Ⅱ
Káyipenan ewananoolo ya eti Eenucee ya ati Pútuun pa
Ⅰ Fo eloŋ ya eti aluu niŋ Eenucee ya, ewufanaawufan aluu páhaañi? Fo pálafi pa piteyoo píhinaahin aluu nípiwaayeen? Fo nitaakaataak himpaac ti Kunuu ka keenape ka? Fo Eenucee ya anapaanap ti aluu, naataak paket hikaw ti aluu? Ⅱ Ooto níhin púsuumam pántoon: nílafooli, nísiyool ti pámiiloolal poonool, saan aluu insiyeno soonool ti waah óo waah. Ⅲ Timpi ínnihin waah uti páhaŋool niŋ fotom éyisanoolo. Pale niwananoolo, ínnimiilool pakakee paka pihaŋ faŋ aluu. Ⅳ An óo an aŋes héesuume ha pakakee paka pale hiteyoo lamma tom.
Ⅴ Nímiilool samat nii Yéesu Eenucee ya.
Ⅵ Kápiliŋ ti púcook pa akina oonooluu niŋ Pútuun pa,
apan acokut piliit ti hilehu ha hiteyoo niŋ Pútuun pa.
Ⅶ Pale naawaat faŋoo ti waah óo waah ewwa naataake,
naapukee nii an,
fo náayenoonii amiikan.
Ta náayenoonii ta an,
Ⅷ naawananoolo, náatuul Pútuun pa fo aket,
apan naaket ti kuluwaa.
Ⅸ Ekina ewune, Pútuun pa mpisilanoo la haŋe la pamake,
mpuwufanoo lompo caacaw ca ceehaŋe ca caacaw óo caacaw.
Ⅹ Ancuk keeyem ka alacana, keeyem ka t’etaam, niŋ keeyem ka páhantuwa etaam ya,
niŋ caacaw ca citi Yéesu ciluwee,
káacuun óo káacuun éfikikilipo,
Ⅺ híleeluuf óo híleeluuf efihisayan nihisok nii,
Yéesu Krista ayem Ateeteyo,
ancuk Pútuun pa Paapaa ya pímakiyanee.
Ecaaŋ ti púlunta pa
Ⅻ Ooto pákawiyam ti káyinan, nítuulaatuul tan óo tan Pútuun pa ta inci iyyeniye ta niŋ aluu, pale páawoo inci neetaat puu fiye niŋ aluu, niñaŋaa po hítuulu pihaŋ toko. Níhin kata óo kata kati níyisan nii nifakaneefakan, te níhin ho niŋ ewatate niŋ kakikilan hátikin Pútuun pa. ⅩⅢ Kaatuko Pútuun pa piyem ti páhin ti aluu kati nílafi eeha mpílafiye ha, ínnihin ho lompo.
ⅩⅣ Níhin waah óo waah péekumutoolut niŋ fotom péelaacinoolut, ⅩⅤ ancuk niyeniyaa epuuk Pútuun pa keekuule nkacoonool. Háati fa innikine fa ti pututa pakan keenaput nkakanc, étiniyiniyee kawatan ti waah. Fiyuu efiniyeno ecaaŋ teyii samat nii picaaŋaŋ pa piti útiŋu wa, ⅩⅥ ti káyisanii hilim ha hiti eloŋ ya. Inníhinaa eehuu, inci fáyini emaayoolo kamma aluu ti hinoom eeha Eenucee ya ati Pútuun pa áfaañohoonii ha, insok nii páhin pa putoom púlooŋ pineetaat páhin kenseŋ, kúnuul ka kutoom púlooŋ lompo kineetaat kúnuul kenseŋ.
ⅩⅦ Heenape ha eeha ínnihin ha héefulii ha ti káyinan ka kiti aluu, hicukaacuk nii kaawaaseen kéesuume Pútuun pa. Pikee pa efikamukam, pale niŋ eehuu hitaakiyaa, hísimam efihiniisee hipihankan kaawaaseen enkuu, ínsuumam meemak intaak pásuuma niŋ an óo an ti aluu. ⅩⅧ Fo lompo incuke, nitaak pásuuma niŋ inci.
Timote niŋ Epaflotit
ⅩⅨ Niŋ súumaa ti Ateeteyo Yéesu, inci fápoñii ti aluu Timote toko fiye, ancuk waniyaam ti eeha inci inkaakaay ha hísiyu héefulii ti aluu. ⅩⅩ Inci taakut an eetaake aluu ti yaanoo samat nii akina.*2:20 Niŋ ekina tom: “Niŋ neetaat akina, inci taakut an eetaake aluu ti yaanoo samat nii inci.” ⅩⅪ Pakakee paka púlooŋ kiti faŋii nkámiilool, pale neetaat kiti Yéesu Krista. ⅩⅫ Pale nímeyimeyi fa Timote náayisane fa nii akina an eenape, kaatuko áhinaahin niŋ inci ti káatuunan ekooŋan ya éesuume ya, samat nii fa añii nayankanan fa paapaa ateyoo. ⅩⅩⅢ Ooto láfiyoolafi époñii ti aluu niŋ inci meya heekaakaayam ha pitaako. ⅩⅩⅣ Apan intaak cíki ti Ateeteyo nii, inci lompo etifiyo fákey puu ti aluu.
ⅩⅩⅤ Inci ímmiilool nii napaanap píñahanii aluu Epaflotit, an unaa ti káyinan, aŋa ínnipoñii ya peti inci kati ayankananam ti waah ewwa inci insoolahe wa. Akina áwiyam ti páhin pa niŋ ti pítaakool pa piti káatuunan ekooŋan ya éesuume ya. ⅩⅩⅥ Náalafi meemak kati acuk aluu púlooŋ, kunuuwoo kitempanut kamma ínnisiye nii ákuuñaakuuñ. ⅩⅩⅦ Páni ákuuñaakuuñ hínum, fo alohan eket, pale Pútuun pa mpitaak paket hikaw teyoo, te pilehut teyoo lamma pale focaa ti inci lompo, ancuk kúnuul ka kutoom timpi kihaŋ toko. ⅩⅩⅧ Ekina ewune inci inhaŋ toko inhiliikane fanfaŋ púpoñiyoo ti aluu, ancuk innicukoo nene innitaak pásuuma, inci lompo kúnuul ka kutoom nkíkaasino. ⅩⅩⅨ Ooto niwananoo pinap ti caacaw ca citi Ateeteyo niŋ pásuuma penfakat. Nímakiyan pakan paka payenkuu fiyaaw. ⅩⅩⅩ Kaatuko caahinkilis naaket kamma páhin pa piti Eenucee ya ati Pútuun pa. Naanaŋ eloŋoo kati ayankananam kayankanan enka inniyinaatam ka kayankanan.
*Ⅱ:ⅩⅩ 2:20 Niŋ ekina tom: “Niŋ neetaat akina, inci taakut an eetaake aluu ti yaanoo samat nii inci.”