ⅩⅧ
Enow ya eti saatee ya enfakat ya eti Babilon
Ⅰ Eehuu hipimuus, incuk ekee maleekoo éefulii alacana épuwanoonii. Neetaak sempe senfakat, hamake eteyyo nihicaaŋan etaam ya. Ⅱ Neeceek meemak neesok:
“Anowaa! Babilon enfakat ya anowaa!
Ayénooniyoo ékinuma piseetaani niŋ hísaalumant óo hísaalumant,
niŋ ékinuma eti pusuwa óo pusuwa peekuulut mpupookee.
Ⅲ Kaatuko ti casupoolat ca citeyoo
naawufane písii pa púlooŋ piti púlunta pa
pipilaan elaan wiiñ ya eyya néhinii ya kápihin héesuumut Pútuun pa!
Pumansa pa pakati etaam ya nkahinto neyoo hínum,
punoomana pa keeyem ka ti etaam ya nkayeno kusaanum
ti hisaanumate ha hiteyoo henfakat ha hiti pahaaño pa.”
Ⅳ Fiye, innene sí hikee hilim héefulii alacana nihisok:
“Aluu pakanam, nílaaŋool neyoo.
Ancuk etinitaak himpaac ti umuuyen wa uteyoo,
etinitaak lompo himpaac ti hícump hítaapanu ha heekaakaayoo ha pitaako.✡18:4 Esaaya 48:20; Jeremiya 50:8; 51:6,45
Ⅴ Kaatuko umuuyen wa uteyoo úcumpoolaa-cúmpoolo fo patiila,
apan Pútuun pa pifiilut páhinaloo peenaput pa.✡18:5 Púcook 18:20-21; Jeremiya 51:9
Ⅵ Níhinoo samat nii fa náahine fa pakakee paka.
Nicooyoo fo ñésupak heenaput eeha náahine ha.
Elaan wiiñ ya eefete ya eyya naawufane ya pakakee paka kapilaan,
nimeeŋan elontoŋ ya eteyoo fo ñésupak kati alaan.✡18:6 Kícimu 137:8; Jeremiya 50:29
Ⅶ Níhinoo apucuk kúnuul niŋ esampoolo,
ancuk esampoolo ya eteyoo elehaa niŋ fa náamakiyanooliye fa,
kúnuul ka kiteyoo nkileh lompo niŋ hisaanumate ha hiteyoo.
Kaatuko asokaasok ti yaanoo:
'Inci oopa le nii aal amansa,
inci neetaat eyaaŋat aŋa áyiinoo eekete, apan etisampoolo háati poonool.'
Ⅷ Ekina ewune hícump hítaapanu waah ewwe nuumankee kamma akina:
eket, esampoolo niŋ épankul.
Enkuu púlooŋ efikilaakiyoo ti hinoom hoonool,
seemak sa insisowoo fo aleem motic.
Kaatuko Ateeteyo Pútuun pa péehinoo pa kíiti pitaakaataak sempe.✡18:8 Esaaya 47:7-9
Ⅸ “Pumansa pa púlooŋ ti etaam ya keehintiye ka neyoo, apan nkali ti hisaanumate ha hiteyoo, efikakooŋ nkasampoolo kiteyoo, nkacukaa háaputa ha hiti kaaleemanee ka kiteyoo. Ⅹ Efikasiiŋo pílaaŋ nkafe kamma kúnuul ka kenfakat enka naayem ka ti hicuku, nkasok:
'O ketaa ti hikaw! O ketaa ti hikaw!
Awe saatee ya enfakat ya,
Babilon, saatee ya eetaake ya sempe,
ti waati yoonool lamma Pútuun pa mpíhinuu kíiti!'✡18:10 Esekiyel 26:16-17
Ⅺ “Punoomana pa lompo pakati etaam ya efikakooŋ, nkasampoolo kamma akina, kaatuko an nene anoomut panoomanal pa piteyii. Ⅻ Oom panoomanal piyem: pisanoo niŋ púkotifoloo, pumaan niŋ mínankiin méeciita hinoom, pupaŋ peewalla niŋ pupaŋ peewiina, wañ wéecunke weenape núuciiti hinoom, niŋ papaloo óo papaloo éesuume haaw, waah óo waah weememanoolee niŋ úŋiiŋ eñaap, waah óo waah weememanoolee niŋ pupapaloo péeciita hitaaku, mañ óo mañ emma ímmiyeluŋanee, niŋ pínankiin peewalla. ⅩⅢ Panoomanal pa lompo piyem pahatal péesuume haaw, típaapikeen, caminkoloŋ óo caminkoloŋ, munucu méesuume haaw, elaan, lúuliin eti olif, efol, paasiit, síis, písaacii, pufalinc, pisaleet, pimiikan, niŋ keecokee ti hikam.
