo fíyooy. Ⅵ Eehe íhiiniyaam-híini hat nii: Pútuun pa peeyem pa ti íhinu páhin pa peenape empe ti aluu kápiliŋ ta ínniyinane ta, efiputowo po ti íhinu fo pipa ta Yéesu Eenucee ya naakaakaay ta éñohoonii. Ⅶ Napaanap fa inci intaake fa pámiiloolal pa peenape empe ti aluu púlooŋ, kamma uwwase aluu ti yaanam. Kaatuko man inci oopa ti núkuluma, niŋ fotom ti pisiiŋo ekooŋan ya éesuume ya píyisan nii eti pánipani, inci niŋ aluu pakoonool ti kaasampan ka kiti Pútuun pa. Ⅷ Pútuun pa pímeyimeyi nii inci láfilafi aluu púlooŋ ti yaanam samat nii fa Yéesu Krista náalafiye fa aluu.
Ⅸ Eehe inci illuum Pútuun pa kiti aluu: Pútuun pa píhin pálafi pa piti aluu pipipenano pihaŋhaŋ toko, innitaak kameye pántoon, ínniyemi pakati kunuu kenfakat. Ⅹ Fiyuu inniyina kayesal heehaŋe ha panap, ancuk kati nikuul, étiniyiniyee kawatan ti waah fo ta hinoom eeha Eenucee ya ati Pútuun pa naakaakaay ha éñohoonii. Ⅺ Eloŋ ya eti aluu lompo neemeeŋ niŋ páhinal peenape samat nii enuun eyya nepuk papukal peenape, pínapii ti Yéesu Krista, ancuk Pútuun pa kati pímakiyanee mpúmulee.
Eloŋ niŋ eket ti Eenucee ya ati Pútuun pa
Ⅻ Pakanam ti káyinan, láfilafi nípimeyi nii heetaakiyaam ha hiwune, hícump pakan nkáyemi ti hísiyu ekooŋan ya éesuume ya pihaŋhaŋ toko. ⅩⅢ Ekina ewune pusoocaali pa púlooŋ payenka nkafaas ka ékinuma ya eti amansa ya ati Room niŋ pakakee paka púlooŋ nkámeyi nii inci oopa ti núkuluma kamma iyyem ti páhin Eenucee ya. ⅩⅣ Keehaŋe ka pameeŋ ti kéeyinane ka lompo, ta nkásiye ta nii inci oopa ti núkuluma, nkahaŋ toko nkáyinane Ateeteyo, nkataak púsus piti káatuunan ekooŋan ya éesuume ya peefeyut.
ⅩⅤ Pánipani pakakee paka, ti paheeka niŋ ti páhaŋool nkátuunan kiti Eenucee ya, pale pakakee paka ti yaan eekuule. ⅩⅥ Payenkuu nkáhinhin ho kamma nkálafiyaam, nkámeyi nii inci oopa le ti pisiiŋo ekooŋan ya éesuume ya. ⅩⅦ Pale pakakee paka, kátuunanantoo kiti Eenucee ya ti yaan eekuule pale ti páhaŋool, pucukii nii éfikahinam pihaŋ incuke kúnuul ti núkuluma ne. ⅩⅧ Eehuu waah tom! Man pámiiloolalii peenape niŋ fotom peenaput, heehaŋe ha hitaaku hikaw hiyem, fan óo fan incuke, kiti Eenucee ya nkátuunan, apan eehuu nihiwufanam pásuuma.
Ee efihitowiyam ti kawufan pásuuma, ⅩⅨ kamma inci immeya nii, heetaakiyaam ha púlooŋ, efihitempo ti pikelan. Inci fafakanee pínapii ti kaluum ka kitaaluu niŋ kayankanan ka kiti Kunuu ka keenape ka kiti Yéesu Krista. ⅩⅩ Pánipani eeha inci iyyem ha ti hítuulu niŋ eeha inci ínhine ha cíki hiyem: inci étihin eeha efihisuuwanam, pale intaak páhaañi samat nii fa inci intaak fa tan óo tan páhaañi. Pínapii ti páhaañi empe, Eenucee ya áfaamakiyanee kamma inci, man niŋ inci ketaa, niŋ fotom íyyemi kaloŋa. ⅩⅪ Kaatuko ti inci, Eenucee ya ayem eloŋ ya etoom, apan efifisakam niŋ inci ketaa. ⅩⅫ Pale niŋ inci oopa kaloŋa ti púlunta empe, inci fáhin páhin peetaake nafaa. Ooto ti pututa eket niŋ eloŋ, míit eeha inci famamal. ⅩⅩⅢ Kunuuwam unka kinakanooliye ti waah wa úsupak ewwe: láfilafi eket kati yeno niŋ Eenucee ya, eehuu hifisaka fo muus. ⅩⅩⅣ Pale haŋa pitempo ti aluu inci píyemi kaloŋa. ⅩⅩⅤ Páawoo eehuu íhiiniyaam-híini, inci méyimeyi nii fayeno kaloŋa, iyyeno niŋ aluu ancuk kati yankanan aluu nipikaay hátikin, innitaak pásuuma ti káyinan ka. ⅩⅩⅥ Ancuk niŋ inci ñóhooniyoo pati aluu, innihaŋ innimaayooliye ti Yéesu Krista kamma inci.
Eloŋ ya eti ekooŋan ya éesuume ya
ⅩⅩⅦ Fan óo fan intaakiye, eloŋ ya eti aluu étuuno samat nii kéeyinane ti ekooŋan ya éesuume ya eti Eenucee ya ati Pútuun pa. Inníhinaa fo, niŋ inci kéyyoo ti aluu niŋ fotom, kéyyoot hiyoop aluu, ínsi nii aluu unka nicoke piliit ti pámiiloolal poonool. Fiyuu inci fámeyi nii nicokoolaa-cokool, ínnisiyool innicok piliit hátikin keepooke ka ekooŋan ya éesuume ya, inniñañahool kati nítuunan yo. ⅩⅩⅧ Timpi nikat keepooke ka aluu kapifeyanool aluu ti waah: tempo éfikameyi nii éfikapucaloolee pale aluu innifakanee. Eehuu pati Pútuun pa níhifulii. ⅩⅩⅨ Kaatuko Pútuun pa puwunut aluu nípiyinan lamma ti Eenucee ya, pale nipicuk lompo kúnuul kamma akina. ⅩⅩⅩ Inci niŋ aluu ti esuum ya yoonool ya nuuyemaa. Esuum ya yoonool ya eyya innicukaam ya teyyo, ínnisi fiye nii inci loŋaa teyyo.