ⅩⅣ “Punoomana pa efikasok saatee ya eti Babilon:
'Waah wa weenape wa ewwa ankiipe wa hitaaku ufakuu,
páwalliyanoolal pa pitii púlooŋ lompo pícimaa,
aatinene cuk po!'
ⅩⅤ “Punoomana pa keenoomane ka ti saatee eyyuu fo káyenoonii kusaanum, efikasiiŋo pílaaŋ kamma nkafeye kúnuul ka kenfakat enka neeyem ka ti hicuku. Efikakooŋ nkasampoolo.✡18:15 Esekiyel 27 ⅩⅥ Nkasok:
'O ketaa ti hikaw! O ketaa ti hikaw!
Awe saatee ya enfakat ya!
Aásoolaasoolo wañ weewalla, niŋ wañ wéecunke weenape núuciiti hinoom,
ínsankaloolo niŋ pisanoo, pumaan niŋ mínankiin méeciita hinoom.
ⅩⅦ Ti waati yoonool lamma hitaaku ha hitii púlooŋ nihipucaloolee!'
“Piteteyana pa púlooŋ pakati ñiteen ña ñenfakat ña, niŋ payenka nkáhin ka teñño niŋ payenka nkáyuukale ka, niŋ an óo an aŋa páhin pa piteyoo mpiyem ti kaatii, poko púlooŋ efikasiiŋo pílaaŋ. ⅩⅧ Niŋ kacukaa háaputa ha hiti pusowo pa piti saatee ya, nkaceek meemak nkasok: 'Eyyeyme saatee ecuke nii saatee enfakat eyye?' ⅩⅨ Nkahoholan esiya ti kikawii kápiyisan páciite pa piteyii, nkakooŋ nkasampoolo, nkaceek meemak nkasok:
'O ketaa ti hikaw! O ketaa ti hikaw!
Awe saatee ya enfakat ya!
Hitaaku ha púlooŋ hiti pakati ñiteen ña ñenfakat ña ñiti kaatii ka,
ti hisaanumate ha hitii níhifulii.
Ti waati yoonool lamma, ímpucaloolee.'
ⅩⅩ Pale nitaak pásuuma, aluu keekine ka alacana,
kaatuko saatee ya épucaloolee!✡18:20 Jeremiya 51:48
Nitaak pásuuma, aluu keesampanee ka pakati Pútuun pa,
pupoñapoñ pa niŋ piyaamakoola pa!
Kaatuko Pútuun pa píhinaahin yo kíiti
mpinaŋ teyyo hítaapanu ha eeha neenaŋe ha ti aluu.”
ⅩⅪ Fiye, ekee maleekoo eti sempe neecoop énankiin enfakat, eenapa líŋ, neewant yo ti kaatii ka, neesok:
“Awe lompo, Babilon saatee ya enfakat ya,
fiyuu aafawantee fíl niŋ sempe, apan an atanene acuki.✡18:21 Jeremiya 51:63-64
ⅩⅫ An atanene ási lati awe an ti hisapu kóntiŋ niŋ ti caacook,
ti hisapu kampiip, niŋ fotom kámpiis.
Ahína óo áhina eesuusa,
an atanene acukii lati awe.
Pátuumal ésiken,
an atanene ási po lati awe.
ⅩⅩⅢ Lampi etinene ecaaŋanee lati awe.
Hicenku pinimo niŋ fotom esa,
an atanene ásiyii lati awe.
Kaatuko punoomana pa pakatii kayeniye hínum keemaka ka ti etaam ya,
illincan písii pa púlooŋ niŋ kaasaay ka kitii.✡18:23 Esaaya 24:8; Jeremiya 7:34; 25:10; Esekiyel 26:13,21
ⅩⅩⅣ Hísim ha hiti piyaamakoola pa hicukeecuk lati awe,
niŋ hiti keesampanee ka pakati Pútuun pa
niŋ hiti pakan paka púlooŋ keemukee ka ti etaam ya.”
✡ⅩⅧ:Ⅳ 18:4 Esaaya 48:20; Jeremiya 50:8; 51:6,45
✡ⅩⅧ:Ⅴ 18:5 Púcook 18:20-21; Jeremiya 51:9
✡ⅩⅧ:Ⅵ 18:6 Kícimu 137:8; Jeremiya 50:29
✡ⅩⅧ:Ⅷ 18:8 Esaaya 47:7-9
✡ⅩⅧ:Ⅹ 18:10 Esekiyel 26:16-17
✡ⅩⅧ:ⅩⅤ 18:15 Esekiyel 27
✡ⅩⅧ:ⅩⅩ 18:20 Jeremiya 51:48
✡ⅩⅧ:ⅩⅪ 18:21 Jeremiya 51:63-64
✡ⅩⅧ:ⅩⅩⅢ 18:23 Esaaya 24:8; Jeremiya 7:34; 25:10; Esekiyel 26:13,21